ខេត្តបន្ទាយមានជ័យ ៖ ព័ត៌មានដែលតែងតែធ្លាប់ឮថា រាល់ពលករដែលវិលត្រឡប់ពីថៃកាន់កាតស៊ីជម្ពូ បើគ្មានឯកសារបញ្ជាក់ពីម្ចាស់រោងចក្រ, សហគ្រាស ឬថៅកែពីកន្លែងធ្វើការទេនោះ សមត្ថកិច្ចថៃនឹងចាប់ ឬមិនបោះត្រាឲ្យឆ្លងព្រំដែននោះទេ ។ ឥឡូវនេះព័ត៌មាននេះបានក្លាយជាការពិតហើយ ។
ខេត្តបន្ទាយមានជ័យ ៖ ព័ត៌មានដែលតែងតែធ្លាប់ឮថា រាល់ពលករដែលវិលត្រឡប់ពីថៃកាន់កាតស៊ីជម្ពូ បើគ្មានឯកសារបញ្ជាក់ពីម្ចាស់រោងចក្រ, សហគ្រាស ឬថៅកែពីកន្លែងធ្វើការទេនោះ សមត្ថកិច្ចថៃនឹងចាប់ ឬមិនបោះត្រាឲ្យឆ្លងព្រំដែននោះទេ ។ ឥឡូវនេះព័ត៌មាននេះបានក្លាយជាការពិតហើយ ។
ពលករដែលបញ្ជូនតាមរថយន្តទ្រុងពីប្រទេសថៃតាមច្រកទ្វារអន្តរជាតិប៉ោយប៉ែតជាច្រើននាក់បានប្រាប់«កោះសន្តិភាព»ខ្លះដោយផ្ទាល់មាត់ និងខ្លះតាមទូរស័ព្ទថា ខណៈពួកគាត់កំពុងធ្វើដំណើរមកពីតាមបណ្ដាខេត្ត ត្រឡប់មកស្រុកកំណើតវិញ ស្រាប់តែត្រូវសមត្ថកិច្ចថៃចាប់នៅចំណុចបារ៉ាស់ត្រួតពិនិត្យមួយហៅណងគង់ ក្នុងស្រុកវ៉ាត់ថាណាណាក់ខន ខេត្តស្រះកែវ បើទោះជាមានកាតស៊ីជម្ពូហើយមិនទាន់ផុតសុពលភាពប្រើប្រាស់ក៏ដោយ ។
ស្ត្រីឈ្មោះ ឃីម បុប្ផា អាយុ២៥ឆ្នាំ មានទីលំនៅក្នុងស្រុកបវេល ខេត្តបាត់ដំបង បានប្រាប់តាមទូរស័ព្ទថា នាងទៅធ្វើការផ្នែកលក់បាយឲ្យថៅកែថៃក្នុងខេត្តអាយុធ្យារយៈពេលជាង១ឆ្នាំ ដោយមានកាតស៊ីជម្ពូត្រឹមត្រូវ ហើយក៏មិនទាន់ផុតសុពលភាពផងដែរ ។ ស្ត្រីខាងលើប្រាប់ថា ខណៈនាង និងពលករ-ពលការិនីប្រហែល៥០នាក់សុទ្ធតែមានកាតស៊ីជម្ពូកំពុងធ្វើដំណើរត្រឡប់មកលេងស្រុកកំណើតវិញ ស្រាប់តែត្រូវសមត្ថកិច្ចថៃចាប់នៅចំណុចបារ៉ាស់ណងគង់ ក្នុងស្រុកវ៉ាត់ថាណាណាក់ខន ខេត្តស្រះកែវ ។
ជុំវិញករណីនេះស្ត្រីខាងលើប្រាប់ថា ពេលក្រុមពលករ-ពលការិនីនាំគ្នាតវ៉ាថា ពួកខ្លួនមានកាតស៊ីជម្ពូស្របច្បាប់ ម្ដេចក៏ចាប់ បែជាសមត្ថកិច្ចថៃនិយាយថា ឥឡូវភាគីថៃប្ដូរកម្មវិធីថ្មី ដោយប្រាប់ថា រាល់ពលករទាំងឡាយណាវិលត្រឡប់ពីថៃទៅកម្ពុជា គ្មានឯកសារបញ្ជាក់ពីអាជ្ញាធរស្រុក-ខេត្ត, កន្លែងធ្វើការ ឬគ្មានលិខិតបញ្ជាក់ពីម្ចាស់រោចក្រ, សហគ្រាស និងកន្លែងធ្វើការទេ គេនឹងចាប់ទាំងអស់ ។
ស្ត្រីខាងលើបញ្ជាក់ថា ពេលនេះមិនថាអ្នកស្របច្បាប់ ឬខុសច្បាប់អ្វីទេ គឺភាគីថៃគេចាប់ទាំងអស់ ឲ្យតែវិលត្រឡប់គ្មានឯកសារដូចរាប់រាប់ខាងលើ ។
គួបញ្ជាក់ថា មួយរយៈកន្លងមកមានពលករ-ពលការិនីវិលត្រឡប់ពីថៃមួយចំនួនកាន់កាតស៊ីជម្ពូតែដើរកាត់តាមច្រករបៀងដោយប្រាប់ថា ដោយសារសមត្ថកិច្ចថៃនៅច្រកទ្វារអន្តរជាតិខ្លងលឹក ទល់មុខច្រកទ្វារអន្តរជាតិប៉ោយប៉ែតទឹកដីកម្ពុជាមិនព្រមបោះត្រាឲ្យ ដោយគេលើកឡើងដូចករណីខាងលើ (គ្មានឯកសារបញ្ជាក់ពីកន្លែងធ្វើការ) ។
បញ្ហាដែលមិនគួរឲ្យកើតមានមួយទៀតនោះ គឺតាមរថយន្តទ្រុងរបស់ថៃ គេឃើញបញ្ជូនពលករមកវិញណែនណាន់តាន់តាប់ជាមួយនឹងក្មេងតូចៗ មើលទៅពិតជាគួរឲ្យសង្វេគ ព្រោះគ្នានៅតូចមិនដឹងអីសោះ រងគ្រោះទាំងនៅកុមារ ត្រូវគេបញ្ជូនដូចសត្វធាតុដែរ ។
ប្រភពពីសមត្ថកិច្ច និងមន្ត្រីនៅទីតាំងទទួលពលករបញ្ជូនពីថៃ ក្នុងភូមិប៉ោយប៉ែត បានប្រាប់តាមទូរស័ព្ទថា ការលើកឡើងរបស់ពលករពិតជាកើតមានមែន ។
ជុំវិញបញ្ហាខាងលើលោក ប៊ុន សុខវិបុល អគ្គកុងស៊ុលខ្មែរប្រចាំខេត្តស្រះកែវ ប្រទេសថៃមិនអាចទាក់ទងសុំការបំភ្លឺបានទេ ដោយលេខទូរស័ព្ទរបស់លោកចុចមិនចូលជាច្រើនដង ៕
ចែករំលែកព័តមាននេះ