រាជធានីភ្នំពេញ ៖ យ៉ាងហោចណាស់ ក៏មានបុរសម្នាក់រងរបួសជើងខាងឆ្វេង ដោយសារត្រូវគ្រាប់កាំភ្លើង បន្ទាប់ពីជនរងគ្រោះព្យាយាមប្រតាយប្រតប់ជាមួយក្រុមជនសង្ស័យ ដែលមានគ្នា២នាក់បង្កឱ្យមានការភ្ញាក់ផ្អើល កាលពីវេលាម៉ោង១១ និង៤៥នាទីយប់ថ្ងៃទី២ សីហា ២០១៥ ស្ថិតត្រង់ចំណុចស្តុបផ្លូវ៦៣កែងផ្លូវព្រះសីហនុ ក្នុងសង្កាត់បឹងកេងកង១ ខណ្ឌចំការមន ។
បើតាមសាក្សីបានឱ្យដឹងថា មុនពេលកើតហេតុ គេបានឃើញម៉ូតូ២គ្រឿងជិះដេញគ្នាតាមផ្លូវព្រះសីហនុ ក្នុងទិសដៅពីកើតទៅលិច ដោយម៉ូតូ១គ្រឿងម៉ាកហុងដាស្គូពី ពណ៌.សលាយខៀវ ជិះដោយបុរសម្នាក់អាយុប្រហែលជាង២០ឆ្នាំ (ជនរងគ្រោះ) និងមួយគ្រឿងទៀត ម៉ាកហុងដាឌ្រីមសេ១២៥ជិះគ្នា២នាក់ ពេលមកដល់ស្តុបត្រសក់ផ្អែម គេបានឮសំឡេងស្រែកជេរគ្នាខ្លាំងៗ ហើយបុរសម្នាក់ ដែលជិះម៉ូតូស្គូពីបានបត់ម៉ូតូត្រឡប់ក្រោយ និងបានឈប់ម៉ូតូនៅកណ្តាលផ្លូវក្បែររនាំងពុះចែកទ្រូងថ្នល់ និងបានរត់ទៅរើសដុំថ្ម និងចានរបស់អ្នកលក់គុយទាវនៅក្បែរនោះទៅគប់ក្រុមជិះម៉ូតូឌ្រីមដែលជិះដេញតាមពីក្រោយ ។
ពេលនោះបុរសម្នាក់ដែលជិះម៉ូតូឌ្រីមពីក្រោយបានហក់ចុះពីលើម៉ូតូ និងបានដកកាំភ្លើងមិនស្គាល់ម៉ាកបាញ់សំដៅបុរសដែលយកចានគប់នោះ តែបាញ់មិនចេញ ហើយក៏ព្យាយាមអាមេ៣ ទៅ៤ដងទៀត ទើបបាញ់មួយគ្រាប់ទៀត ត្រូវជើងខាងឆ្វេងតែម្តង បន្ទាប់ពីបាញ់ហើយ ក៏រត់ឡើងជិះម៉ូតូគេចខ្លួនបាត់អស់ទៅ ចំណែកឯជនរងគ្រោះត្រូវបក្សពួកជិះម៉ូតូមួយគ្រឿងទៀតមកដឹកយកទៅមន្ទីរពេទ្យផងដែរ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ