ខេត្តប៉ៃលិន ៖ កាលពីរសៀលថ្ងៃទី០២ ខែសីហា ឆ្នាំ២០១៥ កន្លងទៅនេះ នៅស្នាក់ការប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិព្រំ មានរៀបចំពិធីសំណេះសំណាលជាមួយមន្ត្រីនគរបាលអន្តោប្រវេសន៍ ក្រោមអធិបតីភាពលោកនាយឧត្តមសេនីយ៍ សុខ ផល អគ្គនាយកអន្តោប្រវេសន៍ ដោយមានការចូលរួមពីលោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្ត នាយ នាយរង ប៉ុស្តិ៍នគរបាលអន្តោប្រវេសន៍តាមច្រកទ្វារនានាជាច្រើនាក់ផងដែរ ។
លោកឧត្តមសេនីយ៍ត្រី សួស សុខដារ៉ា ប្រធានប៉ុស្តិ៍នគរបាលអន្តោរប្រវេសន៍ច្រកទ្វារអន្តរជាតិព្រំ បានឡើងរាយការណ៍ និងសំណូមពរដល់អគ្គនាយកដ្ឋានអំពីការខ្វះខាតដូចជា ទី១-គ្មានដីសម្រាប់សាងសង់ប៉ុស្តិ៍ត្រួតពិនិត្យ, ទី២-គ្មានអាគារស្នាក់នៅរបស់កងកម្លាំងសរុបទាំងអស់៣៤នាក់ ។
លោកនាយឧត្តមសេនីយ៍ សុខ ផល បានជំរុញដល់មន្ត្រីនគរបាលអន្តោប្រវេសន៍ទាំងអស់ត្រូវតែគោរពតួនាទីរបស់ខ្លួន មិនត្រូវប្រើពាក្យសម្តីមិនសមរម្យដល់ភ្ញៀវជាតិ និងអន្តរជាតិ ត្រូវរួសរាយរាក់ទាក់ ក្នុងកិច្ចការទទួលភ្ញៀវ ។ លោកនាយឧត្តមសេនីយ៍បានសង្កត់ធ្ងន់ទៅលើជនអន្តោប្រវេសន៍ ទី១-ត្រូវតែពិនិត្យទៅលើជនបរទេសណាដែលរស់នៅលើទឹកដីកម្ពុជាដោយគ្មានលិខិតស្នាមត្រឹមត្រូវ ហើយត្រូវតែចាប់បញ្ជូនពួកគេទៅស្រុកកំណើតវិញជាដាច់ខាត និងទី២-បើជនអន្តោប្រវេសន៍នោះមានលិខិតស្នាម ឬឯកសារ យើងត្រូវពិនិត្យឱ្យបានច្បាស់លាស់ថា តើពិតប្រាកដ ឬក្លែងក្លាយ ។ យើងត្រូវតែអនុវត្តច្បាប់អន្តោប្រវេសន៍ឱ្យបានតឹងរ៉ឹងឱ្យសមជាប្រទេសមួយដែលមានច្បាប់អន្តោប្រវេសន៍ត្រឹមត្រូវ ហើយនៅថ្ងៃអនាគតនឹងមិនមានជ នអន្តោប្រវេសន៍ខុសច្បាប់នៅប្រទេសកម្ពុជាយើងឡើយ ។
លោកនាយឧត្តមសេនីយ៍បានបញ្ជាក់ទៀតថា កងកម្លាំងនគរបាលអន្តោប្រវេសន៍ត្រូវតែខិតខំដោះស្រាយជូនប្រជាពលរដ្ឋ និងភ្ញៀវបរទេស មិនត្រូវអសកម្មក្នុងការងារនោះឡើយ ហើយលើសពីនេះទៅទៀតនគរបាលអន្តោប្រវេសន៍មានតួនាទីការពារសន្តិសុខជាតិ ដូចជា ចុះល្បាតតាមព្រំដែន ដើម្បីការពារបូរណភាពទឹកដីរបស់យើង ជាពិសេសគឺទំនាក់ទំនងគ្រប់ស្ថាប័នដែលពាក់ព័ន្ធនឹងប្រទេសជិតខាង ។
លោកនាយឧត្តមសេនីយ៍បានយល់ព្រមតាមសំណើរបស់ប្រធានប៉ុស្តិ៍នគរបាលអន្តោប្រវេសន៍ ដែលសុំដីសាងសង់ប៉ុស្តិ៍ និងអគារស្នាក់នៅ ហើយលោកបានចុះទៅត្រួតពិនិត្យដីរបស់ប្រជាពលរដ្ឋមួយកន្លែងដែលបានទិញដើម្បីសាងសង់អគារនោះ ។ ក្នុងនោះដែរលោកបានប្រគល់ថវិកា២០លានរៀល អង្ករ មី ទឹកត្រី ទឹកស៊ីអ៊ីវ ម្រេច ខ្ទឹម និងប៊ីចេង ទុកសម្រាប់ជូនកងកម្លាំងដែលប្រចាំការនៅប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិព្រំ ហើយក៏បានចុះត្រួតពិនិត្យទីតាំងដែលត្រូវសាងសង់កន្លែងស្នាក់នៅរបស់មន្ត្រីផងដែរ ៕
ចែករំលែកព័តមាននេះ