រាជធានីភ្នំពេញ ៖ កាលពីវេលាម៉ោង១រសៀលថ្ងៃទី១ សីហា ២០១៥ នេះ កម្លាំងអាជ្ញាធរចម្រុះខណ្ឌមានជ័យ ដឹកនាំបញ្ជាផ្ទាល់ពីលោកឌី រ័ត្នខេមរុណ អភិបាលរងខណ្ឌមានជ័យ និងមានការសម្របសម្រួលពីព្រះរាជអាជ្ញាររងអមសាលាដំបូងរាជធានីភ្នំពេញ លោកខាំ សុផារី និងមានការចូលរួមពីកម្លាំងនគរបាល និងកម្លាំងអាវុធហត្ថខណ្ឌខណ្ឌ បានចុះបង្ក្រាបទីតាំងលួចលាក់កត់កន្ទុយលេខខុសច្បាប់ដ៏ធំមួយកន្លែង ស្ថិតនៅចំណុចផ្ទះល្វែងគ្មានលេខ តាមបណ្តោយផ្លូវលំ ក្នុងក្រុមទី១៤ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ ដោយឃាត់ខ្លួនម្ចាស់ទីតាំង២នាក់ និងវត្ថុតាងមួយចំនួន ។
លោកឌី រ័ត្នខេមរុណ ដឹងថា មុនឈានដល់ការចុះបង្ក្រាប អាជ្ញាធរខណ្ឌយើងបានតាមដានស្រាវជ្រាវជាយូរមកហើយ ប៉ុន្តែមិនទាន់ទទួលបានតំរុយច្បាស់ការណ៍ពីទីតាំងកត់ឆ្នោតរបស់មេធំខាងលើ ។ រហូតមកទល់នឹងវេលាម៉ោងកើតហេតុ ដោយទទួលបានតំរុយយ៉ាងច្បាស់ការណ៍ចំពោះទីតាំងមេឆ្នោតធំ ដែលកំពុងពួនសំងំលួចលាក់លេងយ៉ាងគគ្រឹកគគ្រេង ទើបកម្លាំងអាជ្ញាធរយើង រួមទាំងមានការចូលរួមពីកម្លាំងសមត្ថកិច្ចចម្រុះ ដោយមានការការអនុញ្ញាតពីព្រះអាជ្ញាររង បានបើកប្រតិបត្តិការធ្វើការបង្ក្រាបបានជាក់ស្តែងតែម្តង ។
ក្នុងការចុះបង្ក្រាបខាងលើនេះ អាជ្ញាធរបានធ្វើការឃាត់ខ្លួន ប្តីប្រពន្ធជាម្ចាស់ទីតាំងចំនួន២នាក់ ដែលស្ត្រីជាប្រពន្ធមានឈ្មោះមុនី អាយុ៤៣ឆ្នាំ និងបុរសជាប្តីមិនត្រូវបានបញ្ចេញឈ្មោះ ។ ក្នុងនោះ ក៏ធ្វើការដកហូតគ្រឿងអេឡិចត្រូនិចសម្រាប់មើលឆ្នោតមួយចំនួនធំដូចជាម៉ាស៊ីន Fax ៦គ្រឿង , ម៉ាស៊ីនគិតលេខ២គ្រឿង , ទូរស័ព្ទដៃ២គ្រឿង ថវិកាមួយចំនួន និងវត្ថុតាងដូចជាក្រដាសកន្ទុយលេខផ្សេងៗមួយចំនួនធំផងដែរ ។
បច្ចុប្បន្នជនទាំង២នាក់ ដែលត្រូវឃាត់ខ្លួន និងវត្ថុតាង ត្រូវបញ្ចូនទៅកាន់ទីបញ្ជាការដ្ឋានកងរាជអាវុធហត្ថខណ្ឌមានជ័យ ដើម្បីចាត់ការទៅតាមផ្លូវច្បាប់ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ