រាជធានីភ្នំពេញ ៖ បន្ទាប់ពីមានលេចឮពាក្យចចាមអារ៉ាមជាច្រើនក្នុងរយៈពេលជាង១ខែកន្លងមកនេះ ទាក់ទិននឹងការបណ្តេញអ្នករស់នៅក្នុងអគារប៊ូលឌិញចេញពីសំណង់អគារ ដោយយោងហេតុផលថា អគារនេះមានសភាពទ្រុឌទ្រោមខ្លាំងនោះ
រាជធានីភ្នំពេញ ៖ បន្ទាប់ពីមានលេចឮពាក្យចចាមអារ៉ាមជាច្រើនក្នុងរយៈពេលជាង១ខែកន្លងមកនេះ ទាក់ទិននឹងការបណ្តេញអ្នករស់នៅក្នុងអគារប៊ូលឌិញចេញពីសំណង់អគារ ដោយយោងហេតុផលថា អគារនេះមានសភាពទ្រុឌទ្រោមខ្លាំងនោះ នៅព្រឹកថ្ងៃទី៣១ កក្កដា លោក ជ គឹមស៊រ អភិបាលរងខណ្ឌចំការមន ក៏ដូចជាលោក ខាត់ ណារិទ្ធិ ចៅសង្កាត់ទន្លេបាសាក់ បានមានប្រសាសន៍ នៅវេទិកាសាធារណៈមួយរៀបចំឡើងនៅក្នុងភោជនីយដ្ឋានមួយកន្លែងក្បែរអគារប៊ូលឌិញ ក្នុងសង្កាត់ទន្លេបាសាក់ ខណ្ឌចំការមនថា អាជ្ញាធរមូលដ្ឋាន ក៏ដូចជាសាលារាជធានីភ្នំពេញមិនមានគោលការណ៍ ឬវិធានការណាមួយបណ្តេញបងប្អូនប្រជាពលរដ្ឋដែលកំពុងរស់នៅក្នុងអគារប៊ូលឌិញប្រមាណ៥០០គ្រួសារ ឱ្យចេញដូចពាក្យចចាមអារា៉មដែលបានលេចឮតៗគ្នាកន្លងមកឡើយ ។
ទោះបីជាអាជ្ញាធរមូលដ្ឋានបានអះអាងបញ្ជាក់នៅក្នុងវេទិកាសាធារណៈបែបនេះក៏ដោយ ក៏ក្តីកង្វល់របស់បងប្អូនប្រជាពលរដ្ឋ ដែលរស់នៅអគារប៊ូលឌិញ នៅតែមានមន្ទិលសង្ស័យថា សាលារាជធានីភ្នំពេញនឹងមានគម្រោងដោះដូរទីជម្រករបស់ពួកគាត់ទៅតំបន់ជាយក្រុង តាមគម្រោងវិនិយោគរបស់ក្រុមហ៊ុនណាមួយ ដូចការអភិវឌ្ឍនាពេលកន្លងមកដូចជា តំបន់ដីក្រហម និងតំបន់សំបុកចាបជាដើម ។ ជាមួយគ្នានេះដែរ បងប្អូនដែលរស់នៅអគារប៊ូលឌិញ លើកឡើងថា ពួកគាត់ទទួលស្គាល់ថាពិតណាស់ អគារប៊ូលឌិញមានសភាពទ្រុឌទ្រោម ប៉ុន្តែពួកគាត់បានស្តីបន្ទោសទៅលើអាជ្ញាធរមូលដ្ឋានថា មិនមានចេតនាណាមួយក្នុងការជួសជួលកែច្នៃអគារនេះសម្រាប់ផ្តល់ឱកាសឱ្យពួកគាត់បានរស់នៅទីនោះតទៅទៀតឡើយ គឺមានតែឆន្ទៈក្នុងការជម្លៀសពួកគាត់ចេញដើម្បីបានផលចំណេញពីក្រុមហ៊ុនណាមួយដែលឈានជើងចូលអភិវឌ្ឍលើអគារដ៏ចំណាស់មួយនេះ ។
ពលរដ្ឋរៀបរាប់ថា ពួកគាត់បានដឹងច្បាស់ហើយពីតម្លៃទីផ្សារដីបច្ចុប្បន្ននៅជុំវិញអគារប៊ូលឌិញ គឺ១ម៉ែត្រការ៉េមិនក្រោម៥ពាន់ដុល្លារឡើយ ដូច្នេះពួកគាត់សុំប្រកាសទៅប្រមុខរាជរដ្ឋាភិបាល ក៏ដូចជាក្រុមឈ្មួញដែលមានទឹកចិត្តឈានជើងចង់លូកដៃចូលអភិវឌ្ឍនៅតំបន់អគារប៊ូលឌិញ រួមទាំងអាជ្ញាធរមូលដ្ឋានថា អស់លោកយកទំហំដីទាំងមូលគុណនឹង១ម៉ែត្រការ៉េជាមធ្យម៥ពាន់ដុល្លារនោះ ហើយបែងចែកជូនពលរដ្ឋទាំងអស់តាំងពីលើរហូតដល់ក្រោម គឺទឹកប្រាក់នេះមានចំនួនខ្ពស់ ។ បងប្អូនប្រជាពលរដ្ឋប្រាកដជាទទួលបាននូវសំណងសមរម្យធ្វើឱ្យពួកគាត់ចាត់ទុកអាជ្ញាធរមូលដ្ឋាន ក៏ដូចជាអាជ្ញាធរថា ពិតជាឪពុកម្តាយដ៏ល្អដែលមានក្តីសន្តោសប្រោសប្រណីចំពោះកូនចៅសម្រាប់ទីជម្រកជ្រកកោនទៅថ្ងៃអនាគត ។ ប៉ុន្តែផ្ទុយទៅវិញ អស់លោកជាមន្ត្រីសាធារណៈ មានឱកាសក្នុងការគ្រប់គ្រងរដ្ឋបាលទីតាំងខាងលើ ហើយ ធ្វើការបន្លំដោះដូរជម្លៀសពួកគាត់ទៅរស់នៅតំបន់ផ្សេងនៅជាយក្រុងក្នុងភាពមិនលាតត្រដាងជាសាធារណៈនោះ គឺពួកគាត់មិនចាកចេញជាដាច់ខាត ។
ជាមួយនឹងការលើកឡើងរបស់បងប្អូនប្រជាពលរដ្ឋនេះ លោក ជ គឹមស៊រ អភិបាលរងខណ្ឌចំការមន មានប្រសាសន៍ថា ក្តីកង្វល់របស់អាជ្ញាធរ គឺព្រួយបារម្ភខ្លាចបងប្អូនជួបគ្រោះហានិភ័យណាមួយកើតឡើងជាយថាហេតុ ដោយសារអគារនេះមានសភាពទ្រុឌទ្រោមខ្លាំង ប៉ុន្តែចំពោះការបណ្តេញចេញ ឬការដោះដូរទីជម្រករបស់បងប្អូននេះ អាជ្ញាធរគ្មានហេតុផលបែបនោះជាដាច់ខាត ។ បើមានការរុះរើឬដោះដូរនោះ អាស្រ័យទៅលើបងប្អូនដែលរស់នៅមានការឯកភាពគ្នាទាំងស្រុង ទើបអាជ្ញាធរមានសិទ្ធិធ្វើជាសាក្សីដឹងឮ ជួយសម្រួលដល់ការផ្លាស់ប្តូរទីជម្រករបស់បងប្អូនប្រជាពលរដ្ឋ ប៉ុន្តែបើបងប្អូនប្រជាពលរដ្ឋមិនមានការឯកភាពទេ អាជ្ញាធរមូលដ្ឋានគ្មានការដោះដូរ ឬបណ្តេញប្រជាពលរដ្ឋចេញជាដាច់ខាត ។
គួរបញ្ជាក់ថា វេទិកាសាធារណៈដែលធ្វើឡើងខាងលើនេះមានការចូលរួមចាំឃ្លាំមើលពីបណ្តាអង្គការសង្គមស៊ីវិលជាច្រើន ព្រមទាំងសហគមន៍នានាជាច្រើនក្នុងគោលបំណងតាមដានពីទីជម្រករបស់អ្នករស់នៅក្នុងអគារប៊ូលឌិញ ។
កាលពីខែកញ្ញា ឆ្នាំ២០១៤ លោក ឡុង ឌីម៉ង់ នាយករងរដ្ឋបាល និងជាអ្នកនាំពាក្យសាលារាជធានីភ្នំពេញ បានឱ្យកោះសន្តិភាពដឹងតាមទូរស័ព្ទថា «ឆ្លើយតបទៅនឹងពាក្យចចាមអារ៉ាមនោះ សាលារាជធានីភ្នំពេញមិនមានចេតនា ឬផែនការដោះដូរអគារប៊ូលឌិញ ឬក៏បណ្តេញប្រជាពលរដ្ឋចេញទេ» ។ លោកបញ្ជាក់ថា «យោងប្រសាសន៍របស់លោក ប៉ា សុជាតិវង្ស អភិបាលរាជធានីភ្នំពេញ លើកឡើងថា អគារប៊ូលឌិញបានកសាងឡើងតាំងពីឆ្នាំ១៩៦៤មកម្ល៉េះ បច្ចុប្បន្នអគារនេះមានសភាពចាស់ទ្រុឌទ្រោមខ្លាំង និងមានការពុកផុយ ។ ដើម្បីសុវត្ថិភាព និងជាប្រយោជន៍ដល់ប្រជាពលរដ្ឋ បើសិនជាប្រជាពលរដ្ឋយល់ព្រមដោះដូរ សាលារាជធានីភ្នំពេញនឹងជួយអន្តរាគមន៍រកផ្ទះល្វែងក្នុងបុរីរុងរឿងនៅក្នុងតំបន់អភិវឌ្ឍន៍ជ្រោយចង្វា ដើម្បីដោះស្រាយជូន ចៀសវាងគ្រោះថ្នាក់បាក់ស្រុតនៅថ្ងៃណាមួយ»។
ទាក់ទិនទៅនឹងបញ្ហាបច្ចេកទេសនៃសំណង់ លោក ស៊ឹង សុច្ចរ៉ា អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញ ធ្លាប់បានឱ្យដឹងថា «តាមរយៈការចុះពិនិត្យជាក់ស្តែង សំណង់អគារប៊ូលឌិញនេះមានវ័យចំណាស់ និងមានសភាពចាស់ទ្រុឌទ្រោមខ្លាំង ដែលមិនអាចឱ្យពលរដ្ឋរស់នៅបានតទៅទៀតទេ ពីព្រោះសំណង់អគារនេះកំពុងប្រេះបាក់ ឬរបើកថ្មដុំៗ ។ ជាពិសេសផ្ទុះបេតុងប្លង់សេជាបន្តបន្ទាប់ចេញសរសៃដែកមានសភាពច្រែះ ឬពុកផុយតែម្តងដោយសារជ្រាបទឹក និងខ្វះការថែទាំ ។ ម្យ៉ាងពលរដ្ឋខ្លះចេះតែជួសជុល ឬរៀបបន្ទះក្តារ និងថ្មបន្ថែមទៀត ។
មន្ត្រីបច្ចេកទេសរូបនេះបញ្ជាក់ថា សំណង់អគារនេះអាចនឹងរលំបាក់ស្រុតនៅថ្ងៃណាមួយជាមិនខាន ហើយក៏មិនយូរដែរ ។ បញ្ហានេះមន្ទីរបានចេញសេចក្តីជូនដំណឹង៣លើករួចមកហើយ ប៉ុន្តែរហូតមកដល់ពេលនេះ ទាំងប្រជាពលរដ្ឋ ក៏ដូចជាអាជ្ញាធរនៅមិនទាន់មានការរៀបចំនៅឡើយទេ ។ យើងពិតជាមិនមានបំណងដេញពលរដ្ឋ ឬលក់ឱ្យទៅឈ្មួញ ឬអ្នកណានោះទេ ប៉ុន្តែនេះជាក្តីបារម្ភរបស់អ្នកជំនាញ កុំឱ្យមានបញ្ហាអ្វីមួយកើតឡើងថា មន្ត្រីជំនាញមិនបានប្រាប់ជាមុន ៕
ចែករំលែកព័តមាននេះ