ខេតស្វាយរៀង ៖ កម្លាំងមន្ទីរយុត្តិធម៌សហការជាមួយកម្លាំងកងរាជអាវុធហត្ថក្រុងបាវិតបានធ្វើប្រតិបត្តិការចាប់ខ្លួនជនសង្ស័យ៣នាក់បន្តបន្ទាប់គ្នាដែលជាមុខសញ្ញាជួញដូរ និងចែកចាយគ្រឿងញៀនយ៉ាងសកម្មនៅក្រុងបាវិត ។
បើតាមសមត្ថកិច្ចកងរាជអាវុធហត្ថខេត្តស្វាយរៀងបានឱ្យដឹងថា សមត្ថកិច្ចបានធ្វើការឃាត់ខ្លួនជនសង្ស័យទាំង៣នាក់បន្តបន្ទាប់គ្នា ដោយដំបូងគឺឃាត់ខ្លួនបានជនសង្ស័យទី១-ឈ្មោះ គង់ សុភាព ភេទប្រុស អាយុ២៧ឆ្នាំ កាលពីវេលាម៉ោង៨ និង៤០នាទីព្រឹក ថ្ងៃទី៣០ កក្កដា ២០១៥ ស្ថិតនៅភូមិតាប៉ឹប សង្កាត់បាវិត ក្រុងបាវិត និងបានដកហូតបានម្សៅក្រាមរឹងពណ៌សថ្លា២កញ្ចប់ ព្រមទាំងទូរស័ព្ទដៃ២គ្រឿង ។ បន្ទាប់ពីធ្វើការសួរនាំជនសង្ស័យរួចមក នៅវេលាម៉ោង៩ និង១០នាទីព្រឹកថ្ងៃដដែល កម្លាំងជំនាញបានធ្វើការស្រាវជ្រាវ និងឈានដល់ការចាប់ខ្លួនជនសង្ស័យទី២-ឈ្មោះ ឡេង ស៊ីណា ភេទស្រី អាយុ៤៣ឆ្នាំ មានសញ្ជាតិវៀតណាម មានទីលំនៅភូមិបាវិតកណ្តាល សង្កាត់បាវិត ក្រុងបាវិត និងដកហូតបានថ្នាំញៀនប្រភេទក្រាមរឹងព៌ណសថ្លា ចំនួន៣៨កញ្ចប់ (៣កញ្ចប់ធំ និង៣៥កញ្ចប់តូច), ទូរស័ព្ទដៃ១គ្រឿង, ថង់ប្លាស្ទិចសម្រាប់ជក់គ្រឿងញៀនមួយចំនួន និងវិក្ក័យបត្រវេរលុយវីងមួយចំនួនផងដែរ ។ ស្ត្រីរូបនេះជាមុខសញ្ញាយ៉ាងសកម្មក្នុងការចែកចាយគ្រឿងញៀននាពេលកន្លងមក ។
ប្រភពបន្តទៀតថា ក្រោយពីធ្វើការឃាត់ស្ត្រីសង្ស័យទី២រួចមក កម្លាំងសមត្ថកិច្ចមិនទាន់បិទការស្រាវជ្រាវនោះទេ គឺបន្តសួរនាំជនសង្ស័យទាំង២នាក់រហូតឈានដល់ការឃាត់ខ្លួនជនសង្ស័យទី៣-ឈ្មោះ តាន់ សុជាតិ ហៅយឿង ភេទប្រុស អាយុ២៩ឆ្នាំ មុខរបរមិនពិតប្រាកដ នៅវេលាម៉ោង៩ព្រឹក ថ្ងៃទី៣១ ខែកក្កដា ឆ្នាំ២០១៥ ស្ថិតក្នុងភូមិដូនស ឃុំដូនស ស្រុកស្វាយជ្រំ ហើយការឃាត់ជនសង្ស័យទី៣នេះគឺធ្វើឡើងតាមរយៈលេខទូរស័ព្ទនៅក្នុងវិក្ក័យបត្រវេរលុយតាមវីង ដែលស្ត្រីសង្ស័យខាងលើបានផ្ញើរទៅឱ្យ ព្រមទាំងដកហូតបានទូរស័ព្ទដៃ២គ្រឿងផងដែរ ។
បច្ចុប្បន្នជនសង្ស័យទាំង៣នាក់ត្រូវបាននាំខ្លួនទៅសួរនាំ និងឃុំខ្លួនជាបណ្តោះអាសន្ននៅទីបញ្ជាការអាវុធហត្ថខេត្តស្វាយរៀង ដើម្បីកសាងសំណុំរឿងបញ្ជូនខ្លួនទៅតុលាការផ្តន្ទាទោសតាមច្បាប់ ៕
ចែករំលែកព័តមាននេះ