ខេត្តបន្ទាយមានជ័យ ៖ ថ្នាក់ដឹកនាំក្រសួងមហាផ្ទៃបានជម្រុញឱ្យគណៈអភិបាលខេត្តត្រូវសហការគ្នាឱ្យបានល្អជាមួយក្រុមប្រឹក្សាខេត្ត ។ ថ្នាក់ដឹកនាំក្រសួងមហាផ្ទៃបានលើកឡើងបែបនេះក្នុងពិធីប្រកាសតែងតាំងអភិបាលរងខេត្តបន្ទាយមានជ័យនារសៀលថ្ងៃទី៣១ កក្កដា ២០១៥
ខេត្តបន្ទាយមានជ័យ ៖ ថ្នាក់ដឹកនាំក្រសួងមហាផ្ទៃបានជម្រុញឱ្យគណៈអភិបាលខេត្តត្រូវសហការគ្នាឱ្យបានល្អជាមួយក្រុមប្រឹក្សាខេត្ត ។ ថ្នាក់ដឹកនាំក្រសួងមហាផ្ទៃបានលើកឡើងបែបនេះក្នុងពិធីប្រកាសតែងតាំងអភិបាលរងខេត្តបន្ទាយមានជ័យនារសៀលថ្ងៃទី៣១ កក្កដា ២០១៥ នៅសាលប្រជុំសាលាខេត្តបន្ទាយមានជ័យ ។
លោក គោស៊ុំ សារឿត អភិបាលខេត្តបន្ទាយមានជ័យបានមានប្រសាសន៍ឱ្យដឹងថា មន្ត្រីក្រុមប្រឹក្សាខេត្តមានចំនួន១៧នាក់(ស្រីម្នាក់), អភិបាល នៃគណៈអភិបាលខេត្តមានចំនួន៧នាក់ (ស្រីម្នាក់), មន្ត្រីក្របខណ្ឌសរុបចនួន១២៦នាក់ (ស្រី៣៦នាក់), បុគ្គលិកជាប់កិច្ចសន្យា និងបណ្តែតមានចំនួន៤៧នាក់(ស្រី២៦នាក់) ។
លោក អ៊ួង ចន្នី ប្រធាននាយកដ្ឋានបុគ្គលិក និងបណ្តុះបណ្តាលវិជ្ជាជីវៈ នៃអគ្គនាយកដ្ឋានរដ្ឋបាលក្រសួងមហាផ្ទៃ អានប្រកាសតែងតាំងលោក វិស្វ័ករ លី សារី ប្រធានមន្ទីររៀបចំដែនដីនគរូបនីយកម្ម សំណង់ និងសូរិយោលដីខេត្តបន្ទាយមានជ័យ ត្រូវបានតែងតាំងជាអភិបាលរងខេត្តបន្ទាយមានជ័យ ជំនួសលោក អឹុម ភាន់សុផល ជាអភិបាលរងខេត្តបន្ទាយមានជ័យ ដែលត្រូវផ្ទេរភារកិច្ចភារកិច្ចទៅបម្រើការងារនៅទីស្តីការក្រសួងមហាផ្ទៃ ។
លោក លី សារី អភិបាលរងខេត្តបន្ទាយមានជ័យដែលទើបទទួលភារកិច្ចថ្មីបានមានប្រសាសន៍ថ្លែងអំណរគុណចំពោះរាជរដ្ឋាភិបាលកម្ពុជា និងក្រុមប្រឹក្សា ព្រមទាំងគណៈអភិបាលខេត្តដែលបានតែងតាំងរូបលោកជាអភិបាលរងខេត្តបន្ទាយមានជ័យ ។
លោក សក់ សេដ្ឋា រដ្ឋលេខាធិការក្រសួងមហាផ្ទៃបានមានប្រសាសន៍កោតសសើរចំពោះអាជ្ញាធរខេត្តបន្ទាយមានជ័យដែលមានការរីកចម្រើន ក៏ដូចជាការរីកចម្រើន និងអភិវឌ្ឍន៍របស់រាជរដ្ឋាភិបាលកម្ពុជា ជាពិសេសធនធានមនុស្សដែលជាកក្តាសំខាន់សម្រាប់មន្ត្រីដែលមានចំណេះដឹង ដើម្បីបម្រើការងារជូនប្រជាពលរដ្ឋ និងប្រទេសជាតិ ។
លោកបានជម្រុញឱ្យគណៈអភិបាលខេត្តត្រូវចេះសហការគ្នាឱ្យបានល្អជាមួយក្រុមប្រឹក្សាខេត្ត ដើម្បីបម្រើការងារជូនប្រជាពលរដ្ឋ និងប្រទេសជាតិឱ្យមានការរីកចម្រើន និងអភិវឌ្ឍប្រទេសកម្ពុជា ៕
ចែករំលែកព័តមាននេះ