រាជធានីភ្នំពេញ ៖ ថ្លែងនៅក្នុងសិក្ខាសាលាស្ដីពីការប្រើប្រាស់ប្រព័ន្ធបច្ចេកវិទ្យាផ្សព្វផ្សាយ OTT (Over The Top Platform) នៅក្នុងព្រះរាជាណាចក្រកម្ពុជា នាព្រឹកថ្ងៃទី៣០ កក្កដា ២០១៥ នៅសណ្ឋាគារសុខាភ្នំពេញ
រាជធានីភ្នំពេញ ៖ ថ្លែងនៅក្នុងសិក្ខាសាលាស្ដីពីការប្រើប្រាស់ប្រព័ន្ធបច្ចេកវិទ្យាផ្សព្វផ្សាយ OTT (Over The Top Platform) នៅក្នុងព្រះរាជាណាចក្រកម្ពុជា នាព្រឹកថ្ងៃទី៣០ កក្កដា ២០១៥ នៅសណ្ឋាគារសុខាភ្នំពេញ លោកស្រីឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានសាទរចំពោះប្រព័ន្ធ OTT ដែលជាទូរទស្សន៍អុិនធើរណេត ដែលប្រើបច្ចេកវិទ្យាផ្សព្វផ្សាយមាតិកាចម្រុះគ្នា ប្រៀបបីដូចជាអាហារបូហ្វេ ដែលអាចឲ្យអ្នកទស្សនាមានជម្រើសសម្បូរបែបក្នុងការទស្សនាកម្មវិធីប្លែក លឿន ពេលណា ទីណា ក៏បានឲ្យតែភ្ជាប់ជាមួយអុិនធើរណេត ។
លោកស្រី ម៉ែន សំអន បានបញ្ជាក់ថា សម្រាប់កម្មវិធីទូរទស្សន៍អាចមើលថយក្រោយបានរហូតដល់៧ថ្ងៃ ឬយូរជាងនេះទៅទៀត អាស្រ័យទៅលើការកំណត់របស់អាជ្ញាធរស្ថាប័នមានសមត្ថកិច្ច និងក្រុមហ៊ុនប្រតិបត្តិករ ហើយឆ្លងតាមការប្រើប្រាស់សាកល្បងនេះ ក្រុមហ៊ុនក៏កាន់តែមានប្រជាប្រិយភាពទាក់ទាញបណ្តើរៗពីប្រជាពលរដ្ឋ ក៏ដូចជាក្រសួងស្ថាប័នមួយចំនួនទៀត ដូចជាការសហការគ្នារវាងក្រុមហ៊ុនជាមួយក្រសួងធម្មការ និងសាសនា រួមគ្នាបង្កើតប៉ុស្តិ៍សាសនា ក្នុងគោលបំណងលើកកម្ពស់ការប្រតិបត្តិសាសនាព្រះពុទ្ធ សហការគ្នាជាមួយក្រសួងការងារ និងបណ្ដុះបណ្ដាលវិជ្ជាជីវៈ បង្កើតកម្មវិធីបណ្ដុះបណ្ដាលវិជ្ជាជីវៈតាមបណ្ដាញអុិនធើរណេត ក្នុងគោលបំណងពង្រីកការបណ្ដុះបណ្ដាលតាមប្រព័ន្ធអុិនធើរណេត ឲ្យសមស្របតាមស្ថានភាពសង្គម ដើម្បីអភិវឌ្ឍន៍ធនធានមនុស្សនៅក្នុងព្រះរាជាណាចក្រកម្ពុជា ។
លោក ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន បានបញ្ជាក់ថា មូលហេតុចម្បងដែលនាំឲ្យមានការរៀបចំសិក្ខាសាលាស្ដីពី OTT នេះឡើង ដើម្បីចែករំលែកចំណេះដឹងទាក់ទងពីសារៈប្រយោជន៍នៃប្រព័ន្ធនេះផង និងចង់បានមតិយោបល់ខ្លះ ដែលអាចកើតមានជាយថាហេតុ ឬអាចត្រួតគ្នាអំពីសមត្ថកិច្ចដឹកនាំរបស់ក្រសួង ស្ថាប័នមួយចំនួន ។ការលេចចេញជារូបរាងរបស់សមិទ្ធផលថ្មីមួយនេះ គឺជាវិនិយោគជាទឹកប្រាក់ដ៏ធំរបស់ក្រុមហ៊ុន Super Net ដែលក្នុងនាមជាប្រតិបត្តិករផ្ដល់សេវាកម្មអុិនធើរណេត មានបណ្ដាញខ្សែកាបអុបទិកក្រោមដី៩៥ភាគរយ ទទួលបានអាជ្ញាប័ណ្ណពីក្រសួងប្រៃសណីយ៍ និងទូរគមនាគមន៍ អាជ្ញាប័ណ្ណទូរទស្សន៍ឌីជីថលឥតខ្សែតាមរលកសញ្ញា និងទូរទស្សន៍អុិនធើរណេតពីក្រសួងព័ត៌មាន ៕
ចែករំលែកព័តមាននេះ