ខេត្តត្បូងឃ្មុំ ៖ រថយន្តម៉ាកហាយឡិនឌ័រមួយគ្រឿងផ្ទុកឈើគ្រញូងពេញនោះត្រូវបានសមត្ថកិច្ចទម្លាយឲ្យដឹងនាព្រឹកថ្ងៃទី៣១ កក្កដានេះ ថា គឺជារបស់ឈ្មួញល្បីឈ្មោះម្នាក់ឈ្មោះលាប រស់នៅឃុំដារ ស្រុកមេមត់ ។
ឈើប្រណីតទាំងនោះមិនបានរងការខូចខាតទេ គឺគ្រាន់តែឆេះរថយន្តខ្ទេចប៉ុណ្ណោះនាពេលកន្លងមក ដែលបង្កការភ្ញាក់ផ្អើលក្បែរស្ពានស្អំ កាលពីវេលាម៉ោង៨ និង៣០នាទីព្រឹក ថ្ងៃទី២២ កក្កដា ២០១៥ ត្រង់ភូមិ៧មករា ឃុំដារ ស្រុកមេមត់។
លោកជួន ខឿន មេបញ្ជាការវរ១ដែលឈរជើងនៅក្បែរស្ពានស្អំប្រាប់ឲ្យដឹងនៅព្រឹកថ្ងៃខាងលើថា ក្នុងពេលដែលមានហេតុការណ៍ឆេះរថយន្តហាយឡែនឌ័រដឹកឈើនោះ រូបលោកមិនបាននៅកន្លែងនោះទេ ដោយបានសុំច្បាប់ចេញទៅព្យាបាលជំងឺនៅប្រទេសវៀតណាមបាត់ តែដោយឃើញមានហេតុការណ៍បែបនេះ មន្ត្រីក្រោមឱវាទរបស់លោកជាច្រើននាក់បានសស្រាក់សស្រាំនាំគ្នាដងទឹកទៅជះពន្លត់ភ្លើងដែលកំពុងតែឆេះ ។
លោកមេបញ្ជាការវរ១ឈរជើងក្បែរស្ពានស្អំបន្តថា រថយន្តនេះពិតជាមានដឹកឈើមែន តែត្រូវបានមនុស្សមួយក្រុមជញ្ជូនចេញពីរថយន្តបណ្តោះទៅកន្លែងសុវត្ថិភាពទាន់ពេលវេលាដោយមិនមានការពាក់ព័ន្ធទៅនឹងអង្គភាពរបស់លោកនោះទេ ហើយតាមការដឹងម្ចាស់ឈើឈ្មោះលាប នៅឃុំដារ ស្រុកមេមត់ ចំណែកថ្នាក់លើរបស់លោកក៏មិនឲ្យមន្ត្រីណាម្នាក់ពាក់ព័ន្ធនឹងការរកស៊ីជំនួញឈើប្រណីតដែរ ។
លោកសាន សាត នគរបាលចរាចរស្រុកមេមត់ប្រាប់ឲ្យដឹងថា រថយន្តម៉ាកហាយឡែនឌ័រនេះបានបើកកាត់តាមផ្លូវជាតិលេខ៧ ពេលដែលមកដល់ត្រង់ជីពាំងឃុំក្រែក ស្រុកពញាក្រែក គេបានឃើញផ្សែងហុយតិចៗ លុះពេលដែលបន្តដំណើរមកដល់ត្រង់មុខបន្ទាយទាហានស្អំ ផុតពីស្ពានបេតុងបានបន្តិចត្រូវបានគេស្រែកប្រាប់ ទើបឈប់រថយន្តអែបខាងមិនបានប៉ុន្មាននាទីផងភ្លើងក៏បានឆាបឆេះ បន្ទាប់មកផ្ទុះធុងហ្គាសប្រហែល២០នាទីទើបរលត់ទៅវិញ ហើយពេលដែលរូបលោកមកដល់មិនឃើញមានឈើប្រណិតនៅក្នុងរថយន្តនោះឡើយ ។
ឈ្មួញខាងលើនេះ នៅព្រឹកថ្ងៃទី៣១ កក្កដា មិនអាចសុំការបំភ្លឺបានទេ ព្រោះទូរស័ព្ទទាក់ទងមិនបាន៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ