ខេត្តមណ្ឌលគិរី ៖ លោក កែវ សុភត៌ អនុប្រធានព្រៃការពារមណ្ឌលគិរីឱ្យដឹងថា ត្រាក់ទ័រ១គ្រឿងរបស់ជនជាតិវៀតណាមដែលមានផ្ទុកឈើប្រភេទសុក្រំចំនួន៨កំណាត់ធំៗ ត្រូវបានបង្ក្រាបកាលពីថ្ងៃទី២៤ កក្កដា ត្រង់ចំណុចអូរណា ក្បែរច្រករបៀងប៉ុស្ដិ៍៥ ស្ថិតក្នុងឃុំក្រងតេះ ស្រុកពេជ្រាដា ។
លោកបន្តថា ក្រៅពីត្រាក់ទ័រ១គ្រឿងនេះ មន្ត្រីជំនាញដែលចុះទៅបង្ក្រាបក៏បានរកឃើញកន្ទុយរ៉ឺម៉ករបស់ត្រាក់ទ័រជនជាតិវៀតណាម៣គ្រឿងទៀតផងដែរ ប៉ុន្តែស្ថិតក្នុងតំបន់ស (ព្រំដែន) ដូច្នេះមិនអាចចូលទៅរឹបអូសយកមករក្សាទុកបានឡើយ ។ បច្ចុប្បន្ន ត្រាក់ទ័ររួមនឹងឈើ ត្រូវបានមន្ត្រីជំនាញនាំយកមករក្សាទុកនៅខណ្ឌរដ្ឋបាលព្រៃឈើមណ្ឌលគិរី ។
បើយោងតាមប្រភពពីមន្ត្រីរដ្ឋបាលព្រៃឈើមួយរូបបង្ហើបឱ្យដឹងថា ត្រាក់ទ័រដែលចូលមកដឹកឈើក្នុងទឹកដីខេត្តមណ្ឌលគិរីនេះ គឺអាចមានជាប់ពាក់ព័ន្ធជាមួយមន្ត្រីដែលមានតួនាទីគ្រប់គ្រងតាមបន្ទាត់ព្រំដែន ដែលខាងនគរបាលមានវរៈការពារព្រំដែនលេខ៣០៣ ចំណែកខាងយោធាមានខាងការពារព្រំដែនលេខ១០៣ ។
មានការកត់សម្គាល់ឃើញថា នៅតាមបន្ទាត់ព្រំដែនក្នុងស្រុកពេជ្រាដា មានបទល្មើសព្រៃឈើឆ្លងដែនទៅក្រៅប្រទេសយ៉ាងពេញបន្ទុក ប្រព្រឹត្តដោយជនជាតិវៀតណាម ហើយច្រករបៀងដែលកំពុងមានការនាំឈើចេញយ៉ាងគគ្រឹកគគ្រេងនោះ គឺច្រករបៀងប៉ុស្ដិ៍៥ ដែលមានមន្ត្រីនគរបាលឈ្មោះ នៀវ សារុន និងមន្ត្រីយោធាឈ្មោះ ស៊ឹម សំណាង ជាអ្នកគ្រប់គ្រង តែមិនដឹងថាមានការពាក់ព័ន្ធ ឬបែបណាទេ ប៉ុន្តែបើនិយាយពីតួនាទីភារកិច្ចគឺត្រូវតែជាអ្នកទទួលខុសត្រូវ ។
សូមបញ្ជាក់ថា នៅតំបន់ច្រករបៀងបុស្ដិ៍៤ និងប៉ុស្ដិ៍៥ ក៏តែងតែមានការបង្ក្រាបត្រាក់ទ័រដឹកឈើរបស់ជនជាតិវៀតណាមជាបន្តបន្ទាប់ដែរ ពីសំណាក់មន្ត្រីរដ្ឋបាលព្រៃឈើ តែនៅតំបន់នោះគឺនៅតែមានត្រាក់ទ័រវៀតណាមលួចចូលមកមិនចេះអស់ ។
ពាក់ព័ន្ធនឹងករណីនេះ លោក នៀវ សារុន និងលោក ស៊ឹម សំណាង មិនអាចទាក់ទងសុំការបំភ្លឺបានទេ ។ ចំណែកលោក អ៊ុំ សុវណ្ណ មេបញ្ជាការការពារព្រំដែនលេខ១០៣ បានឱ្យដឹងយ៉ាងខ្លីថា ត្រាក់ទ័ររួមជាមួយឈើទាំងនោះគឺមន្ត្រីរបស់លោកដើរល្បាតប្រទះឃើញនៅក្បែរច្រករបៀងប៉ុស្ដិ៍៤ ហើយលោកមិនបានបញ្ជាក់បន្ថែមទេ ដោយលោកបញ្ចប់ត្រឹមតែថារវល់ ។ រីឯលោក សៀន ស៊ីវន មេបញ្ជាការនគរបាលវរៈការពារព្រំដែនគោកលេខ៣០៣ មិនអាចទាក់ទងសុំការបំភ្លឺបានទេ ដោយការព្យាយាមទាក់ទងតាមរយៈទូរស័ព្ទ គ្រាន់តែប្រាប់ថាជាអ្នកយកព័ត៌ មាន លោកក៏ចុចទូរស័ព្ទបិទតែម្ដង ៕
ចែករំលែកព័តមាននេះ