ខេត្តរតនគិរី ៖ បុរសម្នាក់ជាកម្មករ និងជាអ្នកបើកឡានដឹកសម្ភារឱ្យស្តង់អេតចាយមួយកន្លែងត្រូវបានគេប្រទះឃើញស្លាប់ក្នុងបន្ទប់ទឹក សង្ស័យខ្យល់គរ ។ ហេតុការណ៍នេះបានបង្កការភ្ញាក់ផ្អើលកាលពីវេលាម៉ោង៤ និង៣០នាទីល្ងាច ថ្ងៃទី៣០ កក្កដា ២០១៥ ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង ។
ថៅកែស្តង់អេតចាយឈ្មោះ វិន ធីយ៉យ ភេទស្រី អាយុ៤៣ឆ្នាំ និងប្តីឈ្មោះ ង្វៀង យ៉ាងលីម អាយុ៤៥ឆ្នាំ ជាជនជាតិវៀតណាម បានប្រាប់ឱ្យដឹងថា ជនរងគ្រោះដែលស្លាប់ជាអ្នកបើកឡានដឹកអេតចាយ មានឈ្មោះ ព្រឹម ញឹប ភេទប្រុស អាយុ៣០ឆ្នាំ ។ មុនពេលដឹងថាស្លាប់ក្នុងបន្ទប់ទឹកនោះ គឺនៅម៉ោងប្រហែល២រសៀល គាត់ប្រាប់ជនរងគ្រោះឱ្យទៅប្រឡងប្តូរប័ណ្ណបើកបរ ។ បន្ទាប់ពីប្រាប់ហើយក៏បាត់រហូត គាត់ស្មានតែទៅប្រឡងប្តូរប័ណ្ណបើកបរ លុះដល់ម៉ោងជាង៤ទើបកម្មកររបស់គាត់ផ្សេងទៀតចូលបន្ទប់ទឹកឃើញទ្វារបិទ ក៏អើតមើលតាមប្រឡោះក្តារក៏ឃើញជនរងគ្រោះដេកស្តូក ទើបមានការភ្ញាក់ផ្អើលនាំគ្នាគាស់ទ្វារចូលទៅមើលឃើញស្លាប់បាត់ទៅហើយ ក៏រាយការណ៍ជូនសមត្ថកិច្ច ។
ម្ចាស់ស្តង់អេតចាយបានបន្តថា កម្មករដែលស្លាប់នេះមកធ្វើការជាមួយគាត់ជាង១០ឆ្នាំហើយ មិនដែលមានទំនាស់អ្វីជាមួយអ្នកណាទេ ស្រាប់តែដួលស្លាប់ក្នុងបន្ទប់ទឹក សង្ស័យតែខ្យល់គរ ព្រោះទើបតែបើកឡានដឹកអីវ៉ាន់មកដល់ ។
សមត្ថកិច្ចជំនាញបច្ចេកទេសបានធ្វើការត្រួតពិនិត្យជាក់ស្តែង ឃើញជនរងគ្រោះបែកពពុះមាត់ ក្អួតចេញឈាម ហើយមានបៀមខ្សែកដែកអីុណុកជាប់នឹងមាត់ទៀតផង ប៉ុន្តែសមត្ថកិច្ចមិនទាន់មានការសន្និដ្ឋាននៅឡើយទេ ដោយតម្កល់សពទុករងចាំត្រួតពិនិត្យនៅព្រឹកស្អែកបន្តទៀត ៕
ចែករំលែកព័តមាននេះ