ខេត្តព្រះសីហនុ ៖ បុរសម្នាក់បានស្លាប់នៅនឹងកន្លែង ឯម្នាក់ទៀតរងរបួសធ្ងន់ដោយសារជិះម៉ូតូបុករ៉ឺម៉កម៉ូតូដែលគេចតនៅចិញ្ចើមថ្នល់ ។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង៣ និង៣០នាទីរសៀល ថ្ងៃទី៣០ កក្កដា ២០១៥ នៅលើដងផ្លូវជាតិលេខ៣ ត្រង់ចំណុចភូមិទួល ឃុំទឹកល្អក់ ស្រុកព្រៃនប់ ខេត្តព្រះសីហនុ ។
ជនរងគ្រោះថ្នាក់ហេតុការណ៍នេះមាន ១-ឈ្មោះ វេ វ៉ាន់ ភេទប្រុស អាយុ៣៣ឆ្នាំ (ស្លាប់) ជាអ្នកបើកម៉ូតូ មុខរបរកម្មករ មានទីលំនៅភូមិកំពង់ចិន ឃុំទឹកថ្លា ស្រុកព្រៃនប់ ខេត្តព្រះសីហនុ និង ២-ឈ្មោះ ជួប ឌឿន ភេទប្រុស អាយុ៣៣ឆ្នាំ (រងរបួសធ្ងន់) មុខរបរកសិករ ជាអ្នករួមដំណើរ មានទីលំនៅដូចជនរងគ្រោះទី១ដែរ ។
ប្រភពពីកន្លែងកើតហេតុបានឱ្យដឹងថា មុនពេលកើតហេតុគេឃើញម៉ូតូ១គ្រឿង ម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០០៨ ពាក់ស្លាកលេខ ក្រ.ព្រះសីហនុ 1A-5269 បើកបរក្នុងទិសដៅពីខេត្តកំពត ទៅខេត្តព្រះសីហនុ លុះដល់ចំណុចកើតហេតុក៏បានជិះទៅបុកពីក្រោយរ៉ឺម៉កម៉ូតូម៉ាក SANGYANG 150 ពណ៌ស ពាក់លេខ ព្រះសីហនុ 1B-7703 ដែលចតនៅចិញ្ចើមថ្នាល់ខាងស្តាំដៃ បណ្តាលឱ្យអ្នកបើកបរស្លាប់ភ្លាមៗនៅនឹងកន្លែងកើតហេតុ ឯអ្នកជិះពិក្រោយរងរបួសធ្ងន់ ។ ប្រភពបានឱ្យដឹងទៀតថា ម្ចាស់រ៉ឺម៉កមានឈ្មោះ រី ក្តឹប ភេទប្រុស មុខរបរអ្នកបើករ៉ឺម៉កម៉ូតូ មានទីលំនៅកន្លែងកើតហេតុ ។
បច្ចុប្បន្នសពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ឯជនរងគ្រោះដែលរងរបួសធ្ងន់កំពុងសម្រាកព្យាបាលនៅគ្លីនិកឯកជនវាលរេញ ។ ចំពោះវត្ថុតាងម៉ូតូខូចខាតធ្ងន់ផ្នែកខាងមុខ និងរ៉ឺម៉កម៉ូតូខូចខាតស្រាល ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកព្រៃនប់រង់ចាំភាគីទាំងសងខាងមកដោះស្រាយ ៕
ចែករំលែកព័តមាននេះ