ខេត្តពោធិ៍សាត់ ៖ ឈើក្ដារជាច្រើនគំនរដែលឈ្មួញទុច្ចរិតប្រមូលទិញពីអ្នករកស៊ីកាប់ឈើខុសច្បាប់យកមកគរទុកក្នុងព្រៃនៅចំណុចរាំងខ្វាវ ស្ថិតក្នុងភូមិសាស្ត្រភូមិក្សេត្របូរី ឃុំសន្ទ្រែ ស្រុកភ្នំក្រវាញ ខេត្តពោធិ៍ សាត់ បានត្រូវកម្លាំងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃសហការជាមួយក្រុមគណៈបញ្ជាការឯកភាពខេត្តចុះទៅបង្ក្រាបបានទាន់ពេលវេលាកាលពីរសៀលថ្ងៃទី២៩ កក្កដា ២០១៥ ខណៈពេលដែលពួកឈ្មួញទុច្ចរិតទាំងនោះកំពុងរៀបដាក់លើរថយន្តបំរុងដឹកចេញ។
លោកវរៈសេនីយ៍ទោទូច យុទ្ធី នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃបានប្រាប់កោះសន្តិភាពឲ្យដឹងថា កាលពីថ្ងៃទី២៩ កក្កដា មានប្រជាពលរដ្ឋ និងភ្នាក់ងាររបស់លោកបានផ្ដល់ព័ត៌មានមកថានៅចំណុចរាំងខ្វាវស្ថិតក្នុងភូមិក្សេតបូរី ឃុំសន្ទ្រែ ស្រុកភ្នំក្រវាញ មានឈ្មួញកំពុងធ្វើសកម្មភាពប្រើកម្មករលើកឈើដាក់លើរថយន្តដំរីទឹកដើម្បីត្រៀមដឹកចេញនៅពេលយប់ទៅតាមទម្លាប់របស់គេកន្លងមក។
ភ្លាមៗនោះកម្លាំងរបស់លោកបានសហការជាមួយក្រុមគណៈបញ្ជាការឯកភាពខេត្ត និងស្រុកភ្នំក្រវាញចុះទៅដល់គោលដៅជាបន្ទាន់ ប៉ុន្តែពេលទៅដល់ពួកឈ្មួញទុច្ចរិត និងកម្មករលើកឈើទាំងនោះទំនងជាដឹងព័ត៌មានមុនបានគេចខ្លួនចូលព្រៃអស់បន្សល់ទុកតែឈើនៅលើរថយន្ត និងគំនរឈើមួយចំនួនទៀតនៅក្នុងព្រៃនោះ ហើយសមត្ថកិច្ចក៏បានយកទាំងរថយន្ត ទាំងឈើមកប្រគល់ឲ្យផ្នែករដ្ឋបាលព្រៃឈើស្រុកភ្នំក្រវាញតែម្ដង។
មន្ត្រីរដ្ឋបាលព្រៃឈើស្រុកភ្នំក្រវាញបានឲ្យដឹងថា បន្ទាប់ពីធ្វើការវាស់វែងរួច ឈើទាំងអស់នេះមានចំនួន១៥៣សន្លឹក ស្មើនឹង៥,២៩១ម៉ែត្រគូបជាប្រភេទឈើលេខ២សម្រាប់សង់ផ្ទះ។
ប្រភពព័ត៌មានពីអ្នកស្រុកនៅទីនោះបានលួចខ្សឹបប្រាប់ថា ឈើទាំងអស់នេះជារបស់មេឈ្មួញឈ្មោះវៃ និងឈ្មោះម៉ៅ ដែលរកស៊ីយូរមកហើយ ប៉ុន្តែមិនដែលមានសមត្ថកិច្ចណាហ៊ានក្អកទេ ព្រោះគេធ្លាប់និយាយថាបើសមត្ថកិច្ចខាងណាហ៊ានក្អក គេនឹងទិញថ្នាំក្អកឲ្យលេប ប៉ុន្តែពេលនេះកត្រូវកម្លាំងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃសហការជាមួយកម្លាំងគណៈបញ្ជាការឯកភាពខេត្ត និងស្រុកបង្ក្រាបបានតែម្ដងទំនងជាសមត្ថកិច្ចខាងលើមិនលេបថ្នាំក្អក ៕
ចែករំលែកព័តមាននេះ