ខេត្តកំពត ៖ ប្រជាពលរដ្ឋ៥គ្រួសារដែលមានលំនៅដ្ឋានខាងក្រោយផ្ទះសំណាក់យីហោ«រុងរឿង» ស្ថិតនៅក្នុងភូមិ១ឧសភា សង្កាត់កំពង់កណ្តាល ក្រុងកំពត បានដាក់ពាក្យប្តឹងទៅអាជ្ញាធរសង្កាត់ និងក្រុងឲ្យជួយដោះស្រាយពីបញ្ហាម្ចាស់ផ្ទះនេះបានចាក់សាប និងរៀបឥដ្ឋ បិទលើឌឿងហែម(ច្រកសុវត្ថិភាព)
ខេត្តកំពត ៖ ប្រជាពលរដ្ឋ៥គ្រួសារដែលមានលំនៅដ្ឋានខាងក្រោយផ្ទះសំណាក់យីហោ«រុងរឿង» ស្ថិតនៅក្នុងភូមិ១ឧសភា សង្កាត់កំពង់កណ្តាល ក្រុងកំពត បានដាក់ពាក្យប្តឹងទៅអាជ្ញាធរសង្កាត់ និងក្រុងឲ្យជួយដោះស្រាយពីបញ្ហាម្ចាស់ផ្ទះនេះបានចាក់សាប និងរៀបឥដ្ឋ បិទលើឌឿងហែម(ច្រកសុវត្ថិភាព)សាធារណៈនៅមុខផ្ទះរបស់គាត់បណ្តាលឲ្យបាត់ផ្លូវទឹកដែលមានពីមុនមក ។
យោងតាមខ្លឹមសារពាក្យបណ្តឹងរបស់ប្រជាពលរដ្ឋទាំង៥គ្រួសារដែលរងការប៉ះពាល់នេះ កាលពីថ្ងៃទី២១ ខែកក្កដា ឆ្នាំ២០១៥ តាមរយៈសង្កាត់កំពង់កណ្តាល ទៅអភិបាលក្រុងកំពត ដែលមានខ្លឹមសារថា យើងខ្ញុំជាប្រជាពលរដ្ឋដែលរងការប៉ះពាល់ចំនួន៥គ្រួសារបានកើតទុក្ខមិនសុខចិត្តសូមប្តឹងពីឈ្មោះ អាន លឹមកូយ ភេទប្រុស ជាម្ចាស់ផ្ទះសំណាក់«រុងរឿង»បានរៀបឥដ្ឋបាំងផ្លូវទឹកឌឿងហែម ព្រមទាំងចាក់សាបពីលើបិទផ្លូវទឹកឌឿងហែមសាធារណៈនៅមុខផ្ទះយើងខ្ញុំដើម្បីយកធ្វើជាកម្មសិទ្ឋិផ្ទាល់ខ្លួនលើប្រព័ន្ឋលូសាធារណៈ ។ ហើយសូមឲ្យអាជ្ញាធរក្រុង និងមន្ត្រីជំនាញចុះទៅពិនិត្យ និងដោះស្រាយ ។
ក្រោយពីដាក់ពាក្យបណ្តឹង គេឃើញក្រុមការងាររបស់ក្រុងបានចុះទៅពិនិត្យ និងឲ្យផ្អាកការសាងសង់ផងដែរ ប៉ុន្តែអ្វីដែលម្ចាស់ផ្ទះសំណាក់បានធ្វើឲ្យប៉ះពាល់លើប្រព័ន្ឋលូដូចជារៀបឥដ្ឋ និងចាក់សាបលើប្រព័ន្ឋលូសាធារណៈនោះ គេពុំឃើញក្រុមការងារបស់ក្រុងដែលចុះទៅពិនិត្យមានវិធានការឲ្យរុះរើនោះទេ ។ ហើយនៅថ្ងៃទី៣០ កក្កដា ២០១៥នេះ ស្រាប់តែម្ចាស់ផ្ទះសំណាក់ខាងលើបានជួលជាងផ្សារមកសាងសង់បន្ថែមត្រង់កន្លែងហាមឃាត់ខាងលើ ទើបប្រជាពលរដ្ឋទាំង៥គ្រួសារមានប្រតិកម្មឡើងម្តងទៀត ។
ជុំវិញការចោទប្រកាន់ពីប្រជាពលរដ្ឋទាំង៥គ្រួសារខាងលើ ត្រូវបានឈ្មោះ អាន លឹមកូយ ម្ចាស់ផ្ទះសំណាក់រុងរឿងអះអាងប្រាប់អ្នកយកព័ត៌មានថា ពីមុនមកដីនៅចំណុចខាងក្រោយផ្ទះសំណាក់ខ្លួនក៏ជាដីឌឿងហែមដែរ ហើយអ្នកដែលមករស់នៅចំណុចនេះសុទ្ឋតែសង់ផ្ទះលើផ្លូវឌឿងហែមទាំងអស់ ប៉ុន្តែពេលខ្លួនរៀបឥដ្ឋលើឌឿងហែមនេះដោយមានពាក្យប្តឹងពីប្រជាពលរដ្ឋប៉ុន្មានគ្រួសារនៅខាងក្រោយនេះ អាជ្ញាធរឲ្យផ្អាក ខ្លួនក៏បានផ្អាកអស់មួយរយៈដែរ ប៉ុន្តែដោយរង់ចាំការដោះស្រាយយូរ ហើយធាតុអាកាសក្តៅពេក ខ្លួនក៏ជួលជាងឲ្យមកតយ៉ាកបន្តិចដើម្បីហាលសំលៀកបំពាក់សិន ចាំថ្ងៃក្រោយអាជ្ញាធរចុះមកពិនិត្យថា ត្រូវឲ្យវាយចោលវិញ ខ្លួននឹងវាយចោលតាមបញ្ជារបស់អាជ្ញាធរ ។
ជុំវិញបញ្ហាខាងលើ នៅវេលាម៉ោង១១ និង៤៥នាទីព្រឹក ថ្ងៃទី៣០ កក្កដា ២០១៥នេះ «កោះសន្តិភាព»បានភ្ជាប់ទូរសព្ទ័ទៅលោក នាក់ សុវណ្ណរី អភិបាលក្រុងកំពត ដើម្បីសុំការស្រាយបំភ្លឺ ទូរសព្ទ័រោទិ៍តែគ្មានមនុស្សលើក ។ ចំណែកលោក បេង សំណាង ប្រធានភូមិបាលក្រុង មិនបានបកស្រាយបំភ្លឺបញ្ហាខាងលើទេ ដោយលោកប្រាប់ភ្នាក់ងារ«កោះសន្តិភាព»ថា លោកកំពុងជាប់ប្រជុំនាព្រឹកថ្ងៃទី៣០ កក្កដា ២០១៥នេះ ។
បញ្ជាក់ ៖ នៅវេលាម៉ោង១២ និង១៥នាទីថ្ងៃត្រង់ថ្ងៃដដែល លោក នាក់ សុវណ្ណរី អភិបាលក្រុងកំពតបានទូរស័ព្ទមកអ្នកយកព័ត៌មាន«កោះសន្តិភាព»វិញ ដោយប្រាប់ថា បញ្ហាការសាងសង់សំណង់អ្វីមួយដែលប៉ះពាល់ដល់ច្រកសុវត្ថិភាព គឺក្រុងមិនអាចអនុញ្ញាតឲ្យធ្វើបានឡើយ មិនថាតែម្ចាស់ផ្ទះសំណាក់ដែលកំពុងរំលោភសាងសង់អ្វីមួយលើច្រកសុវត្ថិភាពនេះទេ គ្រប់ច្រកសុវត្ថិភាពទាំងអស់ខេត្តបានដាក់ផែនការឲ្យក្រុងចុះត្រួតពិនិត្យឡើងវិញទាំងអស់ គឺមិនអាចអនុញ្ញាតឲ្យបុគ្គលណាម្នាក់សាងសង់សំណង់អ្វីមួយលើកច្រកសុវត្ថិភាពដាច់ខាត គឺទុកសម្រាប់មានហានិភយ័កើតឡើង យើងងាយស្រួលក្នុងការជួយសង្គ្រោះទាន់ពេលវេលា ។ ហើយអាជ្ញាធរក៏មិនចង់ឃើញបងប្អូនដឹងហើយនៅតែធ្វើ រួចត្រូវអាជ្ញាធរវាយចោលនោះទេ ។ បញ្ហាម្ចាស់ផ្ទះសំណាក់នៅតែធ្វើ លោកនឹងចេញលិខិតមួយទៀតឲ្យម្ចាស់ផ្ទះសំណាក់ខាងលើផ្អាកការសាងសង់ ៕
ចែករំលែកព័តមាននេះ