ខេត្តរតនគីរី ៖ គ្រឹះស្ថានលក់គ្រឿងសំណង់គេចពន្ធចំនួនពីរកន្លែងម្ចាស់តែមួយ ដែលមានស្លាកយីហោពិសិដ្ឋ និងសុវណ្ណ មានទីតាំងស្ថិតនៅភូមិថ្មី សង្កាត់ឡាបានសៀក ក្រុងបានលុងត្រូវបានសាខាពន្ធដាខេត្តរតនគីរី សហការជាមួយនគរបាលប្រឆាំងបទល្មើសសេដ្ឋកិច្ចខេត្តចុះបង្ក្រាបដើម្បីឱ្យម្ចាស់ចូលខ្លួនមកបង់ពន្ធ។
សកម្មភាពចុះបង្ក្រាបនេះបានធ្វើឡើងនៅព្រឹកថ្ងៃទី៣០ កក្កដា ២០១៥ នេះ ។ ទីតាំងទាំងពីរខាងលើមានម្ចាស់តែមួយ ដែលអតីតទីតាំងនេះមានស្លាកយីហោ លីធាវី បានប្រកបមុខរបរលក់គ្រឿងសំណង់ជាយូរឆ្នាំមកហើយ ក្រោយមកដើម្បីគេចវេសពីការបង់ពន្ធជូនរដ្ឋ ដែលលោកមិនបានបង់ពន្ធបីខែមកហើយនោះ ម្ចាស់ឈ្មោះ លីធាវី នេះ បានដូរស្លាកយីហោចាស់ដាក់យីហោថ្មីវិញ ដើម្បីបន្លំភ្នែកសមត្ថកិច្ចជំនាញថាឈ្មោះលីធាវី ឈប់ធ្វើអាជីវកម្មហើយ។
ប្រធានសាខាពន្ធដាខេត្តរតនគីរី លោក ទុយ ស៊ីវិល បានឱ្យដឹងថា លោកបានដាក់កម្លាំងអង្កេតតាមដានសកម្មភាព លីធាវី ដែលមិនបានបង់ពន្ធជូនរដ្ឋ ចំនួនបីខែមកហើយ តែគាត់ដកស្លាកយីហោចាស់ចេញដើម្បីជាលេសថាផ្អាកធ្វើអាជីវកម្ម ដោយដំឡើងស្លាកយីហោថ្មី ដែលមិនទាន់ចុះបញ្ជី ឬមិនមានច្បាប់អនុញ្ញាតដើម្បីបិទបាំងស្លាកយីហោចាស់ ក៏ប៉ុន្តែនៅប្រើវិក័យប័ត្រលក់ឱ្យអតិភិជនឈ្មោះ លីធាវី ដដែល។
លោកបានបន្តថា បច្ចុប្បន្នកម្លាំងលោក និងកម្លាំងនគបាលបានរឹបអូសយករថយន្តយីឌុបបីគ្រឿងដែលស្តុកដោយទំនិញគ្រឿងសំណង់ទៅរក្សាទុកបណ្ដោះអាសន្ននៅស្នងការដើម្បីឱ្យម្ចាស់អាជីវកម្មចូលខ្លួនមកបំពេញសំណុំបែបបទធ្វើអាជីវកម្ម និងបង់ពន្ធជំពាក់បីខែ ដែលមិនទាន់បានបង់ជូនរដ្ឋនោះឱ្យបានត្រឹមត្រូវតាមច្បាប់ឡើងវិញ។
លោកបានបញ្ជាក់ទៀតថា អាជីវកម្មដែលគេចពន្ធ មិនបានបង់ពន្ធជូនរដ្ឋនៅមានច្រើនកន្លែងទៀតដែលអាងសែ អាងខ្នង ប៉ុន្តែលោកនឹងធ្វើសកម្មភាពបង្ក្រាបបន្តបន្ទាប់ទៀត លោកមិនខ្លាចអ្នកអាងសែ អាងខ្នងទាំងនោះទេ៕
ចែករំលែកព័តមាននេះ