រាជធានីភ្នំពេញ ៖ ជនជាតិកូរ៉េស្រវឹងស្រាបើករថយន្តលឿនដូចហោះទៅបុកដើមម៉ៃសាក់វិលខ្ញាល់មួយជុំក្រឡាប់បះជើងទ្រមេឃកៀបអ្នកបើករថយន្តរងរបួសធ្ងន់ និងអ្នករួមដំណើរជាមួយរងរបួសស្រាល។ហេតុការណ៍នេះបានកើតឡើងកាលពីវេលាម៉ោង៣ និង១០នាទីទៀបភ្លឺ ថ្ងៃទី៣០ កក្កដា តាមបណ្តោយផ្លូវ៥៩៩កែងនឹងផ្លូវ៣១៥ មុខភោជនីយដ្ឋានស៊ូគា សង្កាត់បឹងកក់២ ខណ្ឌទួលគោក។
សាក្សីដែលនៅកន្លែងកើតហេតុបានឲ្យដឹងថា មុនពេលកើតហេតុ គាត់បានឃើញរថយន្តម៉ាក RAV4 ពណ័ទឹកប្រាក់ ពាក់ស្លាកលេខភ្នំពេញ2S-8190 ជិះ២នាក់ជាជនជាតិកូរ៉េ បើកបរតាមផ្លូវលេខ៥៩៩ ក្នុងទិសដៅពីកើតទៅលិចក្នុងស្ថានភាពស្រវឹងបើកលឿនដូចហោះ ពេលមកដល់ចំណុចផ្លូវបែកជាបួន រថយន្តបើកលឿនពេកបួងចង្កូតមិនទាន់បានបើកទៅបុកដើមម៉ៃសាក់ពេញទំហឹងធ្វើឲ្យរថយន្តវិលខ្ញាល់មួយជុំក្រឡាប់បះជើងទ្រមេឃធ្វើឲ្យអ្នកជិះក្នុងរថយន្តកៀបជាប់ក្នុងរថយន្តបណ្តាលឲ្យអ្នកបើកបរបែកក្បាលសន្លប់ស្តូកស្តឹង ចំណែកអ្នករួមដំណើរជាមួយរងរបួសស្រាល រីឯដើមម៉ៃសាក់មិនបានបាក់ទេគ្រាន់តែរបកសំបកនិងបាក់មែកតូចៗ ។
ក្រោយពេលកើតហេតុមានជនឆ្លៀតឱកាសចូលទៅជួយវាយកញ្ចក់រថយន្តចាប់អូសជនរងគ្រោះចេញពីក្នុងរថយន្ត ហើយលួចទូរស័ព្ទអាយហ្វូនមួយគ្រឿងរបស់ជនជាតិកូរ៉េរួចហើយគេចខ្លួន ។ ជនរងគ្រោះត្រូវបានរថយន្តសង្គ្រោះដឹកយកទៅព្យាបាលនៅគ្លីនិកឯកជន ចំណែករថយន្តបង្កខូចខាតស្ទើរទាំងស្រុងត្រូវបានសមត្ថកិច្ចវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោក ៕
ចែករំលែកព័តមាននេះ