ខេត្តសៀមរាប ៖ ស្រី្តខ្មែរ២នាក់មានកំណើតនៅ ខេត្តព្រៃវែង ដែលត្រូវបានមេខ្យល់នាំយកទៅរៀបការជាមួយបុរសជនជាតិចិននៅខេត្តក្វាងចូវ ត្រូវបានបញ្ជូនត្រឡប់មកដល់ប្រទេសកម្ពុជាហើយតាមជើងយន្តហោះ K6 659 ដោយចេញពីទីក្រុងក្វាងចូវ
ខេត្តសៀមរាប ៖ ស្រី្តខ្មែរ២នាក់មានកំណើតនៅ ខេត្តព្រៃវែង ដែលត្រូវបានមេខ្យល់នាំយកទៅរៀបការជាមួយបុរសជនជាតិចិននៅខេត្តក្វាងចូវ ត្រូវបានបញ្ជូនត្រឡប់មកដល់ប្រទេសកម្ពុជាហើយតាមជើងយន្តហោះ K6 659 ដោយចេញពីទីក្រុងក្វាងចូវ នៅវេលាម៉ោង១និង៣០នាទី ម៉ោងនៅប្រទេសចិន ។
ពួកគេបានមកដល់អាកាសយានដ្ឋានអន្តរជាតិសៀមរាបនៅវេលាម៉ោង២និង៥០ ថ្ងៃទី២៨ កក្កដា ត្រូវបាននគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋានខេត្តសៀមរាប ទៅទទួលយកចេញពីក្នុងព្រលានយន្តហោះអន្តរជាតិសៀមរាប រួចនាំស្ត្រីទាំង២នាក់ជាជនរងគ្រោះមកកាន់ការិយាល័យដើម្បីសាកសួរ ។
ការមកដល់ប្រទេសកំណើតវិញរបស់ស្រី្តខ្មែររងគ្រោះទាំង២នាក់នេះ ត្រូវបានលោក វរសេនីយត្រី ឆាយ ហាក់ឡុង នាយរងការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តសៀមរាប ទៅទទួលយក និងនាំសាមីខ្លួនមកកាន់ការិយាល័យដើម្បីសាកសួរ និងកសាងសំណុំរឿង បញ្ជូនទៅមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តអនុវត្តតាមនីតិវិធី ដើម្បីប្រគល់ឲ្យក្រុមគ្រួសារមកទទួលយកទៅជួបជុំក្រុមគ្រួសារវិញ ។
បើតាមការរៀបរាប់របស់ស្ត្រីរងគ្រោះឈ្មោះ វង្ស ស្រីតូច អាយុ២០ឆ្នាំ ជាកម្មកររោងចក្រនៅភ្នំពេញ មានស្រុកកំណើតនៅខេត្តព្រៃវែងបានប្រាប់សមត្ថកិច្ចឲ្យដឹងថា ខ្លួនបានចាកចេញទៅប្រទេសចិន តាមអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី១៨ មេសា ឆ្នាំ២០១២ ទៅដល់គោលដៅនៃប្រទេសចិននៅយប់ថ្ងៃទី១៨ មេសា ឆ្នាំ២០១២ ។ ស្រី្តរងគ្រោះបានរៀបរាប់ប្រាប់សមត្ថកិច្ចបន្តថា ដំបូងបានស្គាល់ស្ត្រីចំណាស់ម្នាក់ឈ្មោះអ៊ីរ៉ា ដែលរស់នៅស្រុកកំណើតជិតគ្នា ហើយបានប្រាប់ថា តើប្អូនមានចំណាប់អារម្មណ៍ចង់រៀបការទៅនៅស្រុកចិនដែរឬទេ ? ព្រោះគេមានលុយ ពេលនោះនាងខ្ញុំក៏បានប្រាប់ឲ្យទៅជួបម្តាយនាង ។ បន្ទាប់មកស្ត្រីជាមេខ្យល់នោះក៏ឲ្យនាងទៅដើរលេងជាមួយមិត្តភក្តិម្នាក់ និងមានជនជាតិចិនរួមដំណើរ ។ ក្នុងការដើរលេងជាមួយមេខ្យល់នោះផងដែរ មេខ្យល់បានឲ្យនាងថតរូបម្នាក់ឯងនៅកោះពេជ្រ ប្រាប់ថាយករូបថតឲ្យបុរសជាជនជាតិចិនមើល ។
ស្ត្រីរងគ្រោះបានបន្តទៀតថា ក្រោយពីថតរូបនិងប្រាប់ម្តាយរួចក៏យល់ព្រមជាមួយមេខ្យល់ឈ្មោះអ៊ីរ៉ានោះ ហើយគាត់ក៏ឡើងមកភ្នំពេញជាមួយនាងឲ្យទៅធ្វើឯកសារដូចជា ប៉ាស្ព័រ, សំបុត្រយន្តហោះ និងចំណាយផ្សេងៗគាត់ជាអ្នកចេញទាំងអស់ ហើយគាត់ឲ្យនាងចំនួន៣០០ដុល្លារដើម្បីយកទៅឲ្យម្តាយនាងនៅឯស្រុក ។ ស្ត្រីរងគ្រោះបន្ថែមថា ពេលទៅដល់បុរសជាជនជាតិចិនក៏មកទទួលនាងខ្ញុំពីចំណតយន្តហោះឡើងរថយន្តទៅអូតែលជាមួយគាត់តែម្តង ។ ស្រី្តរងគ្រោះបាននិយាយបន្តទៀតថា ពេលចេញពីអូតែលគាត់នាំនាងខ្ញុំទៅផ្ទះរបស់គាត់នៅខេត្តក្វាងចូវ ក៏រស់នៅជាមួយគ្នារហូតបានកូនប្រុសមួយអាយុជាង២ឆ្នាំ ហើយប្តីរបស់ខ្ញុំឈ្មោះ ចាង យីង អាយុ៤២ឆ្នាំ បានចុះអ៊ីតាស៊ីវិលជាមួយនាងខ្ញុំតាមពាក្យរបស់មេខ្យល់ ។ នាងនិយាយថា ការរស់នៅក្រុមគ្រួសារខាងប្តីបានធ្វើបាបនាងខ្ញុំមិនឲ្យហូបចុកគ្រប់គ្រាន់ និងធ្វើបាបផ្លូវចិត្តនាងថែមទៀត ។ ស្ត្រីរងគ្រោះបានបញ្ជាក់ទៀតថា ទីបំផុតក៏ដាច់ចិត្តលួចរត់ចេញពីផ្ទះទាំងព្រឹកនៅថ្ងៃទី២៥ ខែមិថុនា ឆ្នាំ២០១៥ ជិះរថយន្តក្រុងអស់រយៈពេល១យប់ទើបដល់អគ្គកុងស៊ុលកម្ពុជាប្រចាំនៅទីក្រុងក្វាងចូវ នៃប្រទេសចិន ដោយខ្លួនឯង ហើយសម្រាកនៅទីនោះបាន១ខែ២ថ្ងៃ ។
ដោយមានការជួយជ្រោមជ្រែងអន្តរាគមន៍ពីសំណាក់អគ្គកុងស៊ុលកម្ពុជាប្រចាំនៅទីក្រុងក្វាងចូវ ជាចុងបញ្ចប់ ក៏ត្រូវបានមកដល់ប្រទេសកម្ពុជាវិញ នារសៀលថ្ងៃទី២៨ ខែកក្កដាឆ្នាំ២០១៥នេះ ។
ចំណែកស្ត្រីម្នាក់ទៀតឈ្មោះ ស្រុន ម៉ុម អាយុ២១ឆ្នាំ ជាកម្មកររោងចក្រមានស្រុកកំណើតភូមិសំបួរ ឃុំកំពង់ប្រាំង ស្រុកពារាំង ខេត្តព្រៃវែង បានប្រាប់សមត្ថកិច្ចឲ្យដឹងដែរ
ថា នាងបានចាកចេញពីស្រុកកំណើតតាមអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី២៣ ខែមេសា ឆ្នាំ២០១១ទៅដល់គោលដៅគឺប្រទេសចិន នៅយប់ថ្ងៃទី២៣ខែមេសា ឆ្នាំ២០១១។ ស្រី្តរងគ្រោះបានរៀបរាប់ប្រាប់សមត្ថកិច្ចបន្តថា ដំបូងបានស្គាល់ស្ត្រីចំណាស់ម្នាក់ជាមេខ្យល់ឈ្មោះ សុ មៀនដែលរស់នៅស្រុកកំណើតជិតគ្នាបានប្រាប់ថា នាងមានចំណាប់អារម្មណ៍ចង់រៀបការទៅនៅស្រុកចិនដែរឬទេ ? ហើយនាងក៏មកផ្ទះប្រាប់ម្តាយថា មានគេឲ្យរៀបការនៅស្រុកចិន ពេលនោះម្តាយនាងក៏យល់ព្រម ។ បន្ទាប់មកនាងក៏ឡើងមកភ្នំពេញជួបជាមួយមេខ្យល់នោះឲ្យទៅថតរូបនៅផ្ទះសំណាក់ក្បែរវត្តភ្នំដើម្បីទុកឲ្យបុរសជនជាតិចិនមើល រួចនាងក៏ជិះម៉ូតូឌុបទៅកន្លែងធ្វើការវិញ។ ស្ត្រីរងគ្រោះបានបន្តទៀតថា ក្រោយពីថតរូប មេខ្យល់ឈ្មោះសុមៀននោះ ក៏នាំឲ្យទៅធ្វើឯកសារដូចជាប៉ាស្ព័រ, សំបុត្រយន្តហោះនិងចំណាយផ្សេងៗទាំងអស់គាត់ជាអ្នកចេញ ហើយគាត់ឲ្យនាងខ្ញុំចំនួន៥០០ដុល្លារដើម្បីយកទៅឲ្យម្តាយនាងនៅឯស្រុក ។
ស្ត្រីរងគ្រោះបន្ថែមថា ពេលចុះពីយន្តហោះមាន២នាក់ប្តីប្រពន្ធជាមេខ្យល់ជាជនជាតិចិនក៏មកទទួលនាងពីចំណតយន្តហោះជិះរថយន្តជាមួយគាត់ទៅជួបបុរសជាប្តីនោះឲ្យស្គាល់នៅកន្លែងធ្វើការ ហើយ២នាក់ប្តីប្រពន្ធនាំមករស់នៅផ្ទះរបស់គាត់បាន៣ខែ បន្ទាប់មកទើបធ្វើសំបុត្រអាពាពិពាហ៍ឲ្យនាងជាមួយប្តីសព្វថ្ងៃ ។ ស្រី្តរងគ្រោះបាននិយាយបន្តទៀតថា មេខ្យល់បាននាំនាងទៅផ្ទះរបស់ប្តីនៅខេត្តក្វាងចូវ នៃប្រទេសចិន ក៏រស់នៅជាមួយគ្នាបានជាង៤ឆ្នាំបានកូនស្រីមួយអាយុជាង២ឆ្នាំ ។ ប្តីរបស់នាងឈ្មោះ ថាំង យ៉ុងពីង អាយុ៣៥ឆ្នាំ មានមុខរបរធ្វើនំប៉ាវលក់ ប៉ុន្តែក្រុមគ្រួសារខាងប្តីបានធ្វើបាបនាងមិនឲ្យហូបចុកគ្រប់គ្រាន់និងធ្វើបាបផ្លូវចិត្តដូចជា យកប៉ាស្ទ័រលាក់ទុកព្រមទាំងឪពុកក្មេក, បងថ្លៃនាងក៏ធ្វើបាបថែមទៀត ។
ស្ត្រីរងគ្រោះបានបញ្ជាក់ទៀតថា ទីបំផុតនាងក៏ដាច់ចិត្តលួចរត់ចេញពីផ្ទះទាំងព្រឹកនៅថ្ងៃទី២៥ ខែមិថុនា ឆ្នាំ២០១៥ តាមរថយន្តក្រុងអស់រយៈពេល១យប់ទើបដល់អគ្គកុងស៊ុលកម្ពុជាប្រចាំនៅទីក្រុងក្វាងចូវ នៃប្រទេសចិន ដោយខ្លួនឯង ហើយសម្រាកនៅទីនោះបាន១ខែ២ថ្ងៃ ។ ដោយមានការជួយជ្រោមជ្រែងអន្តរាគមន៍ពីសំណាក់អគ្គកុងស៊ុលកម្ពុជា ប្រចាំនៅទីក្រុងក្វាងចូវ ជាចុងបញ្ចប់ ក៏ត្រូវបានមកដល់ប្រទេសកម្ពុជាវិញ នារសៀលថ្ងៃទី២៨ ខែកក្កដា ឆ្នាំ២០១៥ នេះ ៕
ចែករំលែកព័តមាននេះ