ខេត្តកំពង់ធំ ៖ មន្ត្រីយោធា២រូបត្រូវបានលោកព្រះរាជអាជ្ញារង ដឹកនាំកម្លាំងសមត្ថកិច្ចចម្រុះមាន អាវុធហត្ថ និងនគរបាលមូលដ្ឋាន ធ្វើការឃាត់ខ្លួនកាលពីថ្ងៃទី២៨ កក្កដា ២០ ១៥ ខណៈមន្ត្រីទាំង២រូបខាងលើកំពុងធ្វើសកម្មភាពឈូសឆាយដីព្រៃរាប់សិបហិកតា នៅក្នុងភូមិសាស្ត្រឃុំតាំងក្រសៅ ស្រុកប្រាសាទសំបូរ ខេត្តកំពង់ធំ ។
ប្រភពពីជុំវិញកន្លែងកើតហេតុបានឲ្យដឹងថា កន្លងមកមន្ត្រីយោធាឈ្មោះ ឌី វ៉ា អាយុ៤៨ឆ្នាំ មកពីអង្គភាពបញ្ជាការដ្ឋានវិស្វកម្ម និងឈ្មោះ ឆោម ឆវ័ន្ត មកពីអង្គភាពកងពលតូច៥២ បានធ្វើសកម្មភាពឈូសឆាយដីព្រៃក្នុងតំបន់ខាងលើយ៉ាងអនាធិបតេយ្យ ដោយអាងខ្លួនជាកម្លាំងយោធាមានអាវុធកាន់ ។ មន្ត្រីយោធាទាំង២រូបខាងលើនេះបានប្រើអំណាចខ្លួនឈូសឆាយព្រៃរានយកដីដោយគ្មានញញើត ទោះបីជាមន្ត្រីជំនាញចុះហាមឃាត់ក៏ដោយ ។
ដោយសារការឈូសឆាយដីព្រៃយកគ្មានការអនុញ្ញាតនេះហើយ ទើបនៅថ្ងៃទី២៨ កក្កដា ២០១៥ លោកព្រះរាជអាជ្ញារង សាយ ណូរ៉ា បានដឹកនាំកម្លាំងសមត្ថកិច្ចចម្រុះចុះឃាត់ខ្លួន និងឃាត់គ្រឿងចក្រប្រភេទអាប៊ុល១គ្រឿង, រថយន្តម៉ាក Mitsubishi ១គ្រឿង, វិទ្យុទាក់ទង១គ្រឿង និងអាវុធខ្លីម៉ាក កា៥៤ ពីរដើម ដែលក្នុងនោះ១ដើមគ្មានលិខិតប្រើប្រាស់ ។
ក្រោយពីឃាត់ខ្លួនមន្ត្រីយោធាទាំង២រូបរួចមក សមត្ថកិច្ចក៏បាននាំខ្លួនមកសាកសួរនៅសាលាដំបូងខេត្តកំពង់ធំ ។
គួររំលឹកថា ការប្រើអំណាចជាយោធាមានបណ្ដាស័ក្តិយកគ្រឿងចក្រមកឈូសឆាយដីព្រៃយ៉ាងអនាធិបតេយ្យរបស់មន្ត្រីយោធាទាំង២រូបខាងលើបានធ្វើឲ្យមហាជនមានការចាប់អារម្មណ៍យ៉ាងខ្លាំង ព្រោះថា កន្លងមកមន្ត្រីយោធាទាំង២រូបនេះមិនត្រឹមតែប្រើប្រាស់អំណាចខ្លួនឯងបំពានដីរដ្ឋទេ គឺថែមទាំងប្រើប្រាស់ឈ្មោះមេកើយជាអ្នកធំ មកអាងយ៉ាងវាទព្រៃ ដើម្បីធ្វើការឈូសឆាយយកដីធ្វើជាកម្មសិទ្ធិទៀតផង ៕
ចែករំលែកព័តមាននេះ