រាជធានីភ្នំពេញ ៖ នាល្ងាចថ្ងៃទី២៩ ខែកក្កដា ឆ្នាំ២០១៥នេះ អាជ្ញាធរខណ្ឌមានជ័យ ដឹកនាំដោយលោក ឌី រ័ត្នខេមរុណ អភិបាលរង នៃគណៈអភិបាលខណ្ឌមានជ័យ និងមានការចូលរួមពីមន្ត្រីទេសចរណ៍ មន្ត្រីការិយាល័យភូមិបាល បានចុះត្រួតពិនិត្យស្តង់ដារបច្ចេកទេសទីតាំងក្លិបកម្សាន្តចំនួន២កន្លែងនៅក្នុងមូលដ្ឋានរបស់ខ្លួន ដែលទី១គឺក្លិបកម្សាន្តយីហោ «Key Club» និងទី២ «សប្បាយក្លឹប» ដែលមានទីតាំងស្ថិតតាមបណ្តោយផ្លូវជាតិលេខ២ ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
លោក ឌី រ័ត្នខេមរុណ អភិបាលរងខណ្ឌមានជ័យបានមានប្រសាសន៍ឱ្យដឹងថា ការចុះមកនេះគឺអាជ្ញាធរខណ្ឌត្រូវការតាមដានឡើងវិញចំពោះសណ្ឋានរៀបចំនៃទីតាំងក្លិបកម្សាន្តទាំងមូល ដោយធ្វើការត្រួតពិនិត្រទៅលើបច្ចេកទេសបំពាក់គ្រឿងអេឡិចត្រូនិចគ្រប់ប្រភេទ ធុងបាស់ធំៗបំពងសម្លេងប៉ះពាល់ដល់ការរស់នៅរបស់ប្រជាពលរដ្ឋជិតខាងនាពេលរាត្រី និងម្យ៉ាងវិញទៀតដើម្បីធ្វើការតាមដានចំពោះទង្វើអសន្តិសុខ ដូចជាការវាយ កាប់ ចាក់សម្លាប់គ្នា ក្រោយពេលផឹកស៊ីចេញពីក្លិប និងអំពើល្មើសច្បាប់មួយចំនួនទៀត ដូចជាបញ្ហាគ្រឿងញៀនជាដើម ដែលជនមួយចំនួនចូលចិត្តយកកន្លែងកម្សាន្តដែលពោរពេញទៅដោយភាពវក់វីររញ៉េរញ៉ៃបែបនេះជាកន្លែងសម្រាប់ជួញដូរ ។ ដូច្នេះហើយទើបអាជ្ញាធរខណ្ឌមានជ័យចាប់ផ្តើមវិធានការចុះត្រួតពិនិត្រ ដើម្បីបង្កាសកម្មភាពបែបនេះមិនឱ្យកើតមាននៅក្នុងមូលដ្ឋានជាដាច់ខាត ។
ក្នុងការចុះត្រួតពិនិត្យខាងលើនេះដែរ លោកអភិបាលរងខណ្ឌក៏បានធ្វើការណែនាំតម្រូវឱ្យម្ចាស់អាជីវកម្មក្លិបកម្សាន្តត្រូវបន្ថែមច្រកចេញចូលរបស់ខ្លួនបន្ថែមទៀត សម្រាប់ភ្លៀវធ្វើការជម្លៀសខ្លួនពេលមានហានិភ័យអ្វីមួយ ដែលអាចកើតឡើងជាយថាហេតុ ។ ទីតាំងនីមួយៗត្រូវថែមបំពង់ស្រូបផ្សែងបន្ថែមទៀត ព្រោះលក្ខណៈទីតាំងក្លិប ក្រោយការពិនិត្យហើយនោះឃើញថា មិនមានខ្យល់ចេញចូលគ្រប់គ្រាន់ឡើយសម្រាប់ភ្លៀវដែលចូលទៅរាំលេងកម្សាន្តដកដង្ហើម ។ ត្រូវបំពាក់បំពង់ពន្លត់អគ្គិភ័យឱ្យបានគ្រប់គ្រាន់ ចៀសវៀងមានករណីអគ្គិភ័យអាចកើតឡើងបានក្នុងករណីណាមួយ និងម្យ៉ាងទៀតលោកអភិបាលរងបានស្នើឱ្យម្ចាស់ទីតាំងទាំង២ ត្រូវបន្ថយសម្លេងបាស់របស់ខ្លួនចាប់ពីម៉ោង១២រំលងអាធ្រាត្រទៅ ដើម្បីបញ្ចៀសសម្លេងថ្លង់រំខានដល់ការសម្រាករបស់បងប្អូនប្រជាពលរដ្ឋជិតខាង ។
ក្នុងនោះដែរ លោកអភិបាលរងក៏បានធ្វើការស្នើរឱ្យម្ចាស់អាជីវកម្មក្លិបកម្សាន្តទាំង២ត្រូវចូលរួមសហការជាមួយកម្លាំងអាជ្ញាធរ ក្នុងករណីប្រសិនបើមានការប៉ុនប៉ងប្រើប្រាស់អំពើហិង្សាពីសំណាក់ក្មេងទំនើង ឬជនអន្ធពាល ការសេព ឬជួញដូរគ្រឿងញៀន ឬសកម្មភាពល្មើសច្បាស់ផ្សេង និងមើលទៅគួរឱ្យសង្ស័យ ធ្វើយ៉ាងណាត្រូវរាយការណ៍ជូនសមត្ថកិច្ចមូលដ្ឋាន ឬកម្លាំងអាជ្ញាធរភ្លាម ដើម្បីចុះមកធ្វើការបង្ក្រាប និងទប់ស្កាត់ទុកជាមុន
ដោយមិនបណ្តែតបណ្តោយឱ្យអំពើអសន្តិសុខបែបនេះកើតមាននៅក្នុងមូលដ្ឋានជាដាច់ខាត ។
ចំពោះទីតាំងក្លិបកម្សាន្ត «Key Club» លោកអភិបាលរងបានស្នើឱ្យតំណាងម្ចាស់ទីតាំងធ្វើកិច្ចសន្យាបញ្ឈប់ការយកចំណីផ្លូវធ្វើជាចំណតសម្រាប់យានជំនិះគ្រប់ប្រភេទទៀត ដោយត្រូវរកកន្លែងសមគួរណាមួយផ្សេងទៀតសម្រាប់យានជំនិះរបស់ភ្លៀវ មិនត្រូវយកចំណីផ្លូវធ្វើជាកន្លែងសម្រាប់បំពេញផលចំណេញរបស់ខ្លួន ហើយមកបំផ្លាញសណ្តាប់ធ្នាប់សាធារណៈនោះទេ ។
ជាចុងក្រោយ ម្ចាស់ទីតាំងក្លឹបកម្សាន្តទាំង២ក៏បានផ្តិតមេដៃចុះកិច្ចសន្យាយល់ព្រមទទួលយកការណែនាំរបស់អាជ្ញាធរផងដែរ ។
លោក ឌី រ័ត្នខេមរុណ ឱ្យដឹងថា អាជ្ញាធរខណ្ឌមានជ័យនឹងបន្តសកម្មភាពចុះត្រួតពិនិត្រនេះបន្តទៀតចំពោះក្លិបកម្សាន្តជាច្រើនទៀតនៅភូមិសាស្ត្រខណ្ឌមានជ័យទាំងមូល ដោយមិនបន្តបណ្តែតបណ្តោយឱ្យម្ចាស់អាជីវកម្មក្លិបកម្សាន្តមួយចំនួនធំបន្តធ្វើអ្វីប៉ះពាល់ដល់ការរស់នៅរបស់ប្រជាពលរដ្ឋបានស្រេចតែអំពើចិត្តទៀតនោះទេ ៕
ចែករំលែកព័តមាននេះ