រាជធានីភ្នំពេញ ៖ បុរសម្នាក់បានដាច់ចិត្តបញ្ចប់ជីវិតខ្លួនឯងដោយចង.កធ្វើអត្តឃាតសង្ស័យតូចចិត្តដោយសារមានជម្ងឺរ៉ាំរ៉ៃមើលមិនជា ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៦ល្ងាច ថ្ងៃទី២៩ កក្កដា ២០១៥ នៅភូមិត្រពាំងចេក សង្កាត់ចោមចៅ ខណ្ឌពោធិ៍សែនជ័យ ។
បុរសដែលចង.កធ្វើអត្តឃាតខ្លួនឯងនេះមានឈ្មោះ អីុ កូយ អាយុ៤០ឆ្នាំ មានប្រពន្ធឈ្មោះ សឹម ផាន អាយុ៣៧ឆ្នាំ មុខរបរជាកម្មការិនីរោងចក្រ ព្រមទាំងមានកូនប្រុស៣នាក់ ។ គ្រួសារនេះស្នាក់នៅផ្ទះជួលក្នុងភូមិកើតហេតុខាងលើ និងមានស្រុកកំណើតនៅភូមិត្រពាំងស្រែ ឃុំត្រពាំងស្រែ ស្រុកមេសាង ខេត្តព្រៃវែង ។
ប្រភពពីប្រពន្ធជនរងគ្រោះបានឱ្យដឹងថា ប្តីរបស់គាត់មានជម្ងឺមហារីកគ្រលានរ៉ាំរ៉ៃយូរមកហើយ ប្រហែលជាគាត់តូចចិត្តនឹងជម្ងឺរ៉ាំរ៉ៃរបស់គាត់ហើយមានជាដាច់ចិត្តសម្លាប់ខ្លួនបែបនេះ ព្រោះក្រុមគ្រួសារយើងមិនដែលមានទំនាស់នឹងគ្នានោះទេ ។
ប្រភពបន្តទៀតថា មុនពេលកើតហេតុ ព្រលឹមឡើងគាត់ដាំបាយ និងធ្វើម្ហូបទុកប្តីខ្លះ និងយកទៅហូបនៅរោងចក្រខ្លះ ។ លុះល្ងាចឡើងពេលគាត់ត្រឡប់មកពីធ្វើការវិញ ក៏ឃើញសំបកកំប៉ុងស្រាបៀរ៥កំប៉ុងនៅក្នុងផ្ទះ និងឃើញប្តីរបស់គាត់ចង.កដោយក្រម៉ានឹងផ្ទោងផ្ទះស្លាប់បាត់ទៅហើយ ដោយមិនដឹងថាគាត់ចង.កស្លាប់តាំងពីពេលណានោះទេ ។
ប្រពន្ធជនរងគ្រោះបានឱ្យដឹងទៀតថា សពប្តីរបស់គាត់ត្រូវដឹកយកទៅស្រុកកំណើតដើម្បីធ្វើបុណ្យតាមប្រពៃណី ៕
ចែករំលែកព័តមាននេះ