ខេត្តកំពត ៖ បុរសពីរនាក់បានរងរបួសធ្ងន់ ខណៈជិះម៉ូតូម៉ាកស៊ុយហ៊្សុយគីស្មាស់ ពណ៌ខ្មៅ គ្មានស្លាកលេខ ឌុបគ្នាពីរនាក់ចេញពីផ្សារកំពតក្នុងទិសដៅពីត្បូងទៅជើងលើផ្លូវជាតិលេខ៣កំពត ភ្នំពេញ ហើយបានបើកវ៉ារថយន្តកុងតឺន័រដែលបើកស្របទិសគ្នាជ្រុលទៅបុករថយន្តម៉ាកនីស្សាន់មួយបាំងកន្លះ ពណ៌ទឹកប្រាក់មួយគ្រឿងទៀតដែលកំពុងបើកបរបញ្ច្រាសទិសគ្នា ។
ហេតុការណ៍នេះកើតឡើងកាលពីវេលាម៉ោង១២ និង៣០នាទីថ្ងៃត្រង់ ថ្ងៃទី២៩ កក្កដា ២០១៥ នៅលើផ្លូវជាតិខាងលើស្ថិតក្នុងភូមិបឹងតារោង ឃុំព្រៃឃ្មុំ ស្រុកទឹកឈូ ។
សាក្សីដែលឃើញហេតុការណ៍បាននិយាយថា មុនពេលកើតហេតុគេឃើញបុរសពីរនាក់ជិះម៉ូតូម៉ាកស៊ុយហ៊្សុយគីស្មាស់ឌុបគ្នាយ៉ាងលឿនក្នុងទិសដៅពីត្បូងទៅជើង លុះមកដល់ចំណុចកើតហេតុ មានរថយន្តកុងតឺន័រទ្រុងវែងមួយគ្រឿងបើកពីមុខស្របទិសគ្នាពេលនោះម៉ូតូក៏បានបើកវ៉ារថយន្តកុងតឺន៍រនោះ ខណៈនោះដែររថយន្តម៉ាកនីស្សាន់បានមកដល់ធ្វើឱ្យម៉ូតូជនរងគ្រោះជ្រុលទៅបុកថ្ពាល់រថយន្តពេញទំហឹងបណ្តាលឲ្យដួលម៉ូតូបោកកណ្តាលថ្នល់ សំណាងល្អមនុស្សមិនខ្ទាតចូលកង់រថយន្ត បើចូលកង់រថយន្តត្រូវស្លាប់ទាំងពីរនាក់តែម្តង ប៉ុន្តែគ្រាន់តែរងរបួសធ្ងន់ម្នាក់ បាក់ជើងខាងឆ្វេង និងម្នាក់ទៀតបោកក្បាលនឹងថ្នល់សន្លប់ស្តូកស្តឹងនៅកន្លែងកើតហេតុ ត្រូវសាច់ញាតិដឹកទៅសង្គ្រោះនៅមន្ទីរពេទ្យបង្អែកខេត្ត ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ