រាជធានីភ្នំពេញ ៖ ព្រះតេជគណ អ៊ីង ឡឹក អនុប្រធានគណៈកម្មការសាសនាខេត្តហ័រណាន ប្រធានសមាគមសាសនាក្រុងឡកយ៉ាង និងជាព្រះចៅអធិការវត្តសេះស ក្រុងឡកយ៉ាង សាធារណរដ្ឋប្រជាមានិតចិន បានស្នើសុំរាជរដ្ឋាភិបាលកម្ពុជា
រាជធានីភ្នំពេញ ៖ ព្រះតេជគណ អ៊ីង ឡឹក អនុប្រធានគណៈកម្មការសាសនាខេត្តហ័រណាន ប្រធានសមាគមសាសនាក្រុងឡកយ៉ាង និងជាព្រះចៅអធិការវត្តសេះស ក្រុងឡកយ៉ាង សាធារណរដ្ឋប្រជាមានិតចិន បានស្នើសុំរាជរដ្ឋាភិបាលកម្ពុជា តាមរយៈក្រសួងធម្មការ និងសាសនា ឲ្យមានការសាងសង់វត្តខ្មែរមួយនៅក្នុងបរិវេណវត្តសេះស នៅប្រទេសចិន ក្នុងន័យបង្ហាញពីវប្បធម៌ដ៏ល្អផូរផង់របស់កម្ពុជាទៅដល់ពិភពលោកទាំងមូល ។
សង្ឃដីការបស់ព្រះតេជគណ អ៊ីង ឡឹក ធ្វើឡើងក្នុងជំនួបជាមួយលោក មិន ឃិន រដ្ឋមន្ត្រីក្រសួងធម្មការ និងសាសនា កាលពីរសៀលថ្ងៃទី២៨ កក្កដា ២០១៥ នៅទីស្តីការក្រសួង ។
ព្រះតេជគណបញ្ជាក់ថា ប្រជាជនកម្ពុជា និងប្រជាជនចិន គឺជឿលើព្រះពុទ្ធសាសនា ការអប់រំតាមរយៈព្រះពុទ្ធសាសនា បានធ្វើឲ្យមនុស្សមានការជឿលើបាបនិងបុណ្យ។ ព្រះតេជគុណបានបន្ថែមថា ក្រោមការគាំទ្រពីសំណាក់រដ្ឋាភិបាល វត្តសេះសបានពង្រីកផ្ទៃដីបន្ថែមរហូតដល់១គីឡូម៉ែត្រការ៉េ ហើយមានអ្នកជឿលើព្រះពុទ្ធសាសនាយ៉ាងច្រើន មិនត្រឹមតែប៉ុណ្ណោះ ប្រទេសឥណ្ឌា ថៃ និងមីយ៉ាន់ម៉ា បានសាងសង់វត្តព្រះពុទ្ធសាសនាលើបរិវេណវត្តសេះសរួចរាល់ហើយ ព្រះតេជគណចង់ឲ្យរាជរដ្ឋាភិបាលកម្ពុជា សាងសង់វត្តព្រះពុទ្ធសាសនាខ្មែរនៅលើបរិវេណវត្តរបស់ព្រះអង្គ ។
ជាការឆ្លើយតបលោក មិន ឃិន បានស្វាគមន៍យ៉ាងកក់ក្តៅដែលប្រទេសចិនមានបំណងចង់កសាងវត្តខ្មែរនៅលើទឹកដីរបស់ខ្លួន ហើយសង្ឃឹមថា តាមរយៈការផ្សព្វផ្សាយពីវប្បធម៌ និងអរិយធម៌ដ៏រុងរឿងរបស់បុព្វបុរសខ្មែរពីជំនាន់មុនៗ ព្រះរាជាណាចក្រកម្ពុជានឹងទទួលបានភ្ញៀវទេសចរអន្តរជាតិយ៉ាងច្រើនមកសិក្សាស្វែងយល់ពីតម្លៃកេរដំណែលវប្បធម៌របស់កម្ពុជា ៕
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ