ខេត្តបន្ទាយមានជ័យ ៖ ថ្វីត្បិតតែវាជារឿងដដែលៗ ប៉ុន្តែបើមិនសរសេរអ្នកស្រុកគេចេះតែរិះគន់រាល់ថ្ងៃថា គ្មាននណាមើលឃើញសោះ។
ខេត្តបន្ទាយមានជ័យ ៖ ថ្វីត្បិតតែវាជារឿងដដែលៗ ប៉ុន្តែបើមិនសរសេរអ្នកស្រុកគេចេះតែរិះគន់រាល់ថ្ងៃថា គ្មាននណាមើលឃើញសោះ។ តើជារឿងអ្វី? ធាតុពិតរឿងបង្កាន់ដៃដែកក្រោមដំបូលការពារកំដៅនៅច្រកទ្វារអន្តរជាតិប៉ោយប៉ែតដែលមានប្រវែងមិនក្រោមពីជិត១០០ម៉ែត្រទេត្រូវបានច្រេះស៊ីដាច់ស្ទើរអស់ប្រហោងខេងខូង និងកន្លែងខ្លះគេយកក្រណាត់រុំ ព្រោះខ្លាចមុតដៃអ្នកដំណើរជាតិ និងអន្តរជាតិប្រៀបដូចជាច្រកទ្វារអន្តរជាតិប៉ោយប៉ែតមួយនេះគ្មានថវិកាចំណូលរដ្ឋសោះអ៊ីចឹង។
ករណីខាងលើបានកើតមានជាយូរមកហើយៗដោយសារបញ្ហានេះគ្មាននរណាគេយកភ្នែកមើលអ្នកដំណើរជាតិ និងអន្តរជាតិដែលដើរឆ្លងកាត់មួយថ្ងៃៗរាប់សិបនាក់ ខ្លះមិនបានគិតដល់ពីបង្កាន់ដៃដែកនេះថា មានច្រេះស៊ីដាច់រឃឹងនោះពេលលើកដៃកាន់ ឬតោងទើបភ្ញាក់ខ្លួនព្រើតតែម្ដង ហើយពន្លយសម្ដីថា ច្រកទ្វារអន្តរជាតិមួយនេះតំណាងឲ្យមុខមាត់ប្រទេសជាតិ ហើយមានចំណូលសេដ្ឋកិច្ចដ៏សំខាន់បំផុត ហេតុអ្វីគេបណ្ដោយឲ្យក្លាយទៅជាបែបហ្នឹង។
ក្នុងការឆ្លងកាត់ច្រកទ្វារព្រំដែនអន្តរជាតិប៉ោយប៉ែតនេះបើអាកាសធាតុអំណោយផលអ្នកដំណើរបានធ្វើដំណើរហូរហែ ប៉ុន្តែបើសិនជាចំពេលមានភ្លៀងវិញអ្នកទេសចរបរទេសតែងនាំគ្នាឈរត្រៀបត្រានៅក្រោមដំបូលការពារកំដៅនោះ ហើយអ្វីដែលសំខាន់គឺក្រុមភ្ញៀវទេសចរ នឹងឃើញបង្កាន់ដៃដែកដែលមិនល្អនេះ ព្រោះមិនហ៊ានប៉ះ ឬកាន់ម្យ៉ាងខា្លចមុតដៃ ម្យ៉ាងខ្លាចច្រេះនោះប្រឡាក់ខោអាវតែម្ដង។
នៅពេលដែលឃើញហេតុការណ៍បែបនេះមជ្ឈដ្ឋានអ្នករិះគន់ជាច្រើនលើកឡើងថា មិនគួរមន្ត្រី និងអាជ្ញាធរពាក់ព័ន្ធមិនយកភ្នែកបែបនេះឡើយ ព្រោះច្រកទ្វារមួយនេះភ្ញៀវទេសចរបរទេសឆ្លងកាត់មួយឆ្នាំៗរាប់ម៉ឺននាក់វាពិតជាគួរឲ្យខ្មាសគេណាស់។
ជុំវិញបញ្ហាខាងលើលោកអាន វណ្ណៈ ប្រធានស្នាក់ការត្រួតពិនិត្យព្រំដែនច្រកទ្វារអន្តរជាតិប៉ោយប៉ែតបានប្រាប់តាមទូរស័ព្ទថា ចំពោះបង្កាន់ដៃដែលច្រេះស៊ីនេះខាងលោកកំពុងរៀបចំគម្រោងជួសជុលនាពេលឆាប់ៗខាងមុខនេះ សំខាន់គឺរង់ចាំថវិការពីស្ថាប័នមួយដែលគេសន្យាជួយតែម្ដង។
គួរបញ្ជាក់ថាបញ្ហាខាងលើកាលពីប្រហែល០១ឆ្នាំមុនកោះសន្តិភាពក៏ធ្លាប់លើកមកសសេរដែរ តែមកទល់ពេលនេះអ្វីៗនៅតែដដែល ម្យ៉ាងពេលឆ្លងកាត់ច្រកទ្វារអ្នកស្រុកចេះតែរិះគន់វាហាក់ដូចជាស្រគាត្រចៀកពេកទើបលើកមកសសេរម្ដងទៀត៕
ចែករំលែកព័តមាននេះ