ខេត្តព្រះវិហារ ៖ ឈើគ្រញូងប្រមាណជា២៦១ដុំ ដែលឈ្មួញបានលាក់ទុកនៅក្នុងបន្ទប់ផ្ទះជួលមួយកន្លែង ស្ថិតក្នុងភូមិស្រឯមជើង ឃុំស្រឯម ស្រុកជាំក្សាន្ត បានជាប់អន្ទាក់សមត្ថកិច្ចជំនាញខណ្ឌរដ្ឋបាលព្រៃឈើ
ខេត្តព្រះវិហារ ៖ ឈើគ្រញូងប្រមាណជា២៦១ដុំ ដែលឈ្មួញបានលាក់ទុកនៅក្នុងបន្ទប់ផ្ទះជួលមួយកន្លែង ស្ថិតក្នុងភូមិស្រឯមជើង ឃុំស្រឯម ស្រុកជាំក្សាន្ត បានជាប់អន្ទាក់សមត្ថកិច្ចជំនាញខណ្ឌរដ្ឋបាលព្រៃឈើខេត្តព្រះវិហារ កាលពីថ្ងៃទី២៨ កក្កដា កន្លងទៅនេះ ។
តាមមន្ត្រីខណ្ឌរដ្ឋបាលព្រៃឈើបានប្រាប់ឱ្យដឹង នៅថ្ងៃទី២៨ កក្កដា ២០១៥នេះថា ដោយយោងតាមដីកាឆែកឆេរលំនៅឋានផ្ទះជួលបន្ទប់លេខ ត១៤ ដែលឈ្មោះ ទុយ តូ ភេទប្រុស អាយុ៤១ឆ្នាំ ជួលនៅភូមិស្រឯមជើង ឃុំស្រឯម ស្រុកជាំក្សាន្ត របស់សាលាដំបូងខេត្តព្រះវិហារបានឱ្យដឹងថា ដោយសង្ស័យផ្ទះខាងលើមានផ្ទុកបទល្មើសឈើគ្រញូង សមត្ថកិច្ចខណ្ឌរដ្ឋបាលព្រៃឈើ បានសហការជាមួយផ្នែករដ្ឋបាលព្រៃឈើជាំក្សាន្ត និងអាជ្ញាធរមូលដ្ឋានស្រុកជាំក្សាន្តចុះឆែកឆេរលំនៅឋានជនសង្ស័យខាងលើ ឃើញឈើគ្រញូងដែលឈ្មួញយកមកលាក់ទុកប្រាកដមែន ។
មន្ត្រីដដែលបន្តថា ក្នុងសកម្មភាពឆែកឆេរនោះដែរជនសង្ស័យហាក់បីដូចជាដឹងខ្លួន ក៏បានរត់គេចខ្លួនបាត់ស្រមោល ។
សូមបញ្ជាក់ផងដែរ ការចុះបង្ក្រាបនៅថ្ងៃនោះ សមត្ថកិច្ចរឹបអូសបានវត្ថុតាងឈើគ្រញូងប្រមាណ២៦១ដុំ ស្មើនឹង១៤៩០គីឡូក្រាម ម៉ូទ័រ៤គ្រឿង ។ មកដល់ពេលនេះវត្ថុតាងទាំងអស់ មន្ត្រីជំនាញបានយកមករក្សាទុកនៅសង្កាត់រដ្ឋបាលព្រៃឈើកន្ទួត ដើម្បីកសាងសំណុំរឿងចាត់ការតាមផ្លូវច្បាប់៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ