រាជធានីភ្នំពេញ ៖ យោងតាមវ៉េបសាយរបស់អគ្គស្នងការនគរបាលជាតិបានឱ្យដឹងថា អគ្គស្នងការរងនគរបាលជាតិកំពុងបន្តយ៉ាងសកម្ម ក្នុងការស្វែងរកចាប់ខ្លួនទណ្ឌិតឈូក បណ្ឌិត អតីតអភិបាលក្រុងបាវិតខេត្តស្វាយរៀង ពាក់ព័ន្ធករណីប្រើប្រាស់អាវុធបាញ់ឱ្យរបួសទៅលើកម្មការិនីរោងចក្រនៅក្រុងបាវិត ខេត្តស្វាយរៀង ។
លោកឧត្តមសេនីយ៍ឯក គៀត ច័ន្ទថារិទ្ធ អគ្គស្នងការរងនគរបាលជាតិបានបញ្ជាក់កាលពីថ្ងៃទី២៨ កក្កដា ២០១៥ នេះថា ក្រសួងមហាផ្ទៃ និងអគ្គស្នងការដ្ឋាននគរបាលជាតិមិនមានការធ្វេសប្រហែស ឬបន្ធូរដៃក្នុងការស្រាវជ្រាវ ដើម្បីស្វែងរកចាប់ខ្លួនពិរុទ្ធជន ឈូក បណ្ឌិត យកមកផ្តន្ទាទោសនោះទេ ។
រយៈពេលកន្លងមកនេះ ករណីពិរុទ្ធជន ឈូក បណ្ឌិត គឺជាករណីមួយ ដែលតុលាការបានជំនុំជម្រះសម្រេចទោសរួចហើយ ហើយក៏បានចេញដីកាឱ្យចាប់ខ្លួនផងដែរ កាលពីថ្ងៃទី២៥ មិថុនា ២០១៥ មកម្ល៉េះ ។ ចាប់ពីពេលនោះមក កងកម្លាំងមានសមត្ថកិច្ចបានស្រាវជ្រាវ និងកំពុងបន្តស្រាវជ្រាវជាបន្តបន្ទាប់ ជាពិសេសដោយមានការដាក់បទបញ្ជាយ៉ាងម៉ឺងម៉ាត់ដាច់ខាតពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានធ្វើការក្រើនរំលឹកជាបន្តបន្ទាប់ និងបានប្រគល់ភារកិច្ចច្បាស់លាស់ឱ្យនាយកដ្ឋាននគរបាលព្រហ្មទណ្ឌ ដែលមានកម្លាំងជំនាញមួយក្រុមធ្វើការងារនេះ និងស្រាវជ្រាវធ្វើម៉េចតាមចាប់ទណ្ឌិត ឈូក បណ្ឌិត យកមកផ្តន្ទាទោសឱ្យបាន។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ