ខេត្តស្វាយរៀង ៖ ក្មេងប្រុសអាយុ៣ឆ្នាំម្នាក់ត្រូវរានទេវតាធ្លាក់សង្កត់បែកក្បាល និងដាច់ក្រោមភ្នែកហូរឈាមរហាម ដោយសារទៅទាញលេងរានទេវតាដែលគេមិនទាន់ផ្ស៊ីស៊ីម៉ង់ត៍ជាប់គ្នានៅឡើយ ។ ហេតុការណ៍នេះបានកើតឡើងកាលពីវេលាម៉ោងប្រមាណជាម៉ោង៩ និង៣០នាទី ព្រឹកថ្ងៃទី២៩ កក្កដា ២០១៥ ស្ថិតក្នុងភូមិចិនសា ឃុំដូនស ស្រុកស្វាយជ្រំ ។
បើតាមសម្តីរបស់ស្រី្តឈ្មោះ ព្រំ សោភា អាយុ២៨ឆ្នាំ ត្រូវជាម្តាយរបស់ក្មេងប្រុសរងគ្រោះបានឱ្យដឹងថា កូនប្រុសរបស់គាត់មានឈ្មោះ មិត រតនា អាយុ៣ឆ្នាំ ជាកូនទី១ ក្នុងចំណោមកូន២នាក់ ។ ប្រភពបន្តទៀតថា មុនពេលកើតហេតុកូនរបស់គាត់បានជិះម៉ូតូជ័រកូនក្មេងទៅលេងផ្ទះអ្នកជិតខាងម្នាក់ដែលនៅជាប់របងគ្នា ដោយគាត់រវល់តែមើលកូនម្នាក់ទៀតដែលមានអាយុទើបតែ៤ខែ និងធ្វើការងារផ្ទះបន្តិចបន្តួចនៅក្នុងផ្ទះ ។
មួយសន្ទុះក្រោយមកស្រាប់តែអ្នកជិតខាងរត់មកប្រាប់ថា កូនរបស់គាត់ទៅទាញខ្ទមអ្នកតាគេដែលទើបនឹងទិញមកបានជាង១០ថ្ងៃ ហើយមិនទាន់បានផ្ស៊ីស៊ីម៉ង់ត៍នោះធ្លាក់សង្កត់បែកក្បាលហូរឈាម ។ គ្រាន់តែឮបែបនោះរូបគាត់ជាម្តាយភ័យយ៉ាងខ្លាំង ហើយរត់ទៅមើលកូនក៏ឃើញខ្ទមអ្នកតានោះខ្ទេចខ្ទីអស់ ហើយកូនរបស់គាត់ត្រូវអ្នកជិតខាងលើកយកទៅជូតឈាម ។ ក្រោយមកគាត់ក៏ហៅបងប្រុសជីដូនមួយជួយដឹកកូនមកសង្គ្រោះនៅមន្ទីរពេទ្យបង្អែកខេត្តស្វាយរៀងភ្លាមៗផងដែរ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ