រាជធានីភ្នំពេញ ៖ សេចក្តីរាយការណ៍បានឱ្យដឹងថា ជនសង្ស័យចំនួន២នាក់ត្រូវកម្លាំងនគរបាលប៉ុស្តិ៍បឹងកក់២ល្បាតឃាត់ខ្លួនកាលពីវេលាម៉ោង១ និង១០នាទីរំលងអធ្រាត្រឈានចូលថ្ងៃទី២៩ កក្កដា ២០១៥ ខណៈពេលពួកគេកំពុងជិះម៉ូតូដើរធ្វើសកម្មភាពចែកចាយគ្រឿងញៀននៅចំណុចស្ថានីយសាំងសូគីមិច ផ្លូវលេខ៦០៨ កែងផ្លូវ២៨៩ ចំណុចរង្វង់មូលទួលគោក សង្កាត់បឹងកក់២ ។
ជនសង្ស័យទាំង២នាក់ ម្នាក់ឈ្មោះហឿង សុម៉ូលី ភេទប្រុស អាយុ១៨ឆ្នាំ ជាសន្តិសុខឯកជន ស្នាក់នៅផ្ទះជួលមុខផ្សារទួលគោក សង្កាត់បឹងកក់២ ជាម្ចាស់គ្រឿងញៀន និងម្នាក់ទៀតឈ្មោះប៉ែន សុផានីន ភេទប្រុស អាយុ១៨ឆ្នាំ ជាជាងជួសជុលរថយន្ត ស្នាក់នៅភូមិស្លែងរលើង សង្កាត់ទឹកថ្លា ខណ្ឌសែនសុខ។
សេចក្តីរាយការណ៍បានឱ្យដឹងទៀតថា ពេលឃាត់ខ្លួនជនសង្ស័យ សមត្ថកិច្ចបានដកហូតម៉ាទឹកកកចំនួន១៨កញ្ចប់តូច ម៉ូតូឌ្រីមC125 ស៊េរី២០០៧ ពាក់ស្លាកលេខភ្នំពេញ១AM៨៥៥១ មួយគ្រឿង ប្រាក់ខ្មែរ៣១ម៉ឺន៦ពាន់៧០០រៀល និង៣៥ដុល្លារ និងទូរស័ព្ទ៣គ្រឿង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ