ខេត្តសៀមរាប ៖ កម្លាំងការិយាល័យអន្តោប្រវេសន៍ សហការជាមួយកម្លាំងផ្នែកសន្តិសុខ នៃអធិការដ្ឋាននគរបាលក្រុងសៀមរាប ក្រោមការដឹកនាំបញ្ជាផ្ទាល់ដោយលោកវរសេនីយ៍ឯក ចៅ ម៉ៅវីរៈ ស្នងការរងទទួលការងារអន្តោប្រវេសន៍ នៃស្នងការដ្ឋាននគរបាលខេត្តសៀមរាប និងដឹកនាំសម្របសម្រួលដោយលោក ជួន សុបញ្ញា ព្រះរាជអាជ្ញរងអមសាលាដំបូងខេត្តសៀមរាប បានចុះស្រាវជ្រាវរុករកជនបរទេសលួចចូលស្នាក់នៅ និងបំរើការងារខុសច្បាប់នៅតាមបណ្តាទីតាំងហាងម៉ាស្សានានាបណ្តោយផ្លូវ៣០ម៉ែត្រ ។ ហេតុការចុះបង្ក្រាបករណីស្ត្រីម៉ាស្សានេះធ្វើឡើងកាលពីវេលាម៉ោង៥ល្ងាច ថ្ងៃទី២៧ ខែកក្កដា ឆ្នាំ២០១៥ នៅចំណុចតាមផ្លូវ៣០ម៉ែត្រ ស្ថិតក្នុងភូមិត្រពាំងសេះ សង្កាត់គោកចក ក្រុងសៀមររាប ។
លោកវរសេនីយ៍ឯក ចៅ ម៉ៅវីរៈ បានប្រាប់«កោះសន្តិភាព»ឱ្យដឹងថា ស្ត្រីជាជនជាតិវៀតណាម ទាំង៣នាក់នោះមាន ១-ឈ្មោះ ង្វៀង ធីសាង អាយុ៣០ឆ្នាំ មុខរបរម៉ាស្សា មានស្រុកកំណើត កើតនៅភ្នំពេញ ត្រូវបានឪពុកបោះបង់ចោលតាំងពីតូច រស់នៅជាមួយអ៊ុំស្រី ទី២-ឈ្មោះ ង្វៀង ង៉ុកហាំង អាយុ៣៧ឆ្នាំ មុខរបរម៉ាស្សា មានស្រុកកំណើតកើតនៅខេត្តតាកែវ ឪពុកជាជនជាតិវៀតណាម ម្តាយជាជនជាតិខ្មែរ និងទី៣-ឈ្មោះ សយ ណាវី ភេទស្រី អាយុ៣២ឆ្នាំ មុខរបរម៉ាស្សា មានស្រុកកំណើតកើតនៅស្រុកបរិបូរណ៍ ខេត្តកំពង់ឆ្នាំង ត្រូវបានឪពុកម្តាយបោះបង់ចោលតាំងពីអាយុ៥ឆ្នាំ រស់នៅជាមួយអ៊ុំស្រី ។
បច្ចុប្បន្នស្ត្រីជាជនជាតិវៀតណាមទាំង៣នាក់ត្រូវបានកម្លាំងជំនាញរបស់ការិយាល័យអន្តោប្រវេសន៍បញ្ជូនទៅកាន់អគ្គនាយកដ្ឋានអន្តោប្រវេសន៍ក្រសួងមហាផ្ទៃ ដើម្បីដេញចេញពីស្រុកខ្មែរនៅថ្ងៃទី២៩ ខែកក្កដា ឆ្នាំ២០១៥ ៕
ចែករំលែកព័តមាននេះ