រាជធានីភ្នំពេញ ៖ ថ្ងៃទី២២ កក្កដា ដែលបានកន្លងផុតទៅ១ថ្ងៃនេះ គឺជាខួបមួយឆ្នាំគត់នៃកិច្ចព្រមព្រៀងនយោបាយបញ្ចប់វិបត្តិក្រោយការបោះឆ្នោត ។ អស់រយៈពេលមួយឆ្នាំកន្លងមកនេះ គណបក្សជាប់ឆ្នោតទាំងពីរដែលបានព្រមព្រៀងគ្នា
រាជធានីភ្នំពេញ ៖ ថ្ងៃទី២២ កក្កដា ដែលបានកន្លងផុតទៅ១ថ្ងៃនេះ គឺជាខួបមួយឆ្នាំគត់នៃកិច្ចព្រមព្រៀងនយោបាយបញ្ចប់វិបត្តិក្រោយការបោះឆ្នោត ។ អស់រយៈពេលមួយឆ្នាំកន្លងមកនេះ គណបក្សជាប់ឆ្នោតទាំងពីរដែលបានព្រមព្រៀងគ្នា ព្យាយាមតែរៀងៗខ្លួនថាបានគោរពអនុវត្តតាមកិច្ចព្រមព្រៀងនេះយ៉ាងម៉ឺងម៉ាត់ ។
គួររំលឹកថា ជំនួបកំពូលរវាងថ្នាក់ដឹកនាំគណបក្សជាប់ឆ្នោតទាំងពីរបានរៀបចំធ្វើឡើងនៅវិមានព្រឹទ្ធសភា នាព្រឹកថ្ងៃទី២២ កក្កដា២០១៤ ។ ជំនួបនេះបានកើតឡើងបន្ទាប់ពីមានការផ្ទុះហិង្សាកាលពីថ្ងៃទី១៥ កក្កដា នៅក្បែរទីលានប្រជាធិបតេយ្យ ដែលឈានដល់ការចាប់ខ្លួនតំណាងរាស្ត្រគណបក្សប្រឆាំង៧នាក់ដាក់ពន្ធនាគារ និងមន្ត្រី ព្រមទាំងសកម្មជនជាច្រើននាក់ទៀត ។
កិច្ចប្រជុំកំពូលដែលមានរយៈពេលជិត៥ម៉ោង គណបក្សប្រជាជនកម្ពុជា និងគណបក្សសង្គ្រោះជាតិ ដែលមានសមាសភាពម្ខាង៨រូបបានឈានទៅសម្រេចកិច្ចព្រមព្រៀងមួយ។ កិច្ចព្រមព្រៀង៧ចំណុចស្តីពីដំណោះស្រាយនយោបាយ ត្រូវបានចុះហត្ថលេខាដោយសម្តេចតេជោ ហ៊ុន សែន និងលោក សម រង្ស៊ី ។ ប៉ុន្មានម៉ោងបន្ទាប់ពីនោះ ពោលគឺនៅល្ងាចថ្ងៃទី២២ កក្កដា នោះតែម្តង តំណាងរាស្ត្ររបស់គណបក្សសង្គ្រោះជាតិចំនួន៧រូប ក៏ត្រូវបានដោះលែងឱ្យនៅក្រៅឃុំជាបណ្តោះអាសន្ន ។
ចំពោះការសម្រេចចិត្តចូលសភារបស់តំណាងរាស្ត្រគណបក្សប្រឆាំង ជាលទ្ធផលវិជ្ជមាន គឺគណបក្សសង្គ្រោះជាតិបានទទួលតំណែងអនុប្រធានទី១ នៃរដ្ឋសភា ។ ជាងនេះទៀត គណបក្សប្រឆាំង និងគណបក្សកាន់អំណាចកាន់តំណែងប្រធានគណៈកម្មការស្មើគ្នាក្នុងចំណោមគណៈកម្មការទាំង១០ របស់រដ្ឋសភា ។ ប៉ុន្តែយ៉ាងណាក៏ដោយ គណៈកម្មការសំខាន់ៗនៅតែស្ថិតក្រោមកណ្តាប់ដៃរបស់គណបក្សប្រជាជនកម្ពុជាដដែល ។ ដោយសារតែការព្រមព្រៀងនោះ កំណែទម្រង់ការបោះឆ្នោត គឺឈានទៅរៀបចំក្បាលម៉ាស៊ីនគណៈកម្មាធិការជាតិរៀបចំការបោះឆ្នោត ដែលត្រូវរុះរើឡើងវិញតាមរូបមន្ត ៤-៤-១ ពោលគឺគណបក្សទាំងពីរមានសមាសភាពម្ខាង៤រូប និងមួយរូបទៀតត្រូវជ្រើសរើសតាមរយៈការព្រមព្រៀងរបស់គណបក្សទាំងពីរ ។ នេះគឺជាលទ្ធផលស្មើមុខស្មើមាត់រវាងគណបក្សជាប់ឆ្នោតទាំងពីរ ។
ក្រៅពីលទ្ធផលសំខាន់ៗទាំងពីរនេះ កិច្ចព្រមព្រៀងនយោបាយថ្ងៃទី២២ កក្កដា ក៏បានផ្តល់ឱ្យគណបក្សប្រឆាំង បង្កើតប៉ុស្តិ៍ទូរទស្សន៍ព្រះអាទិត្យ ស្របតាមការចង់បានផងដែរ ដែលពេលនេះកំពុងមានការរៃអង្គាសប្រាក់ពីគ្រប់មជ្ឈដ្ឋានដោយមានការសន្យាថា នឹងដំណើរការនៅចុងឆ្នាំ២០១៥នេះ ប៉ុន្តែក៏មិនទាន់ច្បាស់ដែរសម្រាប់ការកៀរគររកថវិកានេះ ដែលតាមការប៉ាន់ស្មានថា អស់ប្រាក់មិនតិចជាង៣លានដុល្លារទេ ។
ជាមួយគ្នានេះ កិច្ចព្រមព្រៀងថ្ងៃទី២២ កក្កដា បានបើកឱកាសឱ្យគណបក្សកាន់អំណាចអនុម័តច្បាប់ដ៏រសើបមួយចំនួន ។ កិច្ចព្រមព្រៀងដដែលនេះធ្វើឱ្យគណបក្សកាន់អំណាចលែងត្រូវបានគណបក្សប្រឆាំងវាយប្រហាររិះគន់។ យ៉ាងណាក៏ដោយ មិនអាចបញ្ចប់បណ្តឹងទៅលើតំណាងរាស្ត្រ និងសកម្មជនគណបក្សសង្គ្រោះជាតិ នៅក្នុងសំណុំរឿងអំពើហិង្សាថ្ងៃទី១៥ កក្កដា ឆ្នាំ២០១៤ ឡើយ ។
តុលាការនៅតែបន្តកោះហៅតំណាងរាស្ត្រ និងសកម្មជននៃគណបក្សប្រឆាំងទៅបំភ្លឺក្នុងសំណុំរឿងនេះ ។ ទីបំផុត ខណៈដែលឆាកនយោបាយកំពុងឡើងកម្តៅ សកម្មជន និងមន្ត្រីជាន់ខ្ពស់ម្នាក់របស់គណបក្សសង្គ្រោះជាតិ ត្រូវបានតុលាការកាត់ទោសដាក់ពន្ធនាគារក្នុងចន្លោះពី៧ឆ្នាំ ទៅ២០ឆ្នាំ ក្នុងបទចោទថាធ្វើកុបកម្ម ។ នេះជាសញ្ញាមួយដែលវិលវល់រកស្មានមិនត្រូវ សម្រាប់អ្នកតាមដានស្ថានការណ៍នយោបាយនៅកម្ពុជា បន្ទាប់ពីថ្នាក់ដឹកនាំគណបក្សទាំងពីរបានប្រកាសពីផ្លែផ្កានៃវប្បធម៌សន្ទនារបស់ខ្លួន ។
អស់រយៈពេលមួយឆ្នាំកន្លងមកនេះ ពេលវេលា និងការប្រព្រឹត្តរបស់អ្នកនយោបាយកម្ពុជា បានពិសោធន៍ឱ្យឃើញថា កិច្ចព្រមព្រៀងថ្ងៃទី២២ កក្កដា គ្រាន់តែជាកិច្ចសន្យានយោបាយប៉ុណ្ណោះ ។ ទោះជាយ៉ាងណាក៏ដោយ យ៉ាងហោចណាស់ កិច្ចព្រមព្រៀងថ្ងៃទី២២ កក្កដា បានបិទបញ្ចប់នូវវិបត្តិនយោបាយក្រោយការបោះឆ្នោតនៅកម្ពុជា ។ គណបក្សទាំងពីរត្រូវការពេលវេលា និងការប្តេជ្ញាចិត្តច្រើនជាងនេះទៀត ដើម្បីធ្វើឱ្យការសម្រេចចិត្តរបស់ខ្លួនអាចទទួលបានផ្លែផ្កា ។ ក្នុងហ្វេសប៊ុកផ្លូវការរបស់លោក សម រង្ស៊ី ប្រធានគណបក្សសង្គ្រោះជាតិ បានរំលឹកថា ថ្ងៃនេះជាខួបទី១នៃការចុះហត្ថលេខាលើកិច្ចព្រមព្រៀងស្ដីពីដំណោះស្រាយនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ។
នៅក្នុងទំព័របណ្ដាញទំនាក់ទំនងសង្គម របស់លោក សម រង្ស៊ី បញ្ជាក់ថា ក្នុងរយៈពេល១ឆ្នាំកន្លងមកនេះ ស្ថានការណ៍នយោបាយនៅក្នុងប្រទេសកម្ពុជា មានភាពល្អប្រសើរជាងមុនគួរឱ្យកត់សម្គាល់ ។ ទោះជានៅមានបញ្ហាច្រើនទៀតដែលគណបក្សទាំងពីរមិនទាន់ឯកភាពគ្នានៅឡើយក៏ដោយ ហើយទោះជាមានព្យុះភ្លៀង និងផ្គរម្ដងម្កាលក៏ដោយក៏គណបក្សសង្គ្រោះជាតិនៅតែខិតខំរក្សា និងពង្រឹងវប្បធម៌សន្ទនា ដែលបានកើតចេញពីកិច្ចព្រមព្រៀងខាងលើនេះ ។
លោក សម រង្ស៊ី បានសរសេរសារយា៉ងត្រជាក់ថា សម្ដេច ហ៊ុន សែន និងរូបខ្ញុំ ជាសហស្ថាបនិកនៃវប្បធម៌សន្ទនានេះ ដែលនាំមកនូវរបត់នយោបាយមួយជាប្រវត្ដិសាស្ដ្រ។ លោក សម រង្ស៊ី បញ្ជាក់ថា យើងទាំងពីរនាក់យល់ឃើញថា មានតែវប្បធម៌សន្ទនានេះទេ ដែលអាចធានាសន្ដិភាព និងសេចក្ដីសុខជូនប្រជារាស្ដ្រ ខ្មែរទាំងមូល ទោះជាមានការប្រែប្រួលនយោបាយយ៉ាងណាក៏ដោយនាពេល អនាគត ។ ម្យ៉ាងវិញទៀត វប្បធម៌សន្ទនានេះពង្រឹងឯកភាពជាតិ ដើម្បីឱ្យជនជាតិខ្មែរគ្រប់រូប និងគ្រប់និន្នាការនយោបាយ ចេះពួតដៃគ្នាដើម្បីការពារទឹកដីប្រទេសកម្ពុជារបស់យើងទាំងអស់គ្នាឱ្យនៅគង់វង្សជានិរន្ដរ៍ ។
ជាមួយនឹងការផ្ញើសារនេះ លោក សម រង្ស៊ី ក៏បានទទួលនូវការចំអកផងដែរ ខណៈដែលមន្ត្រី និងសកម្មជនគណបក្សសង្គ្រោះជាតិ១១នាក់ ត្រូវបានចាប់ដាក់ពន្ធនាគារតាមអំណាចសាលក្រមរបស់សាលាដំបូងរាជធានីភ្នំពេញ ហើយលោកបែរជាចេញពីប្រទេសទៅកាន់ប្រទេសអូស្ត្រាលី។ ចំណែកលោក កឹម សុខា ដែលជាអនុប្រធានគណបក្ស ទើបវិលត្រឡប់មកពីបេសកកម្មនៅក្រៅប្រទេស ក្នុងនាមជាអនុប្រធានទី១រដ្ឋសភា បានថ្លែងថា ការចាប់ខ្លួនសកម្មជន និងមន្ត្រីគណបក្សនេះគឺជារឿងនយោបាយ ផ្ទុយពីមន្ត្រីគណបក្សប្រជាជនកម្ពុជាថ្លែងថា ការកាត់ទោសនេះមិនទាក់ទិននឹងនយោបាយទេ ។
ចំណែកក្រុមការងារថ្នាក់ជាតិចុះមូលដ្ឋាននៅរាជធានីភ្នំពេញរបស់គណបក្សប្រជាជនកម្ពុជា នាព្រឹកថ្ងៃទី២២ កក្កដា បានបើកកិច្ចប្រជុំមួយស្ដីពីវឌ្ឍនភាព១ឆមាស ឆ្នាំ២០១៥ និងទិសដៅត្រូវអនុវត្តបន្ត ដោយមានការអញ្ជើញចូលរួមពីលោក គាត ឈន់ ឧបនាយករដ្ឋមន្ត្រីប្រចាំការ និងជាប្រធានក្រុមការងារថ្នាក់ជាតិចុះជួយមូលដ្ឋានរាជធានីភ្នំពេញ ។
លោក ប៉ា សុជាតិវង្ស អនុប្រធានអចិន្ត្រៃយ៍ក្រុមការងារថ្នាក់ជាតិចុះជួយមូលដ្ឋានរាជធានីភ្នំពេញ បានលើកឡើងពីការងារជាច្រើនដែលក្រុមការងារបានបំពេញ និងចុះជាប់ដល់មូលដ្ឋានខណ្ឌ សង្កាត់ ជាពិសេសចូលរួមក្នុងវេទិកាសាធារណៈដើម្បីស្ដាប់ និងដោះស្រាយរាល់សំណូមពរ និងសំណើរបស់ប្រជាពលរដ្ឋ បើទោះបីសំណូមពរខ្លះនៅមិនទាន់ដោះស្រាយបាន តែក៏យើងបានដឹងថា ប្រជាពលរដ្ឋត្រូវការអ្វីជាចាំបាច់ ។ លោកបន្តថា នៅមានបញ្ហាប្រឈមជាច្រើនទៀត ។
មន្ត្រីគណបក្សប្រជាជនកម្ពុជារូបនេះរំលឹកថា គិតត្រឹមថ្ងៃទី២២ កក្កដា ២០១៥ គឺគម្រប់ខួប១ឆ្នាំនៃការចរចាបញ្ចប់បញ្ហារវាងគណបក្សប្រជាជនកម្ពុជា និងគណបក្សសង្គ្រោះជាតិ ហើយបន្តអនុវត្តវប្បធម៌សន្ទនា ។ ប៉ុន្តែគណបក្សសង្គ្រោះជាតិអនុវត្តមិនស្មោះត្រង់នឹងវប្បធម៌សន្ទនានេះ គឺចាប់ដៃជាន់ជើង ហើយគណបក្សប្រឆាំងក៏កំពុងយករឿងព្រំដែនមកធ្វើជាចំណុចក្តៅក្នុងការវាយប្រហារមកលើរាជរដ្ឋាភិបាលទៀតផង ។
អ្នកវិភាគមិនទាន់អះអាងឱ្យដាច់ណាត់បានទេថា តើរវាងគណបក្សទាំងពីរនឹងប្រកាន់យកស្ថានភាពបែបណា ខណៈដែលមើលមុខគ្នាមិនត្រង់បែបនេះ ៕
ចែករំលែកព័តមាននេះ