រាជធានីភ្នំពេញ ៖ តាមការសង្កេតនៅតាមចិញ្ចើមមហាវិថីមួយចំនួនក្នុងរាជធានី កំពុងក្លាយជាទីតាំងលក់កាហ្វេនិងភេសជ្ជៈតាមរ៉ឺម៉កម៉ូតូកង់បីជាហូរហែ ជាពិសេសលើកំណាត់មហាវិថីព្រះមុនីវង្ស
រាជធានីភ្នំពេញ ៖ តាមការសង្កេតនៅតាមចិញ្ចើមមហាវិថីមួយចំនួនក្នុងរាជធានី កំពុងក្លាយជាទីតាំងលក់កាហ្វេនិងភេសជ្ជៈតាមរ៉ឺម៉កម៉ូតូកង់បីជាហូរហែ ជាពិសេសលើកំណាត់មហាវិថីព្រះមុនីវង្ស ខាងមុខសាកលវិទ្យាល័យវិទ្យាសាស្ត្រសុខាភិបាល ដែលជាទីផ្សារថ្មីមួយមានរ៉ឺម៉កម៉ូតូលក់កាហ្វេនិងភេសជ្ជៈ ក្នុងមួយថ្ងៃមិនក្រោម១០គ្រឿងឡើយ ហើយបាននិងកំពុងមានការគាំទ្រពីអតិថិជនជាច្រើនផងដែរ ។
អ្នកនាង លី ទីភស្ត័ ម្ចាស់ហាង កាកា កាហ្វេ បានរៀបរាប់ថា មុនបោះទីតាំងលក់កាហ្វេ និងភេសជ្ជៈនៅលើកំណាត់មហាវិថីមួយនេះ យើងបានសិក្សាឃើញថានៅតំបន់នេះមានសាកលវិទ្យាល័យនៅជិតៗគ្នាច្រើន បើដាក់លក់កាហ្វេនិងភេសជ្ជៈ ពិតជាមានអ្នកធ្វើដំណើរ អ្នកធ្វើការ រួមនឹងនិស្សិតចូលមកទិញច្រើន ជាលទ្ធផលគឺដូចអ្វីដែលយើងគិតទុកប្រាកដមែន ហើយសព្វថ្ងៃយើងមានភ្នាក់ងារលក់ជាង១០កន្លែងនៅរាជធានី ដែលអាចលក់បានជាង១.០០០កែវក្នុងមួយថ្ងៃ ។
អ្នកនាងបានបន្ដថា អតិថិជនភាគច្រើនចូលចិត្តពិសាកាហ្វេទឹកដោះគោទឹកកក ដោយតម្លៃក្នុង១កែវ៣.០០០រៀល ។ ចំពោះតំបន់ដែលលក់ដាច់ជាងគេគឺនៅសាកលវិទ្យាល័យជាតិគ្រប់គ្រង និងមុខសាលាភាសាបារាំង អាលីយ៉ង់។ ដោយឡែក ចំណេះជំនាញឆុងកាហ្វេ និងភេសជ្ជៈនេះ អ្នកនាងបានរៀនមកពីប្រទេសថៃ ហើយមុខរបរនេះ ឃើញថាល្អ និងថ្មីសម្រាប់ទីផ្សារកម្ពុជា ។ ក្រៅពីមានភ្នាក់ងារលក់ជាង១០កន្លែង យើងនូវមានបើកបង្រៀនរបៀបឆុងកាហ្វេ ក៏ដូចជាបានផ្តល់សិទ្ធិដល់អតិថិជនលក់បន្តទាំងនៅក្រុង និងបណ្តាខេត្តផងដែរ ។
កញ្ញា ប៊ែន ឡៃហេង ភ្នាក់ងារលក់កាហ្វេ Mobile Coffee បានឲ្យដឹងថា អស់រយៈពេលច្រើនខែមកហើយដែលយើងលក់កាហ្វេ និងភេសជ្ជៈនៅលើកំណាត់មហាវិថីព្រះមុនីវង្សនេះ។ នៅថ្ងៃធម្មតាពីថ្ងៃចន្ទដល់សុក្រ កាហ្វេMobile Coffee លក់ជូនអ្នកធ្វើដំណើរ អ្នកធ្វើការ និងនិស្សិតពេទ្យបានប្រមាណ១៨០កែវក្នុងមួយថ្ងៃ លើកលែងតែថ្ងៃសៅរ៍-អាទិត្យ លក់បានប្រហែល៨០កែវ ។ ក្នុងចំណោមភេសជ្ជៈទាំងនេះឃើញថា អតិថិជនចូលចិត្តពិសាកាហ្វេទឹកដោះគោទឹកកកច្រើនជាងគេ ។
លោកយ៉ែម ឈីម ស្ថាបនិកMobile Coffee បានឲ្យដឹងថា ផ្អែកតាមបទពិសោធន៍ជាង១ឆ្នាំកន្លងមកក្នុងការលក់កាហ្វេរឃើញថា សព្វថ្ងៃនេះអ្នកពិសាកាហ្វេហាក់ដូចជាផ្លាស់ប្ដូរឥរិយាបថខុសប្លែកពីមុនៗ ព្រោះពួកគាត់យល់ដឹងអនាម័យ និងមានជម្រើសច្រើន ទោះបីតម្លៃខ្ពស់បន្ដិចក្តី ក៏ពួកគាត់ទិញដែរ។ លោកបន្តថា សព្វថ្ងៃ Mobile Coffee មានការពេញនិយមពីអតិថិជនគ្រប់ថ្នាក់ ផ្អែកលើលក្ខណៈពិសេសមួយចំនួនដូចជា រសជាតិ អនាម័យ គុណភាព និងតម្លៃសមរម្យ ។ គិតមកដល់ពេលនេះ Mobile Coffee មានភ្នាក់ងារលក់(សាខា)ចំនួន២០កន្លែងនៅរាជធានីភ្នំពេញ ដោយក្នុងមួយថ្ងៃអាចលក់បានជាង២.០០០កែវ លើសពីអ្វីដែលយើងរំពឹងទុក ។ នៅថ្ងៃខាងមុខ យើងនឹងពង្រីកហាងឬភ្នាក់ងារបន្ថែមដើម្បីឆ្លើយតបទៅនឹងការគាំទ្រ ក៏ដូចជាតម្រូវការរបស់អតិថិជននៅរាជធានីភ្នំពេញផងដែរ ៕
ចែករំលែកព័តមាននេះ