រាជធានីភ្នំពេញ ៖ ការដាក់ទុនវិនិយោគទៅលើវិស័យស្រូវអង្ករ គឺត្រូវចំណាយអស់ដើមទុនច្រើនទៅលើការសាងសង់រោងម៉ាស៊ីនកិនស្រូវ ឃ្លាំងស្តុកស្រូវ និងប្រាក់បម្រុងទុកសម្រាប់ទិញស្រូវជាដើម ។ រីឯភាគរយនៃការទទួលបានប្រាក់ចំណេញស្ថិតនៅក្រោម៥%។ នេះជាប្រសាសន៍របស់លោកឧកញ៉ា គឹម សាវុធ អនុប្រធានសហព័ន្ធស្រូវអង្ករកម្ពុជា ។
លោកឧកញ៉ាលើកឡើងថា ម្ចាស់រោងម៉ាស៊ីនកិនស្រូវនីមួយៗត្រូវមានទុនបង្វិលគ្រប់គ្រាន់ ព្រោះនៅពេលយើងនាំអង្ករទៅបរទេស ត្រូវការពេល១ទៅ២ខែ ទើបទទួលបានប្រាក់បង្វិលមកវិញ តែបើយើងមិនមានទុនវិនិយោគគ្រប់គ្រាន់ទេ នោះការផលិតនិងការនាំចេញនឹងត្រូវរាំងស្ទះ ។
នៅក្នុងវិស័យស្រូវ អង្ករ រាជរដ្ឋាភិបាលមានគោលនយោយជំរុញការនាំចេញ និងបានជំរុញឲ្យធនាគារអភិវឌ្ឍជនបទផ្តល់កម្ចីឥណទានដល់ក្រុមអ្នករកស៊ីស្រូវអង្ករក្នុងអត្រាការប្រាក់ទាប ប៉ុន្តែលុយដែលធនាគារត្រូវឲ្យខ្ចីនោះវាមានចំនួនតិច ហើយការចែកចាយវាមិនមានលក្ខណៈទូទៅ ជាហេតុធ្វើរោងម៉ាស៊ីនមួយចំនួនមានការខ្វះខាតសាច់ប្រាក់ពុំអាចទទួលបានកម្ចី ។
លោកឧកញ៉ាបញ្ជាក់ថា បច្ចុប្បន្នក្រុមហ៊ុន ឬរោងម៉ាស៊ីនកិនស្រូវមួយអាចដំណើរបាន ត្រូវតែមានស្រូវចំនួន២ពាន់តោននៅក្នុងដៃ ទើបអាចធ្វើប្រតិបតិ្តការនៅក្នុងវិស័យស្រូវអង្ករដោយរលូនបាន ។ ដោយមើលឃើញទំហំវិនិយោគមានចំនួនធំ តែភាគរយនៃការទទួលបានប្រាក់ចំណេញតិចបែបនេះ ជាហេតុធ្វើឲ្យវិនិយោគិនដែលមានប្រាក់ច្រើនមួយចំនួន ងាកទៅរកមុខជំនួញណាដែលមានប្រាក់ចំណេញខ្ពស់ ប៉ុន្តែក៏មានម្ចាស់រោងម៉ាស៊ីនកិនស្រូវថ្មីខ្លះដែរដែលមានឆន្ទៈខ្ពស់ចូលរួមក្នុងវិស័យនេះ ។
លោក លី អេង អគ្គនាយករោងម៉ាស៊ីនកិនស្រូវ ដូនអឿនស្រីម៉ៅ ដែលមានទីតាំងនៅខេត្តបាត់ដំបងឲ្យដឹងថា រោងម៉ាស៊ីនកិនស្រូវដូនអឿនស្រីម៉ៅ ជាក្រុមហ៊ុនថ្មីទើបតែបញ្ចប់ការសាងសង់រោងចក្រនៅចុងខែមិថុនា ដោយចំណាយទុនវិនិយោគអស់ប្រមាណ៣០លានដុល្លារ ក្រោមកម្ចីរបស់ធនាគារពាណិជ្ជនៅក្នុងស្រុកដែលមានអត្រាការប្រាក់ខ្ពស់ ។ លោកថា ដើម្បីជំរុញឲ្យថ្លៃដើមនៃការផលិតអង្ករមានការធ្លាក់ចុះ លោកសូមឲ្យរដ្ឋាភិបាលពិនិត្យឡើងវិញលើបញ្ហាកម្ចីរបស់ក្រុមហ៊ុន និងធនាគារអន្តរជាតិមួយចំនួនដូចជា World Bank និង ADB សូមឲ្យដាក់ឥណទានដោយផ្ទាល់ដល់ក្រុមហ៊ុន ចៀសវាងបញ្ជូនឥណទាននេះឆ្លងកាត់ធនាគារពាណិជ្ជ ដែលជាលំបាករបស់ក្រុមហ៊ុន ។
លោកលើកឡើងថា នៅពេលកន្លងមកក្រុមហ៊ុនធ្លាប់បានផ្គត់ផ្គង់ស្រូវទៅឲ្យរោងម៉ាស៊ីនកិនស្រូវនានា ហើយបើគិតត្រឹមរយៈពេល៦ខែក្នុងឆ្នាំ២០១៥នេះ យើងផ្គត់ផ្គង់ស្រូវបានចំនួន៥ម៉ឺនតោនទៅឲ្យក្រុមហ៊ុនក្នុងស្រុក តែទៅពេលខាងមុខក្រុមហ៊ុននឹងកែច្នៃអង្ករនាំចេញដោយផ្ទាល់ ព្រោះក្រុមហ៊ុនថ្មីរបស់យើងមានសមត្ថភាពផលិតអង្ករបានចំនួន២ម៉ឺនតោនក្នុងមួយថ្ងៃ ។ ក្រុមហ៊ុននឹងចាប់ផ្តើមប្រមូលទិញស្រូវឡើងវិញចាប់ពីខែកញ្ញា តទៅ ដើម្បីត្រៀមនាំចេញទៅបរទេស ហើយនៅក្នុងដំណើរនាំចេញអង្ករដំបូងនេះ យើងមានគម្រោងនាំចេញអង្ករសចំនួន៥ពាន់តោនទៅបណ្តាប្រទេសនៅតំបន់អាស៊ាន តែគម្រោងនេះស្ថិតក្នុងការចរចានៅឡើយ ។
មូលហេតុដែលធ្វើឲ្យក្រុមហ៊ុនជ្រើសរើសការនាំចេញអង្ករស ព្រោះតែអង្ករសមានតម្រូវការនៅលើទីផ្សារចំនួន៤៧% នៃអង្ករក្រអូប ហើយម្យ៉ាងទៀតអង្ករនេះពុំសូវមានអ្នកចាប់អារម្មណ៍នាំចេញទៅលក់នៅបរទេសឡើយ ដោយសារតែប្រាក់ចំណេញទទួលបានតិចពេក ។
លោកបន្ថែមថា កត្តាដែលជំរុញឲ្យលោកឈានជើងចូលក្នុងវិស័យនេះ ដោយសារលោកយល់ឃើញថា ការផ្គត់ផ្គង់នឹងតម្រូវការចំពោះស្រូវអង្ករ ជាកត្តាមិនអាចខ្វះបាននៅលើពិភពលោក និងម្យ៉ាងទៀតបម្រែបម្រួលអាកាសធាតុ ធ្វើឲ្យប្រទេសមួយចំនួនមិនអាចផលិតស្រូវអង្ករបាន ប៉ុន្តែមនុស្សទាមទារត្រូវការបរិភោគរាល់ថ្ងៃ ម្ល៉ោះហើយទើបធ្វើឲ្យក្រុមហ៊ុនមានឆន្ទៈស្វែងរកប្រាក់ចំណេញខ្លះ និងជួយឲ្យពិភពលោកមានស្ថិរភាពស្បៀងផងដែរ ។
បើតាមរបាយការណ៍ក្រុមការងារផ្នែកស្រូវ អង្ករនៃវេទិការាជរដ្ឋាភិបាលផ្នែកឯកជន បង្ហាញថា បច្ចុប្បន្នក្រុមហ៊ុននាំចេញអង្ករទៅបរទេសមានចំនួន៧២ក្រុមហ៊ុន ៕
ចែករំលែកព័តមាននេះ