ខេត្តបាត់ដំបង ៖ តាមសេចក្តីរាយការណ៍បានឱ្យដឹងថា កាលពីវេលាម៉ោងប្រហែល១០ព្រឹកមិញនេះ ក្រោយពីផ្ទុះរឿងថៃបាញ់កាំជ្រួចធ្លាក់ចូលដីខ្មែរ អាជ្ញាធរថៃ (ទាហានឈុតខ្មៅ)បានចូលមកចរចាជាមួយប៉ូលិសព្រំដែនខ្មែរដែលឈរជើងនៅក្បែរតំបន់កើតហេតុ ដោយភាគីថៃសុំសងសំណងការខូចខាតដោយសារការបាញ់កាំជ្រួចមកភាគីកម្ពុជាវិញ។
គួររំលឹកផងដែរថា ប្រជាពលរដ្ឋថៃបានបាញ់កាំជ្រួចធំៗចេញពីភូមិចាក់សាន់ថ្មី ឃុំខ្លងកៃខឿន ស្រុកខ្លងហាត ខេត្តស្រះកែវ ប្រទេសថៃដែលមានចម្ងាយពីព្រំដែនប្រហែលជាង១គីឡូម៉ែត្រហោះចូលមកដីខ្មែរដែលមានជម្រៅ៣០០ទៅ៦០០ម៉ែត្រ ស្ថិតក្នុងភូមិសាស្ត្រភូមិទួលខ្ពស់ ឃុំភ្នំព្រឹក ស្រុកភ្នំព្រឹក បណ្តាលឱ្យធ្លាក់ត្រូវដំបូល និងជញ្ជាំងផ្ទះ អ្នកស្រុកធ្លុះធ្លាយ តែមិនមានគ្រោះថ្នាក់ដល់មនុស្សទេ។
ការបាញ់កាំជ្រួចនេះត្រូវបានខាងភាគីថៃឱ្យដឹងថា គេធ្វើឡើងក្នុងពិធីបួងសួងសុំទឹកភ្លៀង គឺបាញ់រយៈពេល៣ថ្ងៃ ចាប់ពីថ្ងៃទី៥ដល់ទី៧ កក្កដា៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ