ខេត្តកំពង់ចាម ៖ អេស្កាវ៉ាទ័រកាយដី១គ្រឿងបានក្រឡាប់បះជើងច្រូងនៅចំណុចការដ្ឋានធ្វើច្រាំងទន្លេមេគង្គ ស្ថិតនៅក្នុងសង្កាត់កំពង់ចាម ក្រុងកំពង់ចាម នារសៀលថ្ងៃទី៧ កក្កដា ២០១៥ តែសំណាងល្អមិនបណ្តាលឲ្យធ្លាក់ចូលទៅក្នុងទឹកទន្លេនោះទេ ដោយគ្រាន់តែឲ្យអ្នកបើកបរបានរងរបួសដៃម្ខាងប៉ុណ្ណោះ ។
ខេត្តកំពង់ចាម ៖ អេស្កាវ៉ាទ័រកាយដី១គ្រឿងបានក្រឡាប់បះជើងច្រូងនៅចំណុចការដ្ឋានធ្វើច្រាំងទន្លេមេគង្គ ស្ថិតនៅក្នុងសង្កាត់កំពង់ចាម ក្រុងកំពង់ចាម នារសៀលថ្ងៃទី៧ កក្កដា ២០១៥ តែសំណាងល្អមិនបណ្តាលឲ្យធ្លាក់ចូលទៅក្នុងទឹកទន្លេនោះទេ ដោយគ្រាន់តែឲ្យអ្នកបើកបរបានរងរបួសដៃម្ខាងប៉ុណ្ណោះ ។
តាមសាក្សីដែលបានឃើញហេតុការណ៍នេះបានប្រាប់ឲ្យដឹងថា នៅត្រង់ចំណុចមុខសណ្ឋាគារមេគង្គ ក្រុងកំពង់ចាម ច្រាំងទន្លេបានបាក់ស្រុតបង្កឲ្យបាក់រលំអគារសំរាប់លក់ដូរអស់១ល្វែងសាងសង់អំពីបេតុងកាលពីឆ្នាំទៅមិញ ហើយថែមទាំងបង្កឲ្យមានក្តីព្រួយបារម្ភដល់លំនៅឋានរបស់ប្រជាពលរដ្ឋ ដែលស្ថិតនៅតាមប្របដងទន្លេមេគង្គផងដែរ ។
សាក្សីបានបន្តថា រហូតមកដល់រដូវវស្សាឆ្នាំ២០១៥នេះ គេបានឃើញគ្រឿងចក្រជាច្រើនគ្រឿង រួមនិងកម្មករជាច្រើននាក់បាននាំគ្នាសម្រុកធ្វើរបាំងបេតុងការពារទឹក ដើម្បីចៀសវាងកុំឲ្យបាក់បន្តទៀតនាំក្តីអន្តរាយដល់ផ្ទះរបស់ប្រជាពលរដ្ឋ ។
ជាក់ស្តែងនៅរសៀលថ្ងៃទី៧ កក្កដា មានគ្រឿងចក្រប្រភេទអេស្កាវ៉ាទ័រកាយដី១គ្រឿងបានកំពុងតែបើកបរនៅលើដីចាក់ថ្មី លើខ្នងទំនប់ក្នុងទិសដៅពីត្បូងទៅជើង ក៏ស្រាប់តែផុងដីម្ខាងជាហេតុបណ្តាលឲ្យក្រឡាប់បះជើងច្រូងតែម្តង បណ្តាលអ្នកបើកបរដែលមិន
ត្រូវបានគេទម្លាយឈ្មោះឲ្យដឹងនោះបានផ្លោងចេញមកក្រៅតាមកញ្ចក់របស់គ្រឿងចក្រ ហើយរងរបួសដៃម្ខាង ឯក្បាលមានពាក់មួកការពារ ។ នេះចាត់ទុកជាសំណាងបានមួកជួយការពារ បើពុំនោះទេនឹងត្រូវបែកក្បាលហូរឈាមមិនខាន ។
កម្មករម្នាក់មិនបានបញ្ចេញឈ្មោះប្រាប់ទាំងភិតភ័យថា រូបគេកំពុងតែជីកដីនៅខាងក្រោមជាប់មាត់ទឹក ដោយឱនឈ្ងោកៗមិនបានចាប់អារម្មណ៏ឡើយ លុះពេលដែលក្រឡេកឡើងមកលើឃើញអេស្កាវ៉ាទ័រកាយដីបានក្រឡាប់មកស្ទើរតែដល់កន្លែងពួកគេកំពុងធ្វើការ នេះសំណាងណាស់ដែលមិនដល់ បើដល់វិញ មិនបាច់និយាយទេ ខ្ទេចហើយខ្ញុំ ។
សូមបញ្ជាក់ថា នារសៀលថ្ងៃដដែលនោះក្រុមមេការដែលទទួលធ្វើរបាំងការពារទឹកជំនន់កំពុងតែយកគ្រឿងចក្រ២គ្រឿងផ្សេងទៀតទៅកាយដី ដើម្បីរកវិធីសាស្ត្រទាញគ្រឿងចក្រដែលក្រឡាប់នោះបញ្ឈរឡើងវិញផងដែរ ។
លោកហាន កុសល នាយករដ្ឋបាលសាលាខេត្តបានប្រាប់ឲ្យដឹងថា គ្រឿងចក្រដែលកំពុងស្ថាបនារបាំងការពារច្រាំងទន្លេមេគង្គកុំឲ្យបាក់នៅត្រង់មុខសណ្ឋាគារមេគង្គនោះជារបស់ក្រសួងធនធានទឹក ៕
ចែករំលែកព័តមាននេះ