ខេត្តកំពង់ឆ្នាំង ៖ «ប្រជាពលរដ្ឋក្រីក្រនោះទេ ដែលត្រូវសមត្ថកិច្ចចាប់ឃាត់ខ្លួនពីរឿងកាប់បំផ្លាញព្រៃឈើ ឯចំណែកឈ្មួញអ្នកមានលុយមិនដែលត្រូវសមត្ថកិច្ចចាប់បានម្តង ណាឡើយ» ។ លោកយុទ្ឋ ភូថង រដ្ឋលេខាធិការក្រសួងកសិកម្ម រុក្ខាប្រម៉ាញ់ និងនេសាទ មានប្រសាសន៍បែបនេះក្នុងឱកាសដែលលោកអញ្ជើញជាអធិបតីភាពក្នុងពិធីដាំកូនឈើ និងដុតឧបករណ៍លើ្មសច្បាប់បំផ្លាញព្រៃឈើនៅស្រុកទឹកផុស ខេត្តកំពង់ឆ្នាំង ក្នុងឱកាសបុណ្យរុក្ខទិវាកាលពីព្រឹកថ្ងៃទី០៧ ខែកក្កដា ឆ្នាំ២០១៥ ។
លោករដ្ឋលេខាធិការបានបន្តថា ប្រជាពលរដ្ឋក្រីក្រគឺជារបាំងសម្រាប់បិទបាំងដែលនាំឱ្យមានបទល្មើសកាប់បំផ្លាញព្រៃឈើកើតឡើង ព្រោះថា គេមានប្រាក់ គេប្រើយើងឱ្យកាប់បំផ្លាញព្រៃឈើដើម្បីគេជាអ្នកប្រមូលទិញអុស ទិញឈើ ដែលយើងជាប្រជាពលរដ្ឋក្រីក្រកាប់លក់ឱ្យគេ ។ តែពេលសមត្ថកិច្ចចាប់ គឺចាប់យើងជាប្រជាពលរដ្ឋក្រីក្រ ចំណែកឈ្មួញដែលចាំចំណេញប្រាក់ធ្វើអ្នកមានបានពីលើយើង មិនដែលចាប់បានម្តងណាឡើយ ។
លោកបានបញ្ចាក់ដែរថា ថ្ងៃនេះក្រៅពីដាំកូនឈើចំនួន១៥០០ដើមដែលមានកូន ធ្នង់ បេង និងគគីរ គឺនៅមានដុតបំផ្លាញរណារយន្ត១៤២គ្រឿង អាំងវ៉ាទ័រឆក់ត្រីចំនួន១៣គ្រឿង និងបានប្រកាសដីព្រៃបម្រុងទុកអចិន្ត្រៃយ៍របស់រដ្ឋចំនួន៣៩៤ហិកតាទុកសម្រាប់ឱ្យសហគមន៍មូលដ្ឋានបង្កើតព្រៃសហគមន៍ផងដែរ ។
ក្នុងឱកាសដាំកូនឈើ និងដុតកំទេចរណារយន្ត រួមទាំងអាំងវ៉ាទ័រថ្ងៃនេះ គឺជាសារមួយយ៉ាងសំខាន់សំដៅបង្កើនប្រសិទ្ឋភាពនៃការគ្រប់គ្រងព្រៃឈើប្រកបដោយចីរភាពសម្រាប់មនុស្សបច្ចប្បន្ន និងមនុស្សជំនាន់ក្រោយទៀត ។
លោកយុទ្ឋ ភូថង ក៏បានផ្តាំផ្ញើដល់បងប្អូនប្រជាពលរដ្ឋ សូមបញ្ឈប់ការកាប់បំផ្លាញព្រៃឈើចាប់ពីពេលនេះតទៅ ហើយលោកសង្ឃឹមថា ទិវាដាំកួនឈើ រូមទាំងការដុតបំផ្លាញរណារយន្ត និងអាំងវ៉ាទ័រឆក់ត្រីក្នុងថ្ងៃនេះ នឹងប្រែក្លាយតំបន់នេះជាព្រៃធ្មជាតិ ពណ៌បៃតងស្រស់បំព្រងក្នុងពេលអនាគត ។
ទោះជាយ៉ាងណាក៏ដោយចុះ បទល្មើសកាប់បំផ្លាញព្រៃឈើក្នុងស្រុកទឹកផុសបានកើតឡើងយ៉ាងគគ្រឹកគគ្រេង ពិសេសការកាប់អុសស្ទែដែលកំពុងដឹកជញ្ជូនលក់ឱ្យតាមរោងចក្រ តាមឡឥដ្ឋ និងឈ្មួញគ្រប់ប្រភេទនៅក្នុងខេត្ត និងតាមបណ្តាខេត្តដទៃទៀតកំពុងតែកើតមានជារៀងរាល់ថ្ងៃ ខណៈទិវាដាំកូនឈើមានតែមួយថ្ងៃសម្រាប់រយៈពេលមួយឆ្នាំ ៕
ចែករំលែកព័តមាននេះ