ខេត្តស្វាយរៀង ៖ នៅទីបញ្ជាការដ្ឋានកងរាជអាវុធហត្ថខេត្ត បានរៀបចំពិធីបិទវគ្គបំប៉នមន្ត្រីនគបាលយុត្តិធម៌ និងឋានលេខាដល់នាយ នាយរង កងរាជអាវុធហត្ថវគ្គ២ ដោយអញ្ជើញបើក និងបិទវគ្គដោយលោកឧត្តមសេនីយ៍ត្រីសែរ វុទ្ធី មេបញ្ជាការកងរាជ អាវុធ ហត្ថខេត្ត លោកវរសេនីយ៍ឯកនុត នន្ទ មេបញ្ជាការរងកងរាជអាវុធហត្ថខេត្ត និងជាគណៈកម្មការហ្វឹកហ្វឺន ដោយមានសិក្ខាកាមចូល រួម៣០នាក់ ។ ពិធីបិទវគ្គនេះធ្វើឡើងកាលពីរវេលាម៉ោង៣ និង៣០នាទីរសៀល ថ្ងៃទី៦ កក្កដា ២០១៥ នៅទីបញ្ជាការដ្ឋានកង រាជអាវុធហត្ថខេត្ត ។
លោកវរៈសេនីយ៍ឯកនុត នន្ទ មេបញ្ជាការរងកងរាជអាវុធហត្ថខេត្តបានមានប្រសាសន៍ក្នុងពិធីបិទវគ្គបំប៉ននោះថា វគ្គបំប៉នមន្ត្រីនគបាលយុត្តិធម៌ និងឋានលេខាដល់នាយ នាយរងកងរាជអាវុធហត្ថនេះជាវគ្គទី២ ដែលមានរយៈពេល១៥ថ្ងៃ គឺចាប់ផ្តើមពីថ្ងៃទី២២ មិថុនា ២០១៥ ដល់ថ្ងៃទី៦ កក្កដា ២០១៥នេះ ហើយសិក្ខាកាមដែលបានចូលរៀនវគ្គបំប៉ននេះមាន៣០នាក់មកពីទីបញ្ជាការដ្ឋានកងរាជអាវុធហត្ថខេត្ត១១នាក់ មកពីមូលដ្ឋានកងរាជអាវុហត្ថស្រុក/ក្រុង១៩នាក់ ។
លោកនុត នន្ទ បន្តទៀតថា មុខវិជ្ជាមេរៀនមានដូចជា ១-ឋានលេខា ២- ភារកិច្ចត្រួតពិនិត្យកន្លែងកើតហេតុ ៣-នីតិវិធីកសាងសំណុំរឿង ៤-ក្រមព្រហ្មទណ្ឌ នីតិវិធីក្រមព្រហ្មទណ្ឌ ៥-ភារកិច្ចរបស់ការិយាលយ័ព័ត៌មានទូទៅ ។
សិក្ខាកាមទាំងអស់បានខិតខំរៀនសូត្រដោយយកចិត្តទុកដាក់ និងគោរពវិន័យសាលាបានល្អ ។ ជាលទ្ធផលទទួលបានពេលបញ្ចប់វគ្គគឺទទួលបាននិទ្ទេសល្អ២៥នាក់ ល្អបង្គួរ៣នាក់ មធ្យម២នាក់ ។
លោកឧត្តមសេនីយ៍ត្រីសែរ វុទ្ធី មេបញ្ជាការកងរាជអាវុធហត្ថខេត្ត បានមានមតិផ្តាំផ្ញើរដល់នាយ នាយរងកងរាជអាវុធហត្ថ ដែលជាសិក្ខាកាមទាំងអស់ថា សូមលោក លោកស្រី នាយ នាយរងកងរាជអាវុធហត្ថ និងជាមន្ត្រីនគបាលយុត្តិធម៌ ក្រោយពីបានទទួលវគ្គបំប៉ននេះទៅ ត្រូវយកចំណេះដឹង និងជំនាញទៅបម្រើរាជរដ្ឋាភិបាល បម្រើប្រជាពលរដ្ឋឲ្យមានប្រសិទ្ធិភាពខ្ពស់ និងត្រូវសហការជាមួយអាជ្ញាធរ និងកម្លាំងសមត្ថកិច្ចពាក់ពន្ធ័ ធ្វើការងារបង្ក្រាបបទល្មើសគ្រប់ប្រភេទ ជាពិសេសក្រុមក្មេងប្រើប្រាស់ ចែកចាយគ្រឿងញៀនឲ្យមានប្រសិទ្ធិភាព ដើម្បីការពារសន្តិសុខ សណ្តាប់ធ្នាប់សង្គមជូនប្រជាពលរដ្ឋ ទទួលបានសេចក្តីសុខសន្តិភាព ៕
ចែករំលែកព័តមាននេះ