ខេត្តព្រះសីហនុ ៖ បុរសម្នាក់បានរងរបួសធ្ងន់ ហើយបានស្លាប់បាត់បង់ជីវិតខណៈពេលបញ្ជូនទៅសង្គ្រោះនៅភ្នំពេញបានពាក់កណ្តាលផ្លូវ ដោយសារគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង៨ និង៣០នាទីយប់ ថ្ងៃទី០៦ កក្កដា ២០១៥ តាមបណ្តោយផ្លូវជាតិលេខ៤ ក្បែរផ្សារវាលរេញ ស្ថិតក្នុងភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ ។
ប្រភពពីកន្លែងកើតហេតុបានឱ្យដឹងថា គ្រោះថ្នាក់ចរាចរណ៍នេះបង្កឡើងដោយរថយន្តសាំងយ៉ុង១គ្រឿង ពណ៌ស ពាក់ស្លាកលេខ ភ្នំពេញ 2P-1070 បានបត់ត្រឡប់ក្រោយ ហើយត្រូវបានម៉ូតូ១គ្រឿងម៉ាកហុងដា ឌ្រីម សេ១២៥ ពណ៌ខ្មៅ ស៊េរី២០១៤បើកបរក្នុងទិសដៅពីជើងទៅត្បូង (ភ្នំពេញ-កំពង់សោម)បុកពីចំហៀងក្បែរគូទក្រោយ បណ្តាយឱ្យរងរបួសបែកថ្លើមយ៉ាងធ្ងន់ធ្ងរ ។
ប្រភពបានឱ្យដឹងទៀតថា ជនរងគ្រោះមានឈ្មោះឃុំ ស្រេង ភេទប្រុស អាយុ១៩ឆ្នាំ មានមុខរបរជាជាងជួសជុលរថយន្ត ស្នាក់នៅភូមិ-ឃុំកើតហេតុ ។
ប្រភពដដែលបានបន្តទៀតថា មុនពេលកើតហេតុរថយន្តបានបើកបរក្នុងទិសដៅស្របទិសជាមួយម៉ូតូដែរ លុះដល់ចំណុចកើតហេតុរថយន្តក៏ឈប់ហើយបត់ឆ្វេងដើម្បីឆ្លងផ្លូវត្រឡប់ទៅក្រោយវិញ ក៏ត្រូវម៉ូតូបុកយ៉ាងពេញទំហឹងតែម្តងបណ្តាលឱ្យអ្នកបើកបររងរបួសធ្ងន់(បែកថ្លើម) ហើយត្រូវបានដឹកយកទៅសង្គ្រោះនៅគ្លីនិកឯកជនក្បែរនោះយីហោនិច វណ្ណឌី ។ ដោយសារសភាពនៃរបួសធ្ងន់ធ្ងរពេក ក៏បានបញ្ជូនតាមរថយន្តសង្គ្រោះបន្តទៅភ្នំពេញ តែបានស្លាប់នៅតាមផ្លូវពេលជិតដល់ខេត្តកំពង់ស្ពឺ ។
ក្រោយពេលកើតហេតុ អ្នកបើកបររថយន្តបានព្យាយាមបើកគេចខ្លួនដែរត្រូវត្រូវសមត្ថកិច្ចស្ទាក់ចាប់បានរថយន្តយកមករក្សាទុកនៅអធិការដ្ឋានដើម្បីដោះស្រាយតាមច្បាប់ ចំណែកឯអ្នកបើកបរបានរត់គេចខ្លួនបាត់នៅចំណុចដែលសមត្ថកិច្ចឃាត់បានរថយន្ត ៕
ចែករំលែកព័តមាននេះ