ខេត្តបន្ទាយមានជ័យ ៖ បញ្ហាគ្រឿងញៀន បើទោះបីជាសមត្ថកិច្ចបានប្រឹងប្រែងបង្ក្រាបយ៉ាងណាក៏នៅតែមិនចេះរីងស្ងួតឡើយ តែទោះជាយ៉ាងណាកម្លាំងនគរបាលក្រុងប៉ោយប៉ែតមិនជិនណាយក្នុងការបង្ក្រាបនោះឡើយ ។ ជាក់ស្តែងកាលពីចុងសប្តាហ៍កន្លងទៅនេះកម្លាំងនគរបាលក្រុងប៉ោយប៉ែតបានបង្ក្រាបករណីជួញដូរ និងប្រើប្រាស់គ្រឿងញៀនចំនួន២ករណីដោយឡែកពីគ្នាក្នុងថ្ងៃតែមួយ ដោយចាប់ឃាត់ខ្លួនជនសង្ស័យបាន១៩នាក់ ថ្នាំញៀន៧ថង់តូច និងវត្ថុតាងមួយចំនួនទៀត ។
លោកវរសេនីយ៍ត្រីអ៊ុំ សុផល អធិការនគរបាលក្រុងប៉ោយប៉ែតបានឲ្យដឹងថា ដើម្បីរក្សាបាននូវសណ្តាប់ធ្នាប់ សុវត្ថិភាពក្នុងមូលដ្ឋាន ពិសេសគឺអនុវត្តគោលនយោបាយភូមិ/ឃុំមានសុវត្ថិភាព លោកឧត្តមសេនីយ៍ត្រីអាត់ ខែម ស្នងការនគរបាលខេត្តបន្ទាយមានជ័យ ជានិច្ចកាលតែងតែក្រើនរំលឹកដល់កម្លាំងនគរបាលក្រោមឱវាទ និងតាមបណ្តាអង្គភាពនីមួយៗ ត្រូវតែចាត់វិធានការបង្ក្រាបចំពោះគ្រឿងញៀនឲ្យដូចជាភ្លៀងរលឹម ។ ជាលទ្ធផលនៅចុងសប្តាហ៍កន្លងទៅនេះលោកបានដឹកនាំកម្លាំងនគរបាលក្នុងអធិការដ្ឋាននគរបាលក្រុងចុះប្រតិបត្តិការបង្ក្រាបករណីគ្រឿងញៀនចំនួន២ករណីក្នុងថ្ងៃតែមួយក្នុងភូមិសាស្ត្រក្រុងប៉ោយប៉ែត ។ ជាមួយនឹងការចុះបង្ក្រាបទាំង២ករណីនេះ សមត្ថកិច្ចបានចាប់ឃាត់ខ្លួនជនសង្ស័យជួញដូរបានចំនួន៤នាក់ ឈ្មោះ១-ធឿន សាន់ ភេទប្រុស អាយុ១៩ឆ្នាំ ជាបុគ្គលិកកាស៊ីណូ នៅភូមិក្បាលស្ពាន សង្កាត់-ក្រុងប៉ោយប៉ែត, ២ឈ្មោះ-ពេក ហេន ហៅគួយ ភេទប្រុស អាយុ៣៣ឆ្នាំ អ្នករត់ម៉ូតូឌុប នៅភូមិក្បាលស្ពាន១ សង្កាត់-ក្រុងប៉ោយប៉ែត, ៣ឈ្មោះ-សូត្រ គឹមតង់ ភេទប្រុស អាយុ២២ឆ្នាំ នៅភូមិក្បាលស្ពាន១ សង្កាត់-ក្រុងប៉ោយប៉ែត, ៤ឈ្មោះ-ផាត់ កែវម៉ានី ភេទប្រុស អាយុ៤៩ឆ្នាំ នៅភូមិដុងអារញ្ញ សង្កាត់និមិត្ត ក្រុងប៉ោយប៉ែត និងអ្នកប្រើប្រាស់ចំនួន១៥នាក់ទៀត សរុបទាំងអស់១៩នាក់ និងដកហូតវត្ថុតាងថ្នាំញៀនប្រភេទមេតំហ្វេតាមីនអាយស៍ចំនួន៧ថង់តូច រួមទាំងសម្ភារៈមួយចំនួនទៀត ។
លោកអធិការបានបញ្ជាក់ថា ជនសង្ស័យទាំងអ្នកបើប្រាស់ និងអ្នកជួញដូរគ្រឿងញៀនទាំងអស់ រួមទាំងវត្ថុតាងត្រូវបានបញ្ជូនទៅស្នងការដ្ឋាននគរបាលខេត្ត និងបានរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យដើម្បីចាត់ការតាមច្បាប់ ៕
ចែករំលែកព័តមាននេះ