ខេត្តបន្ទាយមានជ័យ ៖ កម្លាំងនគរបាលការិយាល័យកណ្តាលព្រហ្មទណ្ឌប្រចាំវេណបានល្បាតពេលយប់ និងចាប់ឃាត់ខ្លួនក្រុមក្មេងទំនើងចំនួន៣នាក់ដែលជិះម៉ូតូពេលយប់ទម្លាក់ជន្ទល់អូសលើថ្នល់ឲ្យចេញផ្កាភ្លើង និងបង្កឲ្យនាយការិយាល័យនគរបាលព្រហ្មទណ្ឌកំរិតធ្ងន់រងរបួសពកចិញ្ចើមខាងឆ្វេងពេលដែលចុះប្រតិបត្តិការចាប់ពួកគេ។
ហេតុការណ៍នេះបានកើតឡើងកាលពីវេលាម៉ោង១១ និង៥៧នាទីយប់ ថ្ងៃទី០៥ កក្កដា ២០១៥ នៅចំណុចមុខសណ្ឋាគារណាសា ស្ថិតក្នុងភូមិ១ សង្កាត់ប៉ោយប៉ែត ក្រុងសិរីសោភ័ណ ។
លោកវរសេនីយ៍ត្រីភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកំរិតធ្ងន់បានឲ្យដឹងថា ក្មេងទំនើងទាំង៣នាក់ដែលត្រូវបានចាប់ឃាត់ខ្លួន ១-ឈ្មោះសាក់ សុណា ភេទប្រុស អាយុ២០ឆ្នាំ ជាអ្នកបើកម៉ូតូ ម៉ាកហុងដាឌ្រីមធុនសេ១២៥ ស៊េរី២០១៣ ពណ៌ខ្មៅ ពាក់ស្លាកលេខ 1H-7564 និងអ្នករួមដំណើរចំនួន២នាក់ទៀត ម្នាក់ឈ្មោះជុន លីសាន ភេទប្រុស អាយុ១៩ឆ្នាំ និងម្នាក់ទៀតឈ្មោះប៉ែន វុទ្ធី ភេទប្រុស អាយុ១៩ឆ្នាំ ទាំង៣នាក់នៅភូមិថ្មី សង្កាត់ភ្នៀត ក្រុងសិរីសោភ័ណ។
លោកនាយការិយាល័យបានបញ្ជាក់ថា នៅពេលដែលលោកបានដឹកនាំកម្លាំងចុះល្បាត និងយាមប្រចាំការនៅចំណុចសណ្ឋាគារណាសា ស្រាប់តែឃើញក្មេងទំនើង៣នាក់ជិះម៉ូតូមកពីទិសខាងលិចឆ្ពោះទៅខាងកើតក្នុងល្បឿនលឿន ថែមទាំងស្រវឹងទៀតផង ។
ពេលដល់កន្លែងលោកប្រចាំការមានគី្នគ្នាគេម្នាក់ជាអ្នករួមដំណើរបានយកជើងជាន់ជន្ទល់ឲ្យកោសនឹងថ្នល់ជាតិចេញផ្កាភ្លើងព្រាតបង្កការភ្ញាក់ផ្អើលដល់ប្រជាពលរដ្ឋដែលកំពុងលង់លក់ក្នុងដំណេក ឃើញដូច្នោះលោកបានហៅឲ្យឈប់ តែអ្នកបើកបានបង្កើនល្បឿនឲ្យលឿន លោកបានស្ទាក់ពីមុខ តែអ្នកបើកបំរុងបើកគេច លោកប្រឹងចាប់ទាញបណ្តាលឲ្យក្បាលរបស់លោកបុកនឹងដៃចង្កូតពកថ្ងាសខាងឆ្វេង។
បច្ចុប្បន្នក្មេងទំនើងទាំង៣នាក់ បានធ្វើការអប់រំ និងធ្វើកិច្ចសន្យា ហៅឪពុកម្តាយ ឬអាណាព្យាបាលមកធានាយកទៅផ្ទះវិញដើម្បីអប់រំបន្ត៕
ចែករំលែកព័តមាននេះ