ខេត្តតាកែវ ៖ កាលពីវេលាម៉ោង១២ថ្ងៃត្រង់ ថ្ងៃទី៦ កក្កដា ២០១៥ កម្មករ-កម្មការិនីរោងចក្រស្បែកជើងយិនហ័រ ស្ថិតក្នុងភូមិអង្គតាសោម ឃុំអង្គតាសោម ស្រុកត្រាំកក់ចំនួន៨០នាក់បាននាំគ្នាធ្វើកូដកម្មមិនចូលធ្វើការទាមទារឱ្យថៅកែរោងចក្របើកប្រាក់ខែ។
កម្មករ-កម្មការិនីរោងចក្រយិនហ័របានឱ្យដឹងថា មូលហេតុដែលពួកគេធ្វើកូដកម្មមិនចូលធ្វើការដោយសារថៅកែរោងចក្រមិនព្រមបើកប្រាក់ខែឱ្យ។ ពួកគេបន្តថា ថ្ងៃនេះធ្វើកូដកម្មមុខរោងចក្រ បើមិនមានដំណោះស្រាយទេ ពួកគេនឹងធ្វើកូដកម្មបិទផ្លូវជាតិលេខ៣តែម្តង។
ប្រភពដដែលបន្តទៀតថា រោងចក្រយិនហ័រនេះបានទទួលស្បែកជើងបន្តពីរោងចក្រធំយីហោប៉ុណ្ណទូសហ្វូតហ្វែរ អិលធីឌី ដែលមានទីតាំងនៅឃុំអង្គតាសោមដូចគ្នាចម្ងាយប្រមាណ១០០០ម៉ែត្រ ហើយរោងចក្រនោះបានជំពាក់លុយរោងចក្រដែលពួកគេកំពុងធ្វើការរាល់ថ្ងៃចំនួន២៤ម៉ឺនដុល្លារតាំងពីខែមេសាមក ដោយរោងចក្រធំនោះមិនព្រមសងទើបថៅកែគ្មានលុយបើកប្រាក់ខែឱ្យពួកគេ។
ទាក់ទិនហេតុការណ៍នេះ នៅពេលអ្នកយកព័ត៌មានចុះទៅថត ថៅកែចិនរោងចក្រប៉ុណ្ណទូសហ្វូតហ្វែរអិលធីឌី នោះបានដេញអ្នកយកព័ត៌មានចេញមិនឱ្យថតទេ៕
ចែករំលែកព័តមាននេះ