រាជធានីភ្នំពេញ ៖ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុសម្រេចប្រមូលពន្ធ-អាករគ្រប់ប្រភេទបានសរុបចំនួនប្រមាណ ៧០៦,៧៥លានដុល្លារស្នើនឹង២.៨២៧.០១៩,៥៥លានរៀល ស្មើនឹង៦០,៦៧%នៃគោលដៅកំណត់ក្នុងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៥ នៅក្នុងមាសទី១ ឆ្នាំ២០១៥នេះ ។
យោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុឱ្យដឹងថា នៅកិច្ចប្រជុំបូកសរុបលទ្ធផលប្រមូលចំណូលពន្ធប្រចាំឆមាសទី១ឆ្នាំ២០១៥ នៅអគ្គនាយកដ្ឋានពន្ថដារ ក្រោមអធិបតីភាព លោកគង់ វិបុល ប្រតិភូ
រាជរដ្ឋាភិបាលទទួលបន្ទុកជាអគ្គនាយកដ្ឋានពន្ធដារ កាលពីថ្ងៃទី០៦ កក្កដា ២០១៥ ឱ្យដឹងថា ក្នុងលទ្ធផលទាំងនោះមានថវិកា ថ្នាក់ជាតិចំនួន២.៥១០.៩១៥,០៥លានរៀល ស្មើនឹង៦២,៣៤% និងថវិកាថ្នាក់ ក្រោមជាតិចំនួន៣១៦.១០៤,៥០រៀលស្មើនឹង៤៩,៩៩% ។
បើប្រៀបធៀបនឹងរយៈពេល៦ខែ ឆ្នាំ២០១៤ ឃើញថា ចំណូលពន្ធសម្រាប់ឆមាសទី១ ឆ្នាំ២០១៥ កើនឡើងចំនួន៧៨៦.៣១៤,៣៤លានរៀល ស្មើនឹង៣៨,៥៣% ធៀបនឹងឆ្នាំ២០១៤ ។ ចំណែកការប្រមូលចំណូលពន្ធ-អាករគ្រប់ប្រភេទសម្រាប់ខែមិថុនា ឆ្នាំ២០១៥ សម្រេចបានចំនួន៣៦៤.៦២៤,២៦លានរៀល ប្រមាណ៩១,១៦%ស្មើនឹង ៧,៨៣%នៃផែនការកំណត់ដោយច្បាប់ ។
សេចក្តីប្រកាសព័ត៌មានបានបញ្ជាក់ថា ថ្វីត្បិតតែលទ្ធផលចំណូលពន្ធប្រ ចាំឆមាសទី១ទទួលបានគួរជាទីមោទនៈក៏ដោយ ក៏លោកគង់ វិបុលប្រតិភូរាជរដ្ឋាភិបាល ទទួលបន្ទុកអគ្គនាយកនៃអគ្គនាយកដ្ឋានពន្ធដារបានក្រើនរំឭកដល់លោកប្រធាននាយកដ្ឋាន ប្រធានសាខាពន្ធដារខេត្ត-ខណ្ឌ ឱ្យបន្តកិច្ចឋិតខំប្រឹងប្រែងបន្ថែមទៀត ព្រោះថា នេះជារដូវកាល Low season ហើយចំណូលពន្ធុអាចនឹងធ្លាក់ចុះ ដែលទាមទារឱ្យមានការខិតខំប្រឹងប្រែង ជា ពិសេសចំពោះរដូវកាលប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ ប្រភេទ ។
ព្រមជាមួយនេះ ដើម្បីធានាបាននូវការប្រមូលចំណូលគ្រប់គ្រប់តាម ផែនការកំណត់ដោយច្បាប់សម្រាប់ឆ្នាំ២០១៥នេះ ក៏ដូចជាស្របតាមភារកិច្ច ដែលរាជរដ្ឋាភិបាលប្រគល់ជូន ។ លោក គង់ វិបុលបានផ្តល់អនុសាសន៍ណែនាំ ចង្អុលបង្ហាញដល់នាយកដ្ឋាន សាខាពន្ធដារខេត្ត-ខណ្ឌឱ្យខិតខំអនុវត្តន៍ការងារ ប្រកបដោយការទទួលខុសត្រូវខ្ពស់ ក្នុងការពង្រឹងការចាត់បញ្ចូលអាជីវករជាប់ ពន្ធតាមរបបម៉ៅការទៅក្នុងរបបស្វ័យប្រកាស ពង្រឹងការធ្វើសវនកម្មសហគ្រាស ពង្រឹងការតឹងទារបំណុលពន្ធ និងរៀបចំការផ្តល់សេវាជូនអ្នកជាប់ពន្ធឱ្យបាន កាន់តែល្អប្រសើរ និងឱ្យបានកាន់តែខ្លាំងក្លាថែមទៀត ។
នៅក្នុងកិច្ចប្រជុំនោះដែរលោកក៏បានជំរុញឱ្យមន្ត្រីពន្ធដារគ្រប់លំដាប់ថ្នាក់ ត្រូវខិតខំពង្រឹងការអនុ វត្តន៍ច្បាប់ វិន័យការងារ និងក្រមសីលធម៌វិជ្ជាជីវៈឱ្យបានត្រឹមត្រូវ និងត្រូវមាន ភាពទន់ភ្លន់ តែម៉ឺងម៉ាត់ដោយផ្អែកទិដ្ឋភាពច្បាប់ជាមូលដ្ឋាន ក្នុងការផ្លើយតប ទៅកាន់អ្នកជាប់ពន្ធ ដោយធ្វើយ៉ាងណាឱ្យអ្នកជាប់ពន្ធសប្បាយចិត្ត មិនសម្តែង ការរអ៊ូរទាំ និងផ្តល់កិច្ចសហការល្អ ក្នុងការបង់ពន្ធជូនរដ្ឋនោះ ។
ចែករំលែកព័តមាននេះ