ខេត្តក្រចេះ ៖ បុរសពីរនាក់បានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រវាងម៉ូតូបុកជាមួយរថយន្តនៅលើស្ពានដែកបាឡេ ស្ថិតក្នុងស្រុកឆ្លូង កាលពីយប់ថ្ងៃទី៤ កក្កដា។
នគរបាលចរាចរណ៍បានឲ្យដឹងថា ជនរងគ្រោះជាភាគីម៉ូតូចំនួនពីរនាក់មានឈ្មោះ ណាង យុទ្ឋា អាយុ២១ឆ្នាំ និងឈ្មោះ ជុន សុខា អាយុ៣៦ឆ្មាំ របួសធ្ងន់ នៅពេលដែលអ្នកទាំងពីរបានជិះម៉ូតូប្រភេទត្រៃ ម៉ាកCBR បុកជាមួយរថយន្តកូរ៉ូឡា ហើយជ្រុលទៅបុកបង្កាន់ដៃស្ពានដែកបាឡេ។
អធិការនគរបាលស្រុកឆ្លូងលោកវរសេនីយ៍ត្រី ឌួង សុទ្ឋី បានឲ្យដឹងថា មូលហេតុដែលឈានឲ្យមានគ្រោះថ្នាក់ គឺបណ្តាលមកពីភាគីទាំងពីរបើកបរមិនគោរពសិទ្ធិគ្នា គឺបើកជែងគ្នានៅពេលឡើងលើស្ពានដែកបាឡេ។
លោកបញ្ជាក់ថា ស្ពានដែលបាឡេនៅកន្លែងកើតហេតុចំណុចព្រែកឬស្ស ក្នុងឃុំហាន់ជ័យ ស្រុកឆ្លូង គឺមានសភាពតូចចង្អៀត ។ យ៉ាងណាក៏ដោយក្នុងហេតុការណ៍នេះ មិនមានអ្នកណាម្នាក់មានគ្រោះថ្នាក់ដល់អាយុជីវិតនោះទេ ដោយគ្រាន់តែមានជនរងគ្រោះចំនួនពីរនាក់ត្រូវរងរបួសធ្ងន់ និងត្រូវបញ្ជូនភ្លាមៗទៅសង្គ្រោះនៅមន្ទីរពេទ្យ រីឯម៉ូតូ និងរថយន្តក៏ត្រូវខូចខាតធ្ងន់ធ្ងរដូចគ្នា៕
ចែករំលែកព័តមាននេះ