ខេត្តព្រះសីហនុ ៖ ស្ត្រីម្នាក់ស្ទើរតែបាត់បង់ជីវិតដោយសារលង់ទឹក កាលពីវេលាម៉ោង១២ថ្ងៃត្រង់ ថ្ងៃទី០៤ កក្កដា ២០១៥ នៅចំណុចឆ្នេរអូត្រេះ២ ស្ថិតក្នុងក្រុម៨ ភូមិ៦ សង្កាត់លេខ៤ ក្រុងព្រះសីហនុ។
យោងតាមប្រភពពីអ្នកឃើញហេតុការណ៍បានឱ្យដឹងថា នៅមុនកើតហេតុគេបានឃើញភ្ញៀវទេសចរជាច្រើនបានមកកំសាន្តនៅចំណុចឆ្នេរអូត្រេះ២នេះ ក្នុងនោះមានក្រុមគ្រួសារស្ត្រីរងគ្រោះផងដែរ ដោយមានអ្នកខ្លះនៅលើគោក អ្នកខ្លះនៅក្នុងទឹក ស្រាប់តែនៅវេលាកើតហេតុមានជនបរទេសស្រែកប្រាប់ថា មានមនុស្សលង់ទឹក ដោយជនបរទេសនោះបានហែលទៅស្រង់ស្ត្រីរងគ្រោះមកលើឆ្នេរខ្សាច់ បន្ទាប់មកត្រូវបានក្រុមគ្រួសារដឹកមកកាន់មន្ទីពេទ្យ រួចដឹកបន្តតាមយន្តហោះទៅកាន់រាជធានីភ្នំពេញ។
ដោយឡែកយោងតាមប្រភពសមត្ថកិច្ចមូលដ្ឋានបានឱ្យដឹងដែរថា ស្ដ្រីរងគ្រោះត្រូវបានគេស្គាល់ឈ្មោះឡាយ មិន ភេទស្រី អាយុ៥៨ឆ្នាំ មានទីលំនៅរាជធានីភ្នំពេញ។ ប្រភពដដែលបានគូសបញ្ជាក់ទៀតថា មុនពេលកើតហេតុគេបានឃើញស្ដ្រីរងគ្រោះ រួមនិងក្រុមគ្រួសារបាននាំគ្នាហែលទឹកលេងនៅឆ្នេរអូរត្រេះ។
ដោយក្រុមគ្រួសារភ្លេចខ្លួនបន្តិច ស្ដ្រីនោះក៏បានដើរទៅដល់កន្លែងជ្រៅទើបបណ្ដាលឲ្យលង់ ហើយត្រូវបានជនបរទេសម្នាក់ប្រទះឃើញស្រែកឆោឡោ នាំគ្នាចុះទៅជួយនាំយកទៅសង្គ្រោះនៅមន្ទីរពេទ្យឯកជនមួយនៅក្រុងព្រះសីហនុ។
សូមបញ្ជាក់ផងដែរថា បើទោះបីជានៅប៉ុន្មានថ្ងៃនេះខេត្តព្រះសីហនុ ពុំមានភ្លៀងធ្លាក់យ៉ាងណាក្តី ក៏ប៉ុន្តែនៅលើផ្ទៃសមុទ្រហាក់មានខ្សល់ និងរលកធំ ដែលប្រការនេះសូមឱ្យភ្ញៀវទេសចរទាំងអស់ត្រូវមានការប្រុងប្រយ័ត្ននៅពេលចុះងូតទឹក លើសពីនេះគឺក្មេងៗសូមថែទាំឱ្យបានល្អ៕
ចែករំលែកព័តមាននេះ