រាជធានីភ្នំពេញ ៖ មុខសញ្ញាចែកចាយគ្រឿងញៀ.នប្រុសស្រី២នាក់ និងអ្នកសេពគ្រឿងញៀ.ន៣នាក់ទៀតត្រូវបានកម្លាំងសមត្ថកិច្ចប៉ុស្តិ៍រដ្ឋបាលស្ទឹងមានជ័យ បង្ក្រាបបានកាលពីវេលាម៉ោង៣ និង៤៥នាទីរសៀល
រាជធានីភ្នំពេញ ៖ មុខសញ្ញាចែកចាយគ្រឿងញៀនប្រុសស្រី២នាក់ និងអ្នកសេពគ្រឿងញៀន៣នាក់ទៀតត្រូវបានកម្លាំងសមត្ថកិច្ចប៉ុស្តិ៍រដ្ឋបាលស្ទឹងមានជ័យ បង្ក្រាបបានកាលពីវេលាម៉ោង៣ និង៤៥នាទីរសៀលថ្ងៃទី០៤ កក្កដា ២០១៥ នៅចំណុច២ទីតាំងផ្សេងគ្នាក្នុងភូមិសាស្ត្រសង្កាត់ស្ទឹងមានជ័យ ដែលទីតាំងទី១ នៅចំណុចផ្ទះជួល ក្នុងភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ និងទីតាំងទី២ ក្នុងក្រុមទី៩ ភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ ។
សមត្ថកិច្ចឱ្យដឹងថា មុនឈានដល់ការបង្ក្រាប ដំបូងឡើយសមត្ថកិច្ចបានបើកការស្រាវជ្រាវស៊ើបដឹងពីទីតាំងលាក់ខ្លួនរបស់ជនសេពគ្រឿងញៀនចំនួន២នាក់ នៅចំណុចផ្ទះជួលមួយកន្លែង ក្នុងភូមិដំណាក់ធំ៣ ខណ្ឌមានជ័យ ទើបសមត្ថកិច្ចចុះដល់ទីតាំងកើតហេតុធ្វើការបង្ក្រាបបានជនញៀនថ្នាំចំនួន២នាក់បានជាក់ស្តែង ។
ក្រោយការចាប់ឃាត់ខ្លួនហើយនោះ ជនទាំង២នាក់បានឆ្លើយសារភាពពីទីតាំងរបស់មេខ្លោងចែកចាយគ្រឿងញៀននៅផ្ទះជួលមួយកន្លែង ស្ថិតក្នុងក្រុម០៩ ភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ ។បន្ទាប់ពីទទួលបានចម្លើយសារភាពពីជនសង្ស័យហើយ ទើបនៅវេលាម៉ោង៣ និង៤៥នាទីរសៀល ថ្ងៃទី០៤ កក្កដា ២០១៥ កម្លាំងនគរបាលប៉ុស្តិ៍ស្ទឹងមានជ័យ បានចុះធ្វើការបង្ក្រាបដល់ទីតាំងខាងលើឃាត់ខ្លួនមុខសញ្ញាចែកចាយប្រុសស្រីចំនួន២នាក់បានជាក់ស្តែងនៅនឹងកន្លែងតែម្តង ។
សូមបញ្ជាក់ផងដែរថា ក្នុងការចាប់ខ្លួនមុខសញ្ញាចែកចាយគ្រឿងញៀនទាំង២នាក់ខាងលើនេះ សមត្ថកិច្ចក៏បានឃាត់ខ្លួនជនសង្ស័យម្នាក់ផ្សេងទៀតផងដែរ នៅទីតាំងខាងលើ ខណៈដែលជននេះទើបតែចេញមកពីទិញថ្នាំញៀនពីជនសង្ស័យជាមុខសញ្ញាចែកចាយ ។
ក្នុងការឃាត់ខ្លួនជនទាំង៥នាក់ សមត្ថកិច្ចដកហូតបានថ្នាំញៀនក្រាមសថ្លា (ម៉ាទឹកកក) ២២កញ្ចប់តូច និង១កញ្ចប់ធំ, ទូរស័ព្ទដៃ Nokia ១គ្រឿង, លុយខ្មែរ៣ម៉ឺនរៀល លុយដុល្លារ៣០ដុល្លារ រួមទាំងវត្ថុតាងមួយចំនួនធំទៀត៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ