ខេត្តកំពត ៖ ជនសង្ស័យម្នាក់ ត្រូវបាននគរបាលព្រហ្មទណ្ឌនៃស្នងការដ្ឋាននគរបាលខេត្ត ឃាត់ខ្លួននាំមកកាន់ស្នងការដ្ឋាននគរបាលខេត្ត ដើម្បីសាកសួរពីបទគំរាមកំហែងនិងរំលោភលំនៅឋានកាលពីយប់ថ្ងៃទី២ កក្កដា ២០១៥ ដោយជនសង្ស័យរូបនេះបានចូលធ្វើសកម្មភាពអុកឡុកដកពូថៅដៃគំរាមកំហែងគេឯងនៅក្នុងហាងម៉ាស្សាមួយកន្លែងនៅចំណុចមាត់ព្រែកកំពង់បាយត្រើយខាងកើត ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ។
ជនសង្ស័យឈ្មោះ ពេជ្រ ស៊ីណាត ភេទប្រុស អាយុ៣២ឆ្នាំ ជាអ្នកយកព័ត៌មានឲ្យ «សារព័ត៌មានដំណឹងទាន់ហេតុការណ៍» ជាសារព័ត៌មានពុំសូវឮឈ្មោះ មានទីលំនៅភូមិព្រែកចេក ឃុំកោះតូច ស្រុកទឹកឈូ ។
លោកឧត្តមសេនីយ៍ត្រី ម៉ៅ ច័ន្ទមៈធុរិទ្ធ ស្នងការនគរបាលរង និងជានាយការិយាល័យកណ្តាលនគរបាលព្រហ្មទណ្ឌខេត្ត បានប្រាប់កោះសន្តិភាពថា កម្លាំងរបស់លោកមិនមែនឃាត់ខ្លួនអ្នកកាសែតទេ ចាប់តែជនប្រព្រឹត្តខុស លុះដល់នាំខ្លួនមកសាកសួរទើបដឹងថា អ្នកកាសែត ហើយជនសង្ស័យត្រូវបានកសាងសំណុំរឿងបញ្ជូនទៅសាលាដំបូងខេត្ត នៅរសៀលថ្ងៃទី៤ កក្កដា ២០១៥ ដើម្បីតុលាការចាត់ការតាមនីតិវិធី ៕
ចែករំលែកព័តមាននេះ