ខេត្តកំពង់ចាម ៖ ក្មេងប្រុសតូចម្នាក់ឈ្មោះ និត លាភ អាយុ១៤ខែ បានលង់ទឹកស្លាប់ដោយសារតែឈ្លក់ទឹកក្នុងធុងទឹកកកតូចមួយនៅលើផ្ទះឈើ ខណៈដែលម្តាយចេញទៅទិញម្ហូបនៅខាងមុខផ្ទះ បង្កការភ្ញាក់ផ្អើលពីវេលាម៉ោង៥និង២៥នាទីល្ងាច ថ្ងៃទី៤ កក្កដា ២០១៥ នៅភូមិទួលរកា ឃុំពាមកោះស្នា ស្រុកស្ទឹងត្រង់ ។
លោកវរសេនីយ៍ត្រី ជា ធារិទ្ធ អធិការនគរបាលស្រុកស្ទឹងត្រង់ បានឲ្យដឹងថា នៅពេលល្ងាចមុនកើតហេតុ ម្តាយឈ្មោះ យឹម ខួច បាននៅជាមួយកូនតូចលេងនៅខាងមុខផ្ទះ រួចបានបីឡើងយកទៅលើផ្ទះរបស់ខ្លួន ចំណែកប្តីឈ្មោះ ណាត និត អាយុ២៩ឆ្នាំវិញ បានចេញទៅស៊ីឈ្មួលគេបាត់ ។
លោកជា ធារិទ្ធ បន្តថា បន្ទាប់មកស្ត្រីជាម្តាយបានយកលុយទៅទិញម្ហូបនៅក្បែរផ្ទះ គឺទុកកូនតូចឲ្យនៅម្នាក់ឯងលើផ្ទះ ពេលត្រឡប់មកវិញឈានជើងឡើងទៅលើផ្ទះស្រាប់តែឃើញកូនប្រុសតូចឈ្មោះ លាភ បះជើងឡើងលើ ដាំក្បាលចូលទៅក្នុងធុងទឹកកកក៏បានស្រែកឆោរឡោឡើងបង្កឲ្យមានការភ្ញាក់ផ្អើលដល់អ្នកជិតខាង ហើយភូមិ
ផងរបងជាមួយនាំគ្នាមកជួយរឹត ថែមទាំងបានលើករលាក់ឲ្យទឹកចេញពីក្នុងពោះ ។ តែមិនបានដឹងខ្លួនទេ រួចក៏បានដឹកយកមកសង្គ្រោះនៅពេទ្យក្នុងឃុំពាមកោះស្នារ តែរហូតមកដល់វេលាម៉ោង៨យប់ត្រូវបានគ្រូពេទ្យប្រាប់ថា ក្មេងប្រុសបានស្លាប់ទៅហើយតាំងពីមុនពេលមកដល់ពេទ្យម៉្លេះ រួចក៏បានដឹកត្រឡប់មកផ្ទះរៀបចំធ្វើបុណ្យតាមប្រពៃណី ក្រោមសំឡេងទួញសោកដ៏ក្រៀមក្រំពីក្រុមសាច់ញាតិ ។
មន្ត្រីនគរបាលប៉ុស្តិ៍រដ្ឋបាលឃុំពាមកោះស្នារ បានឲ្យដឹងថា ក្មេងប្រុសតូចដែលឈ្លក់ទឹកក្នុងធុងទឹកកកស្លាប់នោះជាកូនទី៣ក្នុងចំណោមបងប្អូនចំនួន៣នាក់ ៕
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ