កម្ពុជា-ឡាវសម្ពោធការតភ្ជាប់បណ្ដាញខ្សែកាបអុបទិក
ដោយ ៖ អប្សរា
ថ្ងៃអង្គារ ទី៦ ខែកក្កដា ឆ្នាំ២០១០ ម៉ោង ១៧:០៤
អ៊ុយសុង
ការតភ្ជាប់បណ្ដាញខ្សែកាបអុបទិករវាងទូរគមនាគមន៍កម្ពុជា និងសហគ្រាសទូរ គមនាគមន៍ឡាវក្រោមអធិបតីភាពលោកសូរ ឃុន រដ្ឋមន្ដ្រីក្រសួងប្រៃសណីយ៍
រាជធានីភ្នំពេញ ៖ នៅទីស្នាក់ការទូរគមនាគមន៍កម្ពុជាកាលពីថ្ងៃទី៥ កក្កដា បានរៀបចំពិធីសម្ពោធដាក់ឱ្យប្រើប្រាស់ជាផ្លូវការ នូវការតភ្ជាប់បណ្ដាញខ្សែកាបអុបទិករវាង ទូរគមនាគមន៍កម្ពុជា និងសហគ្រាសទូរ គមនាគមន៍ឡាវ ក្នុងក្របខណ្ឌគំរោង បណ្ដាញព័ត៌មានកំរិតខ្ពស់នៃមហាអនុតំបន់មេគង្គ។ ពិធីនោះធ្វើឡើងក្រោមអធិបតីភាពលោកសូរ ឃុន រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ និងលោក Khammouane Xomsihapanya អគ្គនាយក សហគ្រាសទូរគមនាគមន៍ឡាវ ។
លោកសូរ ឃុន បានថ្លែងថា បណ្ដា ប្រទេសនៅក្នុងមហាអនុតំបន់ទន្លេមេគង្គ ចំនួន៦ រួមមាន ចិន មីយ៉ាន់ម៉ា ឡាវ ថៃ កម្ពុជា និងវៀតណាម មានគោលដៅធ្វើឱ្យ មានការអភិវឌ្ឍរួមគ្នាលើគ្រប់វិស័យ និង ពង្រីកមធ្យោបាយទំនាក់ទំនងដ៏មានប្រសិទ្ធ ភាពទៅវិញទៅមកដើម្បីធ្វើឱ្យមានកំណើន សេដ្ឋកិច្ចខ្ពស់ប្រកបដោយចីរភាពរបស់បណ្ដា ប្រទេសនៅក្នុងតំបន់ ។ ដោយឡែកវិស័យ បច្ចេកវិទ្យាទូរគមនាគមន៍ និងព័ត៌មានដែល ជាវិស័យមួយកំពុងបោះជំហានរីកចំរើនយ៉ាង ខ្លាំងក្លាក៏បានចូលរួមចំណែក និងដើរតួនាទី យ៉ាងសំខាន់ក្នុងការអភិវឌ្ឍសេដ្ឋកិច្ច និង លើកស្ទួយពាណិជ្ជកកម្មនៃបណ្ដាប្រទេសក្នុង តំបន់ ព្រមទាំងជំរុញដល់ទំនាក់ទំនងរបស់ បណ្ដាប្រទេសទាំងនេះឱ្យកាន់តែមានភាព ជិតស្និទ្ធថែមមួយកំរិតទៀត ។
លោកបន្ដថា ដោយមើលឃើញនូវ ទស្សនវិស័យនៃការអភិវឌ្ឍសេដ្ឋកិច្ចរបស់ ប្រទេសក្នុងមហាអនុតំបន់ ជាពិសេសការ អភិវឌ្ឍផ្នែកបច្ចេកវិទ្យាទូរគមនាគមន៍ និង ព័ត៌មាន ដែលជាកត្ដារួមចំណែកមិនអាច ខ្វះបាននៃការធ្វើទំនាក់ទំនងរវាងប្រទេស នីមួយៗ និងទំនាក់ទំនងទៅកាន់ពិភពលោក ទើបរដ្ឋាភិបាលនៃសាធារណរដ្ឋប្រជាមានិត ចិនបានផ្ដួចផ្ដើមគំនិតបង្កើតឡើងនូវគំរោង បណ្ដាញព័ត៌មានកំរិតខ្ពស់នៃមហាអនុ តំបន់មេគង្គ (GMS Information Superhighway Network)។ គំរោងនេះ ត្រូវបានទទួលការគាំទ្រ និងជ្រោមជ្រែង យ៉ាងពេញទំហឹងពីបណ្ដារដ្ឋាភិបាលនៃ ប្រទេសទាំងអស់ជាសមាជិកមហាអនុតំបន់ មេគង្គ ។
ដូច្នេះនៅថ្ងៃទី៥ ខែកក្កដា ឆ្នាំ ២០០៥ នៅទីក្រុងគួនមីង ខេត្ដយូណាននៃ សាធារណរដ្ឋប្រជាមានិតចិន បណ្ដាប្រតិបត្ដិ ករទូរគមនាគមន៍ និងទីភ្នាក់ងារទូរគមនា គមន៍របស់រដ្ឋាភិបាលមកពីបណ្ដាប្រទេស ចំនួន៦តាមបណ្ដោយទន្លេមេគង្គបានចុះហត្ថ លេខាលើអនុស្សរណៈយោគយល់ (MOU) ក្នុងការធ្វើកិច្ចសហប្រតិបត្ដិការរៀបចំគំរោង ផែនការ និងស្ថាបនានូវ GMS Information Superhighway Network (ISN) ដោយ យោងទៅលើ MOU ដែលបានចុះហត្ថលេខា កាលពីថ្ងៃទី២៨ ខែធ្នូ ឆ្នាំ២០០៤ រវាងរដ្ឋាភិ បាលនៃប្រទេសទាំង៦ស្ដីពីកិច្ចសហប្រតិបត្ដិ ការនៃការស្ថាបនាបណ្ដាញព័ត៌មានកំរិតខ្ពស់ (ISN)។
លោករដ្ឋមន្ដ្រីថ្លែងថា គោលបំណងជា ចំបងនៃគំរោង GMS Information Superhighway Network គឺធ្វើសមាហរណ កម្មបណ្ដាប្រទេសក្នុងមហាអនុតំបន់ និង គំរោងផែនការអភិវឌ្ឍជាតិតាមរយៈបណ្ដាញកាបអុបទិកនេះអាចស្រូបទាញយកបាននូវ អត្ថប្រយោជន៍ផ្សេងៗដូចជាការបង្កើន ចំណូលថវិកាជាតិ ជួយជំរុញឱ្យមានការ រីកចំរើននៃបច្ចេកវិទ្យាទូរគមនាគមន៍ និង ព័ត៌មាន ការផ្លាស់ប្ដូរនូវបច្ចេកវិទ្យាព័ត៌ មានថ្មីៗ ការបញ្ជូនចរន្ដសេវាជាសំលេង រូបភាព និងប្រព័ន្ធអ៊ីនធើរណេត ព្រមទាំង សេវាទូរគមនាគមន៍ផ្សេងៗទៀតគ្រប់ ប្រភេទទៅវិញទៅមក និងធ្វើទំនាក់ទំនង យ៉ាងទូលំទូលាយទៅកាន់ពិភពលោកក្នុង តំលៃទាប។
លោកឡៅ សារឿន ប្រតិភូរាជរដ្ឋាភិ បាលកម្ពុជាទទួលបន្ទុកជាអគ្គនាយកនៃទូរ គមនាគមន៍កម្ពុជាបានថ្លែងថា ទូរគមនាគមន៍ កម្ពុជាដែលជាគ្រឹះស្ថានសាធារណៈរបស់រាជ រដ្ឋាភិបាលកម្ពុជាមានភារកិច្ចទទួលខុសត្រូវ ក្នុងកិច្ចការអភិវឌ្ឍវិស័យទូរគមនាគមន៍ និង ព័ត៌មានវិទ្យា សព្វថ្ងៃបាននិងកំពុងខិតខំ យ៉ាងសស្រាក់សស្រាំក្នុងការកសាងហេដ្ឋា រចនាសម្ព័ន្ធទូរគមនាគមន៍ ជាពិសេស បណ្ដាញឆ្អឹងខ្នងទូរគមនាគមន៍ និងការពង្រីក បណ្ដាញជូនដល់អតិថិជនទាំងទីក្រុង និង តំបន់ជនបទដើម្បីឆ្លើយតបទៅនឹងបណ្ដាញ NGN នៅពេលអនាគតដើម្បីធ្វើយ៉ាងណាឱ្យ ដើរទាន់និន្នាការវិវត្ដនៃបច្ចេកវិទ្យាទូរ គមនាគមន៍ និងព័ត៌មានលើសាកលលោក យើងនេះ ជាពិសេសឆ្លើយតបទៅនឹងតំរូវការ ជាក់ស្ដែងរបស់អតិថិជន ។
លោកឡៅ សារឿន បញ្ជាក់ថា ក្រោម ការជួយជ្រោមជ្រែងពីសំណាក់រាជរដ្ឋាភិបាលកម្ពុជា និងក្រសួងប្រៃសណីយ៍ និងទូរគមនា គមន៍គំរោង GMS-IS របស់កម្ពុជាត្រូវបាន ស្ថាបនាឡើងក្រោមកម្ចីឥណទានពីធនាគារ EXIM Bank នៃសាធារណរដ្ឋប្រជាមានិត ចិន។ គំរោងនេះមានប្រវែងសរុប៦៥១គីឡូ ម៉ែត្រ ត្រូវបានស្ថាបនាឡើងចែកជាពីរ ដំណាក់កាល គឺដំណាក់កាលទី១ តាម បណ្ដោយផ្លូវជាតិលេខ៦ ចាប់ពីស្គន់ទៅខេត្ដ សៀមរាប, ដំណាក់កាលទី២ តាមផ្លូវជាតិ លេខ៧ ចាប់ពីទីរួមខេត្ដកំពង់ចាមរហូតដល់ ត្រញំងក្រៀល (ព្រំដែនឡាវ) ។
ការស្ថាបនាជីកកប់បណ្ដាញកាប និង សាងសង់ស្ថានីយសំរាប់បំពាក់ឧបករណ៍ បច្ចេកទេសទាំងពីរដំណាក់កាលនេះត្រូវបាន ទទួលបន្ទុកអនុវត្ដដោយក្រុមហ៊ុន Huawei។ នៅខែកក្កដា ឆ្នាំ២០០៩ ការជីកកប់បណ្ដាញ កាបអុបទិកនេះ ត្រូវបានស្ថាបនារួចរាល់ជា ស្ថាពរ និងបានប្រគល់ជូនទូរគមនាគមន៍ កម្ពុជាសំរាប់ដាក់ឱ្យប្រើប្រាស់ជាផ្លូវការ ក្នុង នោះទូរគមនាគមន៍កម្ពុជាបានភ្ជាប់ដាក់ឱ្យ ដំណើរការសាកល្បងជាមួយក្រុមហ៊ុន ETL នៃសាធារណរដ្ឋប្រជាធិបតេយ្យប្រជាមានិត ឡាវ ។
លោកបន្ដថា ទន្ទឹមនឹងនេះដែរ បណ្ដាញ កាបអុបទិក និងហេដ្ឋារចនាសម្ព័ន្ធទូរគមនា គមន៍ដែលទូរគមនាគមន៍កម្ពុជាស្ថាបនា កន្លងមកនេះអាចធ្វើឱ្យទ.ក មានលទ្ធភាព ក្នុងការផ្ដល់សេវាទូរគមនាគមន៍ និងព័ត៌ មានជូនអតិថិជនទូទៅនៅតាមបណ្ដាខេត្ដ ជុំវិញបឹងទន្លេសាបបណ្ដាខេត្ដតាមផ្លូវជាតិ លេខ១ លេខ៦ និងលេខ៧ និងមានលទ្ធភាព ភ្ជាប់បណ្ដាញជាមួយបណ្ដាប្រតិបត្ដិករទូរ គមនាគមន៍របស់បណ្ដាប្រទេសនៅក្នុងមហា អនុតំបន់ទន្លេមេគង្គផងដែរ ដូចជាប្រទេស ចិន មីយ៉ាន់ម៉ា ឡាវ ថៃ និងវៀតណាម ក្នុងក្របខណ្ឌគំរោងមហាអនុតំបន់ទន្លេ មេគង្គ GMS-IS ៕
