ខេត្តបន្ទាយមានជ័យ ៖ ស្រីគ្រប់លក្ខណ៍ គឺជារូបសំណាកដែលបងប្អូនប្រជាពលរដ្ឋគោរពប្រតិបត្តិ ហើយត្រូវក្រុមអ្នកជំនឿ បានរៀបចំធ្វើពិធីបួងសួងសុំ៧យ៉ាង កាលពីវេលាល្ងាចថ្ងៃទី០៣ កក្កដា ២០១៥ ស្ថិតនៅរង្វង់មូលស្រីគ្រប់លក្ខណ៍ ក្នុងព្រំភូមិ-សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
ក្នុងពីធីបួងសួងនេះ ត្រូវរៀបចំតាមទំនៀមទម្លាប់ និងតាមប្រពៃណី ដែលមានក្រុមភ្លេងពិនពាធលេង និងមានរាំរបាំបើកការចូលរូបដែលមានប្រមាណ៤ ទៅ៥រូប មានស្រី ប្រុស និងប្រភេទទី៣ ក៏មានដែរ។
លោកស៊ុន សាវ៉ាត អ្នករៀបចំកម្មវិធី និងជាអ្នកជំនឿបានប្រាប់ថា មូលហេតុដែលក្រុមអ្នកជំនឿមកពីក្រុងប៉ោយប៉ែត នាំគ្នាយកទីតាំងស្រីគ្រប់លក្ខណ៍ ដើម្បីប្រារព្ធពិធីបួងសួងនេះ ដោយសារសំណាកស្រីគ្រប់លក្ខណ៍ គឺជាមាតាពិភពលោក ដែលបង្កើតរូបមនុស្ស ហើយប្រជាពលរដ្ឋបានគោរពប្រតិបត្តិគ្រប់គ្នា។
លោកបានបញ្ជាក់ទៀតថា បញ្ហាជំនឿទាំងគោរពប្រតិបត្តិ ទើបក្រុមអ្នកជំនឿមកពីក្រុងប៉ោយប៉ែត ត្រូវបានរៀបចំពិធីបួងសួង៧យ៉ាង គឺ១-សុំសេចក្តីសុខ ២-សេចក្តីចម្រើន ៣-សុំបញ្ចៀសគ្រោះកាច ៤-សុំមានទឹកភ្លៀងជួយវិស័យកសិកម្ម ៥-សុំកុំឱ្យកើតមានគ្រោះរាំងស្ងួត ៦-សុំបញ្ចៀសគ្រោះថ្នាក់ចរាចរណ៍ និង៧-សុំបញ្ចៀសខ្យល់ព្យុះកន្ត្រាក់។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ