ខេត្តសៀមរាប ៖ កម្លាំងអាវុធហត្ថស្រុកស្រីស្នំបានធ្វើការ ពួនស្ទាក់បង្ក្រាបចាប់បានរថយន្តដឹកឈើក្រញូងខុសច្បាប់១គ្រឿង រួចបញ្ជូនមកកាន់ទីបញ្ជាការកងរាជអាវុធហត្ថខេត្ត ខណៈពេលដែលជនល្មើសកំពុងធ្វើចរាចរចេញពីភូមិសាស្ត្រខេត្តឧត្តរមានជ័យ
ខេត្តសៀមរាប ៖ កម្លាំងអាវុធហត្ថស្រុកស្រីស្នំបានធ្វើការ ពួនស្ទាក់បង្ក្រាបចាប់បានរថយន្តដឹកឈើក្រញូងខុសច្បាប់១គ្រឿង រួចបញ្ជូនមកកាន់ទីបញ្ជាការកងរាជអាវុធហត្ថខេត្ត ខណៈពេលដែលជនល្មើសកំពុងធ្វើចរាចរចេញពីភូមិសាស្ត្រខេត្តឧត្តរមានជ័យ ឆ្លងកាត់តាមស្រុកស្រីស្នំ ឆ្ពោះចូលមកចែកចាយក្នុងខេត្តសៀមរាប។
ហេតុការណ៍ចុះបង្ក្រាបបទល្មើសព្រៃឈើខុសច្បាប់នេះធ្វើឡើងនៅព្រឹកថ្ងៃទី៣ កក្កដា ២០១៥ ត្រង់ចំណុចព្រំប្រទល់ខេត្តឧត្តរមានជ័យ និងខេត្តសៀមរាប តាមបណ្ដោយផ្លូវជាតិលេខ៦៨ ក្នុងស្រុកស្រីស្នំ ខេត្តសៀមរាប ។
តាមប្រភពពីមន្ត្រីអាវុធហត្ថខេត្តបានឲ្យដឹងថា រថយន្តដឹកឈើក្រញូង១គ្រឿងនោះត្រូវបានកម្លាំងអាវុធហត្ថស្រុកស្រីស្នំបានធ្វើការពួនស្ទាក់បង្ក្រាបចាប់បាន រួចនាំយកមកកាន់ទីបញ្ជាការកងរាជអាវុធហត្ថខេត្តសៀមរាបភ្លាមៗផងដែរ ចំណែកម្ចាស់រត់គេចខ្លួនបាត់ស្រមោល ។ ប្រភពបានបន្តទៀតថា រថយន្តដឹកឈើក្រញូង១គ្រឿងនោះមានម៉ាកហាយឡិនឌ័រ ពណ៌ស ពាក់ស្លាកលេខ ភ្នំពេញ ២AA-៩៨៨៤ ។
ប្រភពពីមន្ត្រីរដ្ឋបាលព្រៃឈើសង្កាត់ស្រីស្នំបានឲ្យដឹងថា រថយន្តដឹកឈើម៉ាកហាយឡិនឌ័រ ពណ៌សដែលផ្ទុកឈើក្រញូងនោះមានចំនួន២០២ដុំ ស្មើនិង៦៥៥គីឡូក្រាម ។ ប្រភពបានបន្តថា ក្រោយពីសមត្ថកិច្ចកងរាជអាវុធហត្ថបានធ្វើការប្រគល់រថយន្ត និងថ្លឹងឈើរួច ត្រូវបានកម្លាំងជំនាញរដ្ឋបាលព្រៃឈើនាំយកទៅរក្សាទុកនៅសង្កាត់រដ្ឋបាលព្រៃឈើស្រីស្នំ ដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ