ខេត្តកំពង់ចាម ៖ រថយន្តក្រុងរបស់ក្រុមហ៊ុន GST បានមកឈប់ចតត្រង់ផ្លូវបំបែកជាបួនផ្សារព្រៃទទឹង ឃុំជ្រៃវៀន ស្រុកព្រៃឈរ ល្មើសនឹងបំរាមស្លាកសញ្ញាចរាចរណ៍មិនឲ្យរថយន្តធុនធំចត ហើយត្រូវបានជំនាញចរាចរណ៍នាំរថយន្តមករក្សាទុក
ខេត្តកំពង់ចាម ៖ រថយន្តក្រុងរបស់ក្រុមហ៊ុន GST បានមកឈប់ចតត្រង់ផ្លូវបំបែកជាបួនផ្សារព្រៃទទឹង ឃុំជ្រៃវៀន ស្រុកព្រៃឈរ ល្មើសនឹងបំរាមស្លាកសញ្ញាចរាចរណ៍មិនឲ្យរថយន្តធុនធំចត ហើយត្រូវបានជំនាញចរាចរណ៍នាំរថយន្តមករក្សាទុកនៅមុខអធិការដ្ឋាននគរបាលស្រុកព្រៃឈរ ដើម្បីអប់រំ តែបែរជាមានមនុស្សមួយក្រុមមានគ្នាចំនួន៥នាក់នាំគ្នាមកស្រែកជេរនូវពាក្យអសុរោះតាមមេក្រូលាន់ឮទ្រហឹងកងរំពង ។ ហេតុការណ៍នេះកើតឡើងកាលពីវេលាម៉ោងជិត៨ព្រឹក ថ្ងៃទី៣ កក្កដា ២០១៥ ហើយត្រូវបានសមត្ថកិច្ចចាប់ឃាត់មនុស្សម្នាក់ផងដែរ ។
លោកវរសេនីយ៍ត្រីកែវ ស៊ាងហ៊ន់ អធិការនគរបាលស្រុកព្រៃឈរបានប្រាប់ឲ្យដឹងថា ដោយអនុវត្តតាមការណែនាំរបស់លោកស្នងការនគរបាលខេត្ត ដោយបានចាត់ឲ្យកម្លាំងជំនាញចរាចរណ៍ស្រុកបានដាក់យាមប្រចាំការនៅផ្លូវបំបែកផ្សារព្រៃទទឹង ដើម្បីជួយសំរួលចរាចរណ៍ និងពង្រឹងសន្តិសុខជូនដល់អាជីវករ ទប់ស្កាត់ក្រែងមានហេតុការណ៍ណាមួយកើតឡើងពីក្រុមជនទុច្ចរិត ។
លោកវរសេនីយ៍ត្រីកែវ ស៊ាងហ៊ន់ អធិការនគរបាលស្រុកព្រៃឈរបន្តឲ្យដឹងទៀតថា ជាក់ស្តែងនៅព្រឹកថ្ងៃខាងលើ នៅពេលដែលកម្លាំងសមត្ថកិច្ចបាននាំយករថយន្តមកដាក់នៅមុខអធិការដ្ឋានស្រុក បែរជាមានឈ្មោះកេត សីហា ភេទប្រុស អាយុ៣០ឆ្នាំ ជិះរថយន្ត១គ្រឿងម៉ាកនីសាន់ ណាវ៉ារ៉ា មកឈប់ក្បែរនឹងកន្លែងបន្ទប់របស់លោកស្នាក់នៅដោយបានដាក់មេក្រូស្រែកជេរនូវពាក្យអសុរោះពិបាកនឹងស្តាប់ណាស់ ។ ទោះបីជាសមត្ថកិច្ចខិតខំប្រឹងណែនាំយ៉ាងណាក្តី ក៏នូវតែបន្តចរិករឹងរូសនោះ ទើបសមត្ថកិច្ចចាប់នាំមកដាក់នៅអធិការដ្ឋាននគរបាលស្រុកតែម្តង ។
ជាមួយគ្នានោះដែរលោកហួត វុទ្ធី ព្រះរាជអាជ្ញាអមសាលាដំបូងខេត្តក៏បានឲ្យបញ្ជូនជនសង្ស័យរូបនេះចាត់ការតាមនីតិវិធីផងដែរ ។
លោកវរសេនីយ៍ត្រី កែវ ស៊ាងហ៊ន់ អធិការនគរបាលស្រុកព្រៃឈរបានបញ្ជាក់ថា នាពេលកន្លងមករូបលោកធ្លាប់បានធ្វើការអប់រំជាច្រើនលើកច្រើនសារមកហើយ តែគេមិនព្រមស្តាប់ នៅតែផ្គើន ទើបនៅព្រឹកថ្ងៃទី៣ កក្កដា ចាត់ឲ្យកម្លាំងជំនាញចរាចរនាំយករថយន្តក្រុងមកដាក់នៅអធិការដ្ឋាននគរបាលស្រុក ។ ដោយសារតែការចតរថយន្តក្រុងនេះបានបង្កឲ្យមានភាពរញ៉េរញ៉ៃ បាត់បង់នូវសណ្តាប់ធ្នាប់ ទើបរូបលោកមានវិធានការក្តៅតែម្តង ៕
ចែករំលែកព័តមាននេះ