ខេត្តកំពង់ឆ្នាំង ៖ ផ្ទះធ្វើអំពីឈើប្រក់ស័ង្កសី និងបាំងជញ្ជាំងស្លឹកមួយខ្នង ត្រូវអគ្គិភ័យឆាបឆេះខ្ទេចទាំងស្រុង រួមទាំងទ្រព្យសម្បត្តិជាច្រើនផង ដែលហេតុការណ៍នេះកើតឡើងកាលពីវេលាម៉ោង៥ និង៣០នាទីល្ងាចថ្ងៃទី០២ កក្កដា ២០១៥ ស្ថិតនៅភូមិកំពង់ត្រឡាចក្រោម ក្នុងឃុំកំពង់ត្រឡាច ស្រុកកំពង់ត្រឡាច ។
ប្រភពបានឱ្យដឹងថា ម្ចាស់ផ្ទះត្រូវស្គាល់ឈ្មោះប្រាក់ ចាន់ថន (ជាប្តី) និងប្រពន្ធឈ្មោះសុខ សាវិន ។ ផ្ទះខាងលើនេះ មានទំហំ៧ម៉ែត្រ គុណ១៥ម៉ែត្រ ធ្វើពីឈើប្រក់ស័ង្កសីបាំងជញ្ជាំងស្លឹក ។ ក្នុងហេតុការណ៍នេះ ពុំមាននរណាម្នាក់រងរបួសនោះទេ តែទ្រព្យសម្បត្តិជាច្រើនឆេះខូចខាតដោយអគ្គិភ័យនោះ ក្នុងនោះមានប្រាក់ខ្មែរ៥លានរៀល, ស្រូវ៥តោន, មាស១៥តម្លឹង, ប្លង់ដី១ច្បាប់ ទូរទស្សន៍១គ្រឿង, ធុងបាស់១គ្រឿង, ម៉ាស៊ីនដេរ១គ្រឿង និងសម្ភារជាច្រើនទៀត ។
ចំពោះមូលហេតុ ដែលនាំឱ្យមានអគ្គិភ័យនេះ គឺបណ្តាលមកពីស្ត្រីជាម្ចាស់ផ្ទះបានដុតព្រៃមានចម្ងាយប្រមាណជាង១០ម៉ែត្រ ពីផ្ទះ និងគាប់ជួនមានខ្យល់បក់មកផងនោះ ទើបណ្តាលឱ្យរាលដាលឆេះផ្ទះតែម្តង ។ នៅពេលកើតហេតុភ្លាមៗ មានប្រជាពលរដ្ឋបាននាំគ្នាជួយអន្តរាគមន៍ពន្លត់ដែរ តែគ្មានលទ្ធភាព ព្រោះភ្លើងឆេះលឿនដោយសារតែជញ្ជាំងផ្ទះបាំងស្លឹក ។
ចំណែករថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត ពុំបានចេញអន្តរាគមន៍ទេ ដោយសារតែអគ្គិភ័យបានឆេះតែមួយប្រាវអស់ផ្ទះទាំងមូល ។ មួយវិញទៀតកន្លែងកើតហេតុ មានចម្ងាយជាង៤០គីឡូម៉ែត្រ ពីស្នងការដ្ឋាននគរបាលខេត្តទៀតផង។
ចែករំលែកព័តមាននេះ